Къонакъны къачан кетерин сорма, къачан келлигин сор.
Джаш болсун, къыз болсун, акъылы, саны тюз болсун.
Тюзлюк тас болмайды.
Садакъачыны джаны – къапчыгъында.
Чакъырылмагъан къонакъ тёрге атламаз.
Ач – эснер, ат – кишнер.
Къар – келтирди, суу – элтди.
Адам сёзюнден белгили.
Минг тенг да азды, бир джау да кёбдю.
Биреуню эскиси биреуге джангы болмайды.
Кюлме джашха – келир башха.
Киштикге къанат битсе, чыпчыкъ къалмаз эди.
Иги – алгъыш этер, аман – къаргъыш этер.
Ач къалгъандан, кеч къалгъан къолай.
Ариу сёз джыланны орнундан чыгъарыр.
Тил джюрекге джол ишлейди.
Аджал соруб келмез, келсе, къайтыб кетмез.
Хар зат кесини орнуна иги.
Кёл – къызбай, къол – батыр.
Бети къызарыучу адамны, джюреги харам болмаз.
Таш бла ургъанны, аш бла ур.
Этек чакъмакълары баш джаргъан, сёлешген сёзлери таш джаргъан.
Къайгъыны сюйген, къайгъы табар.
Тилде сюек болмаса да, сюек сындырыр.
Акъыл бла адеб эгизледиле.
Ашда – бёрю, ишде – ёлю.
Къонакъ хазыр болгъанлыкъгъа, къонакъбай хазыр тюлдю.
Сескекли кесин билдирир.
Биреу къой излей, биреу той излей.
Иги джашны ышаны – аз сёлешиб, кёб тынгылар.
Бетинги сатма, малынгы сат.
Къозулугъунда тоймагъан, къойлугъунда тоймаз.
Ачлыкъ отха секиртир.
Айырылмаз джууугъунга, унутмаз сёзню айтма.
Насыблы элин сюер, насыбсыз кесин сюер.
Ёпкелегенни ашы татлы болады.
Таукел къуру къалмаз.
Ёксюзню тилеги къабыл болур.
Къартны бурнун сюрт да, оноугъа тут.
Аш кетер да бет къалыр.
Адеб джокъда, намыс джокъ.
Тик ёргени, тик энгишгеси да болады.
Джашны джигитлиги сорулур, къызны джигерлиги сорулур.
Аман адамны тепсинге олтуртсанг, къызынгы тилер.
Уллу къашыкъ эрин джыртар.
Чёбню кёлтюрсенг, тюбюнден сёз чыгъар.
Джыйырма къойну юч джыйырма эбзе кюте эди.
Къонакъ кёб келюучю юйню, къазаны отдан тюшмез.
Аманны къуугъан, аманлыкъ табар.
Эл ауузу – элия.
knopka s geometri4eskimi figurami