Суугъа – таянма, джаугъа – ийнанма.
Иги адамны бир сёзю эки болмаз.
Адам боллукъ, атламындан белгили болур.
Байлыкъ келсе, акъыл кетер.
Ачны эсинде – аш.
Адамны джюреги нени кёрюрге сюйсе, кёзю да аны кёрюрге ёч болады.
Хата – гитчеден.
Чомартны къолу берекет.
Эркиши – от, тиширыу – суу.
Башда акъыл болмаса, эки аякъгъа кюч джетер.
Ойнаб айтсанг да, эслеб айт.
Мураты болгъанны джюрек тебюую башхады.
Алма терегинден кери кетмез.
Аман къатын алгъан, арыр, иги къатын алгъан джарыр.
Аз сёлеш, кёб ишле.
Ауузу аманнга «иги», деме.
Ёксюзню тилеги къабыл болур.
Джылыгъа джылан илешир.
Джаралыны джастыгъында сау ёлюр.
Алгъанда – джууукъ, бергенде – джау.
Акъыл сабырлыкъ берир.
Окъуу – билимни ачхычы, окъуу – дунияны бачхычы.
Чёбню кёлтюрсенг, тюбюнден сёз чыгъар.
Ата Джуртча джер болмаз, туугъан элча эл болмаз.
Джангыз торгъай джырламаз.
Эркишиге тары кебек танг кёрюнюр.
Къайгъыны сюйген, къайгъы табар.
Зар адам ашынгы ашар, кесинги сатар.
Минг тенг да азды, бир джау да кёбдю.
Ашына кёре табагъы, балына кёре къалагъы.
Чакъырылмагъан къонакъ къачан кетерин сормаз.
Бозаны арты дауур болур.
Мадар болса, къадар болур.
Алтыда кюлмеген, алтмышда кюлмез.
Сёз сёзню айтдырыр.
Окъугъан озар, окъумагъан тозар.
Тин – байлыгъынг, терен саулугъунг.
Накъырданы арты керти болур.
Къайтырыкъ эшигинги, къаты уруб чыкъма.
Ашыкъгъан cуу, тенгизге джетмез.
Джеринден айырылгъан – джети джылар, джуртундан айырылгъан – ёлгюнчю джылар.
Бет бетге къараса, бет да джерге къарар.
Ачлыкъда тары гырджын халыуадан татлы.
Сёз къанатсыз учар.
Гитче джилтин уллу элни джандырыр.
Джашынгы кесинг юретмесенг, джашау юретир.
Джаным-тиним – окъуу, билим.
Окъ къызбайны джокълайды.
Джарлы эскисин джамаса, къууаныр.
Ауузу бла къуш тута айланады.
knopka s geometri4eskimi figurami