Ёлген аслан – сау чычхан.
Биреу къой излей, биреу той излей.
Уллу атлама – абынырса, уллу къабма – къарылырса.
Сескекли кесин билдирир.
Къонакъ аман болса, къонакъбай джунчур
Къолунгдан къуймакъ ашатсанг да, атаны борчундан къутулмазса.
Узун джолну барсанг, бюгюн келирсе, къысха джолну барсанг, тамбла келирсе.
От кюйдюрген, сау болса да, тот кюйдюрген, сау болмаз.
Джарлы эскисин джамаса, къууаныр.
Ачлыкъ отха секиртир.
Иги бла джюрюсенг, джетерсе муратынга, аман бла джюрюсенг, къалырса уятха.
Ата Джуртун танымагъан, атасын да танымаз.
Адамны аты башхача, акъылы да башхады.
Аджал соруб келмез, келсе, къайтыб кетмез.
Къарт айтханны этмеген, къартаймаз.
Сыфатында болмагъаны, суратында болмаз.
Рысхысына кёре, джаш ёсер, къышлыгъына кёре, мал ёсер.
Атлыны ашхысы, ат тизгининден билинир
Этим кетсе да, сюегим къалыр.
Кёзден кетген, кёлден да кетеди.
Джюрекге ариу – кёзге да ариу.
Хаухну атма, ёнгкючню сатма.
Иги сёз – джаннга азыкъ, аман сёз башха – къазыкъ.
Халкъны джырын джырласанг, халкъ санга эжиу этер.
Джашда акъыл джокъ, къартда къарыу джокъ.
Ач – эснер, ат – кишнер.
Иги сеники эсе да, сюйген кесимикин этеме.
Мал тутхан – май джалар.
Иги джашны ышаны – аз сёлешиб, кёб тынгылар.
Чёбню кёлтюрсенг, тюбюнден сёз чыгъар.
Аманны тукъумуна къарама, игини тукъумун сорма.
Тилде сюек болмаса да, сюек сындырыр.
Юйюнг бла джау болгъандан эсе, элинг бла джау бол.
Бюгюн дуния кибик, тамбла ахыратды.
Аш иеси бла татлыды.
Эки элинги тыйсанг, джети элде махталырса.
Адебсиз адам – джюгенсиз ат.
Кирсизни – саны таза, халалны – къаны таза.
Ишге юренсин къоллары, халкъ бла болсун джоллары.
Эл ауузу – элия.
Тёрени джагъы джокъ.
Нёгер болсанг, тенг бол, тенг болмасанг, кенг бол.
Таукел къуру къалмаз.
Мухардан ач ычхынмаз.
Биреуню эскиси биреуге джангы болмайды.
Телиге от эт десенг, юйюнге от салыр.
Джарашыу сюйген – джалынчакъ.
Минг тенг да азды, бир джау да кёбдю.
Айранны сюйген, ийнек тутар.
Ариу сёз джыланны орнундан чыгъарыр.
