- Ишни ахырын ойламай, аллын башлама.
- Ауузу бла къуш тута айланады.
- Таула не мийик болсала да, аууш табылыр.
- Хата – гитчеден.
- Аманнга игилик этсенг, юйюнге сау бармазса.
- Ойнай-ойнай кёз чыгъар.
- Ауузу аманнга «иги», деме.
- Кечеси – аяз, кюню – къыш, джарлы къаргъагъа бир аш тюш!
- Къолу уллу – асыу, аягъы уллу – джарсыу.
- Арбаз къынгырды да, ийнек сауалмайма.
- Ушамагъан – джукъмаз.
- Чомартха хар кюн да байрамды.
- Джашны джигитлиги сорулур, къызны джигерлиги сорулур.
- Къыйынлы джети элни къайгъысын этер.
- Гугук кесини атын айтыб къычыргъанча, мен, мен деб нек тураса?
- Адамны аманы адамны бети бла ойнар.
- Акъыл бла адеб эгизледиле.
- Рысхысына кёре, джаш ёсер, къышлыгъына кёре, мал ёсер.
- Джол бла сёзню къыйыры джокъ.
- Айыбны суу бла джууалмазса.
- Иги адамны бир сёзю эки болмаз.
- Къууут – джелге, берне – бошха.
- Биреуню тёрюнден, кесинги эшик артынг игиди.
- Насыблы элин сюер, насыбсыз кесин сюер.
- Таугъа чыгъаллыкъ эсенг, тюзде къалма.
- Билим ат болуб да чабар, къуш болуб да учар.
- Адамны джюреги нени кёрюрге сюйсе, кёзю да аны кёрюрге ёч болады.
- Чабакъсыз кёлге къармакъ салгъанлыкъгъа, чабакъ тутмазса.
- Кютгени беш эчки, сызгъыргъаны уа, джерни джарады.
- Сакъ юйюне сау барыр.
- Ауругъан – джашаудан умутчу.
- Сакъалы текени да бар, мыйыгъы киштикни да бар.
- Ашхы атаны – джашы ашхы, ашхы ананы – къызы ашхы.
- Юреннген ауруу къалмаз.
- Къарны аманнга къазан такъдырма, къолу аманнга от джакъдырма.
- Сёз къанатсыз учар.
- Арпа, будай – ащды, алтын, кюмюш а – ташды.
- Таукел адам тау тешер.
- Уллу сёзде уят джокъ.
- Эл элде бирер малынг болгъандан эсе, бирер тенгинг болсун.
- Байма, деб да, къууанма, джарлыма, деб да, джылама.
- Чомарт къолда мал къалмаз.
- Къозулугъунда тоймагъан, къойлугъунда тоймаз.
- Тенгинг джокъ эсе – изле, бар эсе – сакъла!
- Къар – келтирди, суу – элтди.
- Келинин тута билмеген, къул этер, къызын тута билмеген, тул этер.
- Садакъачыны джаны – къапчыгъында.
- Къонакъ кёб келюучю юйню, къазаны отдан тюшмез.
- Адамны аты башхача, акъылы да башхады.
- Ариу сёз джыланны орнундан чыгъарыр.