Войти на сайт
7 Июля 2022 года

 

  • Босагъагъа джууукъ орун болса, ашыгъыб тёрге озма.
  • Кечеси – аяз, кюню – къыш, джарлы къаргъагъа бир аш тюш!
  • Джаз бир кюнню джатсанг, къыш талай кюнню абынырса.
  • Насыб бютеу халкъны юлюшюдю.
  • Таукел къуру къалмаз.
  • Чабар ат – джетген къыз.
  • Къыйынлы джети элни къайгъысын этер.
  • Агъач халкъгъа алтынды, иссиликге салкъынды.
  • Алгъанда – джууукъ, бергенде – джау.
  • Тёгюлген тюгел джыйылмайды.
  • Эртде тургъан бла эртде юйленнген сокъуранмаз.
  • Шайтан алдады, тюзлюк къаргъады.
  • Къазанны башы ачыкъ болса, итге уят керекди.
  • Биреуге аманлыкъны тилеме да, кесинге ашхылыкъны тиле.
  • Джолда аягъынга сакъ бол, ушакъда тилинге сакъ бол.
  • Эки итни арасына сюек атма, эки адамны арасында сёз чыгъарма.
  • Къуру гыбыт бек дыгъырдар.
  • Зар адам ашынгы ашар, кесинги сатар.
  • Джыгъылгъанны сырты джерден тоймаз.
  • Халкъны юйю – туугъан джери.
  • Ишин билген, аны сыйын чыгъарады.
  • Ач келгенни – тойдур, кеч келгенни – къондур.
  • Ойнай билмеген, оюн бузар.
  • Керек ташны ауурлугъу джокъ.
  • Рысхы – сют юсюнде кёмюк кибикди.
  • Тойгъа барсанг, тоюб бар, эски тонунгу къоюб бар.
  • Ашха уста, юйюнде болсун
  • Джылкъыдан – ат чыгъар, тукъумдан – джаш чыгъар.
  • Кёзю сокъурдан – къоркъма, кёлю сокъурдан – къоркъ.
  • Билген билмегенни юретген адетди.
  • Накъырданы арты керти болур.
  • Эртде тургъан джылкъычыны эркек аты тай табар.
  • Джарлы джети элни сёзюн этер.
  • Иги – алгъыш этер, аман – къаргъыш этер.
  • Кёзюнде тереги болгъан, чёбю болгъаннга кюле эди.
  • Хар ишни да аллы къыйынды.
  • Джырына кёре эжиую.
  • Сёз сёзню айтдырыр.
  • Ким бла джюрюсенг, аны кёзю бла кёрюнюрсе.
  • Ёлген ийнек сютлю болур.
  • Кёлю джокъну – джолу джокъ.
  • Ашарыкъда сайлагъаннга – чий гырджын.
  • Хоншуну тауугъу къаз кёрюнюр, келини къыз кёрюнюр.
  • Къыйынлы джети элге оноу этер.
  • Хунаны тюбюн къазсанг, юсюнге ауар.
  • Адам бла мюлк юлешмеген эсенг, ол адамны билиб бошагъанма, деб кесинги алдама.
  • Къая джолда джортма, ачыкъ сёзден къоркъма.
  • Айырылмаз джууугъунга, унутмаз сёзню айтма.
  • Окъумагъан сокъурду, сокъур ташха абыныр!
  • Тамчы таш тешер.

 

Архив Форума » Зеленый Форум [архив] » - ЗФ - Поздравлялки
Страницы: Пред. 1 2 3 След.
RSS
С днем рождения, БИЛЯЛ!
 
#26
Джаратама0
13.04.2011 00:44:56
всезнайка

Бек сау бол, Къызыл-Къалачы эгешчигим. Сени да, Сестренканы да форумда эслегенлей, элибиз эсге тюшюб къалады. Бу назмучукъ да, 1970-чи джыллада мен школну таууса, джазылгъанды. Ол заманда элибизге кёб хайырым тиерикди деб тура эдим. Элни чачылыб кетерин, школгъа джюрюрге да хазна сабий табылмай къаллыгъын билмей эдим...

КЪЫЗЫЛ-КЪАЛА

Кюнбетни ташлары ушайла нечик
Шыпан къойлагьа, джайылыб тургьан.
Къаялары да ? къонгур ёгюзлеге,
"Пуф" деб джатыб, кюушене тургьан.

Былайда къарт-джаш да таныйды мени,
Хансха-ташха да къууанады джюрек.
Кесими Сосуркъача кёреме мында,
Балакъ тюбюм бла ёталмаса да джюджек.

Терсими, тюзюмю да кёргюзтген кюзгю,
Тау элим турады мени къучакълай.
Къара ханслай джагъылады аппаны сёзю,
Амманы сёзю да ? ит тил чапыракълай.

