Эльбрусоид :: Эльбрусоид

Аллахха ийнаннган кишини, Аллах онгдурур ишин.
Байма, деб да, къууанма, джарлыма, деб да, джылама.
Малны кют, джерни тюрт.
Аман хансны – урлугъу кёб.
Булут кёкге джарашыу, уят бетге джарашыу.
Бетинги сатма, малынгы сат.
Ач бёрюге мекям джокъ.
Ачны эсинде – аш.
Къоркъакъны кёзю экили кёрюр.
Адамны бетине къарама, адетине къара.
Сыфатында болмагъаны, суратында болмаз.
Къарыусузгъа кюлме, онгсузгъа тийме.
Байлыкъ тауусулур, билим тауусулмаз.
Ишленмеген джаш – джюгенсиз ат, ишленмеген къыз – тузсуз хант.
Джырчы ёлсе, джыры къалыр.
Джыланны къуйругъундан басарынг келсе, аны башы болгъанын унутма.
Ата Джуртча джер болмаз, туугъан элча эл болмаз.
Тойгъандан сора, ашны сёкме.
Кюн – узун, ёмюр – къысха.
Иги бла джюрюсенг, джетерсе муратынга, аман бла джюрюсенг, къалырса уятха.
Чабар ат – джетген къыз.
Къая джолда джортма, ачыкъ сёзден къоркъма.
Кийимни бичсенг, кенг бич, тар этген къыйын тюлдю.
Къартны бурнун сюрт да, оноугъа тут.
Билим ат болуб да чабар, къуш болуб да учар.
Башынга джетмегенни сорма.
Ишни аллы бла къууанма да, арты бла къууан.
От кюйдюрген, сау болса да, тот кюйдюрген, сау болмаз.
Тойчу джашха къарама, къойчу джашха къара.
Къарнынг бла ёч алма.
Джарлы джети элни сёзюн этер.
Ауузу аманнга «иги», деме.
Кийим тукъум сордурур.
Сакъалы текени да бар, мыйыгъы киштикни да бар.
Ашын ашагъанынгы, башын да сыйла.
Ана къойну – балагъа джандет.
Термилгенинги табмазса, кюлгенинге тюберсе.
Огъурлуну сёзю – суу, огъурсузну сёзю – уу.
Ашарыкъда сайлагъаннга – чий гырджын.
Экеулен сёлеше тура эселе, орталарына барыб кирме.
Ана – юйню кюн джарыгъы.
Дууулдаса – бал чибин, къонса – къара чибин.
Миллетни бойну – базыкъ, аны бла кюрешген – джазыкъ.
Дуния мал дунияда къалады.
Джарлы тюеге минсе да, ит къабар.
Биреуню эскиси биреуге джангы болмайды.
Шапа кёб болса, аш татымсыз болур.
Намыс сатылыб алынмайды.
Мадар болса, къадар болур.
Алгъанда – джууукъ, бергенде – джау.