Эринчекге кюн узун.
Бети – къучакълар, джюреги – бычакълар.
Къонакъ аман болса, къонакъбай джунчур
Уллу къазанда бишген эт, чий къалмаз.
Тойгъан антын унутур.
Азыкълы ат арымаз, къатыны аман джарымаз.
Рысхысына кёре, джаш ёсер, къышлыгъына кёре, мал ёсер.
Мен да «сен», дейме, сен да «кесим», дейсе.
Сакъламагъан затынга джолукъсанг, не бек къууанаса, не бек ачыйса.
Ашатыргъа иш – ашхы, ишлетирге аш – ашхы.
Джашынгы кесинг юретмесенг, джашау юретир.
Ана къойну – балагъа джандет.
Чакъырылгъанны аты, чакъырылмагъанны багъасы болур.
Сыфатында болмагъаны, суратында болмаз.
Къууут – джелге, берне – бошха.
Ач да бол, токъ да бол – намысынга бек бол.
Къонакъны къачан кетерин сорма, къачан келлигин сор.
Юй кюйдю да, кюйюз чыкъды, ортасындан тюйюш чыкъды.
Эринчекни аурууу – кёб.
Уллу атлама – абынырса, уллу къабма – къарылырса.
Билмегенинги, билгеннге сор.
Этек чакъмакълары баш джаргъан, сёлешген сёзлери таш джаргъан.
Хоншуну тауугъу къаз кёрюнюр, келини къыз кёрюнюр.
Къызын тута билмеген, тул этер, джашын тута билмеген, къул этер.
Къазанчы аман болса, къазаны къайнамаз.
Чомартны къолун джокълукъ байлар.
Эл бла кёргенинг эрелей.
Иги – алгъыш этер, аман – къаргъыш этер.
Адамны адамлыгъы къыйынлыкъда айгъакъланады.
Къулакъдан эсе, кёзге ышан.
Аз сёлеш, кёб ишле.
Адеб этмеген, адеб кёрмез.
Адам боллукъ, атламындан белгили болур.
Ётюрюк хапар аякъ тюбю бла джюрюйдю.
Махтаннган къыз, тойда джукълар.
Адам сёзге тынгыла, акъыл сёзню ангыла.
Уллу суу бла уллу ауруудан башынгы сакъла.
Башланнган иш битер, къымылдагъан тиш тюшер.
Ашыкъгъанны этеги бутуна чырмалыр.
Тулпарлыкъ, билекден тюл – джюрекден.
Окъдан джара эртде-кеч болса да бителир, сёз джара, ёмюрге къалыр.
Тюкюрюк баш джармаз, налат кёз чыгъармаз!
Юре билмеген ит, къонакъ келтирир.
Туз, гырджын аша, тюзлюк бла джаша.
От этилмеген джерден тютюн чыкъмайды.
Кеси юйюмде мен да ханма.
Джукъу тёшек сайламайды.
Джерни букъусу кёкге къонмаз.
Къарнынг тойгъунчу аша да, белинг талгъынчы ишле.
Байны оноуу, джарлыгъа джарамаз.
