- Ишлерге уял да, ашаргъа табма.
- Къонакъ хазыр болгъанлыкъгъа, къонакъбай хазыр тюлдю.
- Ичимден чыкъды хата, къайры барайым сата?
- Къуру гыбыт бек дыгъырдар.
- Кёб джат да, бек чаб.
- Керти сёзге тёре джокъ.
- Къарны аманнга къазан такъдырма, къолу аманнга от джакъдырма.
- Джиби бир къат джетмей эди да, эки къат тарта эди.
- Уллу суу бла уллу ауруудан башынгы сакъла.
- Ёлюк кебинсиз къалмаз.
- Сёз садакъдан кючлюдю.
- Агъач халкъгъа алтынды, иссиликге салкъынды.
- Байдан умут эте, джарлыдан ёгюз багъасы къорады.
- Ачыкъ джюрекге джол – ачыкъ.
- Айраннга суу къош, телиге джол бош.
- Тенги кёбню джау алмаз, акъылы кёбню дау алмаз.
- Адеб джокъда, намыс джокъ.
- Нёгер болсанг, тенг бол, тенг болмасанг, кенг бол.
- Ашда уялгъан – мухар, ишде уялгъан – хомух.
- Къонакъ аз олтурур, кёб сынар.
- Джарлы джети элни сёзюн этер.
- Джумушакъ сёз къаты таякъны сындырыр.
- Ишни аллы бла къууанма да, арты бла къууан.
- Бети бедерден, намыс сакълама.
- Иги джашны ышаны – аз сёлешиб, кёб тынгылар.
- Дженгил джетерикме деб, узун джолну къоюб, къысхасын барма.
- Ёнгкюч къууана барыр, джылай келир.
- Башда акъыл болмаса, эки аякъгъа кюч джетер.
- Кесине оноу эте билмеген, халкъына да эте билмез.
- Къарыусузгъа кюлме, онгсузгъа тийме.
- Кечеси – аяз, кюню – къыш, джарлы къаргъагъа бир аш тюш!
- Арба аугъандан сора, джол кёргюзтюучю кёб болур.
- Аууз сакълагъан – джан сакълар.
- Къая джолда джортма, ачыкъ сёзден къоркъма.
- Бек ашыкъгъан меннге джетсин, дегенди аракъы.
- Эшекни не къадар тюйсенг да, ат болмаз.
- Сууда джау джокъ, кёб сёзде магъана джокъ.
- Тойгъан антын унутур.
- Илму – джашауну джолу.
- Зар адам ашынгы ашар, кесинги сатар.
- Гугук кесини атын айтыб къычыргъанча, мен, мен деб нек тураса?
- Джумушакъ терекни къурт ашар.
- Байма, деб да, къууанма, джарлыма, деб да, джылама.
- Эл тойса, тоймагъан, эл къойса, къоймагъан.
- Татлы тилде – сёз ариу, чемер къолда – иш ариу.
- Къолу уллу – асыу, аягъы уллу – джарсыу.
- Ашхы болсанг, атынг чыгъар, аман болсанг, джанынг чыгъар.
- Айтылгъан сёз ызына къайтмаз.
- Эрине къаргъыш этген къатын, эрнин къабар.
- Джаханимни кёрмей, джандетге кёл салмазса.
Че
10.06.2013