Эсимдеди: къаягьа ёрлей, джыгъылыб,
Мен аягъымы сындыргьанымда,
Аппа сылаб, къара ханс джагьыб
Байлагьан эди, сора къатымда

Эски джырланы джырлай эди ол:
Джукъласанг, илгенмезге амал джокъ,
Илгенсенг а ? сыланнгандан хайыр джокъ,
Дей, сыннганымы тюз къайнатхан эди ол.

Джюреги ачыгьаннга, кёлю сыннганнга
Мени назмум да джараса алай,
Андан уллу насыб керек тюл эди манга,
Не этсенг да эт, джоралаб алай...

...Хар зат да турады мени эсимде,
Гошаях къала къаяда тургьанча.
Къарайма къууанч берген элиме,
Бола, дуниягъа джангыдан туугьанча.

Маллагъа суу иче турургьа тегене
Джарашдыргьан чакълы бир затха ?
Не бла джарадынг туугьан элинге??
Деб, меннге тюбеб соргьан къартха,

Не джууаб къайтаралайым мен?
Бери келишмейле ууакъ сылтаула...
Мында туурады ишинг, иннетинг,
Къаяла тургьанча кёзге туура.

Хоу, мени айтырча этгеним джокъ,
Мени ишимден заман хапар айтыр.
Кёлде сюймеклигим туугьан элиме
Эртде кеч болса да туура къайтыр.

Булут болгьан суу джауум болуб
Къайтхан кибик туугьан джерине. ...
Къызгьан бетими турама тутуб,
Кесмезни салкъын ургьан джелине.
 
 
 
#27
Джаратама0
13.04.2011 00:55:38
Ёмюрюнг узакъ болсун джуртну джаннгыз тереги Туугьан кюнюнг бла алгышлайма
 
 
 
#28
Джаратама0
13.04.2011 01:11:39
Алгъышлагъа къошулама!
 
 
 
#29
Джаратама0
13.04.2011 01:55:14
Ocean

Алгъыш биргеди. Джууукъда узакъладан эсе, узакъда джууукъла ашхы.

ТАУ бла ТЕНГИЗ

Тенгизге къараб, агъарады Тау,
Тансыкълай Тауну, чайкъалады Тенгиз.
Кюн сайын сынаса да джашау,
Бу дунияны сюебиз кемсиз.

Булутдан кёрюнмесе Тау,
Бютюн къайгъылы болады Тенгиз.
Эшитеме тилегин аны:
Къойма, Аллах, джууукъсуз, тенгсиз.

Джуртубуз, тилибиз да сау,
Насыблы адамлабыз биз.
Мийикде агъарады Тау,
Тёбенде рахатды тенгиз.
 
 
 
#30
Джаратама0
13.04.2011 02:08:16
мики

Сау бол. "Иги сёзге багъа джетмез". Сиз сёзюгюз бла, ишигиз бла да бу назмучукъда айтылгъанны къатлайсыз:

ПУТИ К СПАСЕНИЮ

Можно спастись
Зарывшись в землю,
А можно научиться летать...
 
 
 
#31
Джаратама0
13.04.2011 02:19:44
ALANULAN

Алейкум ас-салам, къарнаш! Къарачай-Малкъар Элни туугъан, джангыргъан Кюнюне къууанч бла джетейик.

КЪАЛАМ бла КИТАБ

Излей эсенг джашарын
Сен бек сюйген Къарачай,
Хакъ бла бир эт джазыуун,
Къара таны(т), къара джай.

Юс да, кёл да толуду
Минг-минг джарадан, табдан.
Себеб джолу ? туруду:
Ол ? Къалам бла Китабдан.

Хакъ сёз бла Акъ сёздю
Къайтарлыкъ хакъыбызны.
Къалам бла Китабды
Къутхарлыкъ халкъыбызны.
 
 
 
#32
Джаратама0
13.04.2011 02:30:25
Кергелен

Сау бол. Халкъыбыз деген адамланы барына да Аллах кюч берсин. Халкъыбыз а къаллай болгъанын бу тизгинледе айтыргъа кюрешгенме:

ТАУЛУ

Чыбыкълыкъда да излелле,
Сюйгенлерича бюгерге -
Бугъоуларын да юзюб,
Дагъыда сюелдим ёрге.

Энтда излейле бюгерге,
Къолларындан а келмез -
Чыбыкълыкъда бюгюлмеген,
Къазыкълыкъда бюгюлмез.
 
 
 
#33
Джаратама0
13.04.2011 02:40:47
tenebek

Халкъыбызгъа бек къайгъыргъан адам, Аллах разы болсун санга! Алгъышлыкъ бол. Сеничала кёбюрек болсала эди, Джуртха, Халкъгъа къоркъуу болмаз эди.

АЙРЫМКАН

Тенгизни арасында айрымкан,
Къыйынмы эди сеннге суудан айырылгьан?
Къыйынмыды тенгизге къайырылгъан?
Тенгизни арасында айрымкан.
 
 
 
#34
Джаратама0
13.04.2011 02:51:05
Azamat_SPb

Сау бол. Джуртубуз-Халкъыбыз ючюн къолдан келгенни эте барырча, Аллах кюч берсин.

