Джеринден айырылгъан – джети джылар, джуртундан айырылгъан – ёлгюнчю джылар.
Минг тенг да азды, бир джау да кёбдю.
Иги бла джюрюсенг, джетерсе муратынга, аман бла джюрюсенг, къалырса уятха.
Атадан ёксюз – бир ёксюз, анадан ёксюз – эки ёксюз.
Тойгъан джерден туугъан джер игиди.
Адам бла мюлк юлешмеген эсенг, ол адамны билиб бошагъанма, деб кесинги алдама.
Джумушакъ сёз къаты таякъны сындырыр.
Билим ат болуб да чабар, къуш болуб да учар.
Аман киши кеси юйюнде – къонакъ.
Айран тёгюлсе, джугъусу къалыр.
Адеби болмагъан къыз – тузсуз хант.
Аман адам этегингден тутса, кес да къач.
Къая джолда джортма, ачыкъ сёзден къоркъма.
Тойгъа алгъа да барма, тойда артха да къалма.
Душманны тышы – акъ, ичи – къара.
Кюлме джашха – келир башха.
Башы ишлегенни, ауузу да ишлер.
Чакъырылмагъан къонакъ – орунсуз.
Къарын къуру болса, джюрек уру болур.
Шайтан алдады, тюзлюк къаргъады.
Аз сёлешген, къайгъысыз турур.
Окъугъан озар, окъумагъан тозар.
Чомартны къолун джокълукъ байлар.
Баш – акъыл ючюн, акъылман – халкъ ючюн.
Чомарт къолда мал къалмаз.
Джаралыны джастыгъында сау ёлюр.
Кёл – къызбай, къол – батыр.
Кёл ашады да, кеси ашады.
Эки итни арасына сюек атма, эки адамны арасында сёз чыгъарма.
Ачлыкъ отха секиртир.
Аман къатын сабий табса, бий болур…
Чомартха Тейри да борчлуду.
Сютню башын джалагъан къутулур, тюбюн ичген тутулур.
Сибиртки да сыйлы болду, кюрек да кюнлю болду.
Кёкдеги болмаса, джердегин кёрмейди.
Миллетни бойну – базыкъ, аны бла кюрешген – джазыкъ.
Ишин билген, аны сыйын чыгъарады.
Тюкюрюк баш джармаз, налат кёз чыгъармаз!
Биреуню эскиси биреуге джангы болмайды.
Кёрмегеннге кебек – танг, битмегеннге сакъал – танг.
Бети – къучакълар, джюреги – бычакълар.
Атынг аманнга чыкъгъандан эсе, джанынг тамагъынгдан чыкъсын.
Хатерли къул болур.
Сакъ юйюне сау барыр.
Джолунга кёре – джюрюшюнг, джагъанга кёре – юлюшюнг.
Адам сёзге тынгыла, акъыл сёзню ангыла.
Къызны минг тилер, бир алыр.
Ётюрюкден тюбю джокъ, кёлтюрюрге джиби джокъ.
Адеб этмеген, адеб кёрмез.
Татлы тилде – сёз ариу, чемер къолда – иш ариу.
