Ашатыргъа иш – ашхы, ишлетирге аш – ашхы.
Ариуну – ауруу кёб.
Адеби болмагъан къыз – тузсуз хант.
Къарнынг къанлынга кийирир.
Аш кетер да бет къалыр.
Къонакъ болсанг, ийнакъ бол.
Азыгъы аз, алгъа къабар, аты аман, алгъа чабар.
Хунаны тюбюн къазсанг, юсюнге ауар.
Бичгенде ашыкъма, тикгенде ашыкъ.
Бетинги сатма, малынгы сат.
Тойну къарнашы – харс, джырны къарнашы – эжиу.
Ачылгъан эт джабылыр, кёрген кёз унутмаз.
Ата – баланы уясы.
Аман адам элни бир-бирине джау этер.
Ауругъанны сау билмез, ач къарынны токъ билмез.
Биреуню тёрюнден, кесинги эшик артынг игиди.
Кесине гебен этелмеген, биреуге черен эте эди.
Аджашханны ызындагъы кёреди, джангылгъанны джанындагъы биледи.
Тёгюлген тюгел джыйылмайды.
Аууз сакълагъан – джан сакълар.
Джырчы джырчыгъа – къарнаш.
Сакъламагъан затынга джолукъсанг, не бек къууанаса, не бек ачыйса.
Танг атмайма десе да, кюн къоярыкъ тюйюлдю.
Тилчи тилден къаныкъмаз.
Ишленмеген джаш – джюгенсиз ат, ишленмеген къыз – тузсуз хант.
Кёбню кёрген – кёб билир.
Нёгер болсанг, тенг бол, тенг болмасанг, кенг бол.
Тиширыусуз юй – отсуз от джагъа.
Адам бла мюлк юлешмеген эсенг, ол адамны билиб бошагъанма, деб кесинги алдама.
Аджашхан тёгерек айланыр.
Уясында не кёрсе, учханында аны этер.
Окъ къызбайны джокълайды.
Джашлыкъ этмеген, башлыкъ этмез.
Джан саулукъ бермей, сан саулукъ бермезсе.
Окъугъан озар, окъумагъан тозар.
Башынга джетмегенни сорма.
Джахил болса анасы, не билликди баласы?
Къулакъдан эсе, кёзге ышан.
Тура эдим джата, къайдан чыкъды хата?
Аджал соруб келмез, келсе, къайтыб кетмез.
Хар ишни да аллы къыйынды.
Ата Джуртуму башы болмасам да, босагъасында ташы болайым.
Хар сёзню орну барды.
Бек ашыкъгъан меннге джетсин, дегенди аракъы.
Намысы болмагъанны, сыйы болмаз.
Азыкълы ат арымаз, къатыны аман джарымаз.
Сабий болмагъан джерде, мёлек болмаз.
Кесинге джетмегенни, кёб сёлешме.
Къазанда болса, чолпугъа чыгъар.
Билген билмегенни юретген адетди.
knopka s geometri4eskimi figurami