ДЖУРТУМ

Джурт!
Бизге сени сууунг да ? джууурт,
Хауанг да ? джууурт.

Джуртум ? Джыртум.
Джур-тум. Джыр-тум.
Тум ала, тум къара
Алан Джуртум, Къарачай-Малкъар джуртум!
Акъ кечем, къара кюнюм да,
Акъ бёркюм, къара чебгеним да ?
Ислам динли, тюрк тилли Кавказ джуртум.

Ит-тил-чапырагъынг да бола,
Джазыу-Тил-чапырагъынг да бола,
Бёрю ауузун байлагъан сёзюнг да бола,
Хазырларынгда бир огъунг да бола,
Джашайма.

Джуртум ? джырым, тилегим, дууам да мени.
Тауум да ? Минги, кёлюм да ? минги.
Кёз байлай, келсе уа ингир ?
Айырылмаздан къучакъларыкъма сени,
Минги джуртум, джандет джуртум мени.
 
 
 
#35
Джаратама0
13.04.2011 08:08:43
Sabr
Мени назмум да джараса алай,
Андан уллу насыб керек тюл эди манга,
Не этсенг да эт, джоралаб алай......
Хар зат да турады мени эсимде,
Гошаях къала къаяда тургьанча.
Къарайма къууанч берген элиме,
Бола, дуниягъа джангыдан туугьанча.
Машалла, баракалла
Элибиз а къуралгъанлы джюз джылгъа да бармазгъа башлагъанды. хар ким юйлерин чачдырыб мюиюшлерн тракторбла, ачха алыр ючюн. Ол ачханы джойдула, джуртсуз къалдыла. сорауа... эбзелени Манаф аитханлай, скоро шлагбаум салыб, ачха алыб ётдюрлюкдюле ары, ким болса да алыб-деб. Ангыламайдыла да, къаллай курорт джерден, таза хауадан, кирсиз сууладан къуру къала тургъанларын.
дуния ачхагъа алданганды да бошагъанды. да не этеийк, Аллах игисин буюрсун. Сиз да къайда болсагъыз да, Аллах болсун нёгеригиз, хар атлагъан атламыгъыз онгуна болсун!
 
 
 
#36
Джаратама0
13.04.2011 15:03:04
Салам, Билал !
Аллах этген муратларынга джетдирсин !!!!!!!!!!!!!!!!!!!!!!!!!!

Билалгъа.

Заман а - бешли бугъа.
Заман - сарыубек.
Тохтаусуз алгъа къууа
Арытды бир бек.

Сени сюрюб не табды?
Тёкдю ол терин.
Аны бла да къалмады,
Арытды кесин.

Андан къачыб не табдынг?
Неге да ЧЫДАМ.
Къоркъутмаз ахыр ахынг
Чыгъа башлаб джан.

Къайда джашасанг да Къууанч бла Джаша!!!

Сапар Ёзден. Басханстан. Турна Аууш.
 
 
 
#37
Джаратама0
13.04.2011 19:49:14
ШАТ

Алейкум салам, Сапар. Сау бол. Алгъыш биргеди.

* * *

Тау башында улуйду Бёрю,
Тенгиз джагъада эшитеме аны.
Къобан суу да энеди бери ?
Тенгиз джутад деб къоркъама аны.

?Кючлерле да тауланы итле?,-
Ангылайма да къоркъууун Бёрюню,
Къарагъанлай турама Кёкге,
Не айтырын сакълаб Тейрини.

Барс бла Бёрю Тюрк тауну сакълайла.
Тенгиз джагъасын сакълайма мен.
Таугъа къайытыр кюнлени санайма,
Къайытырыкъма, болсам сау-эсен.

Ызчы итле сакълайла чекни,
Тауда, тюзде да джетишелле ала.
Не айтырын сакълайма Кёкню,
Кече-кюн да турама къараб.

Мен ? Тейри адамы ? Тейри буюрмай,
Кеси аллыма бир оноу этмем.
Къазакъ Бёрю, сен да кёб улума ?
Кёкню, джерни да уятханса сен.

Къазакъ Бёрю, борчунгдан чыкъгъанса.
Ёрге турургъа унамай эсе халкъ,
Хакъ бла болургъа унамай эсе халкъ ?
Сора, излейди болургъа талкъ.

Ёлюрге излегенни тыяллыкъ тюлсе,
Не этгин, халкъ кеси да этмесе мадар.
Ёзге, Бё́рю, сен тохтарыкъ тюлсе,-
Сени алай джаратханды къадар.

Сени улуууунг, джортууунг тохтагъан кюн
Келликди къауумунга ёлюм.
Ары дери халкъгъа ёлюм джокъду,
Итлеге къаллыкъ тюлдю Элинг.

Улу, Бёрю, уят тюзлени, тауланы да.
Къалтырат амантишлени, джауланы да.
Кёб турмай мен да къошуллукъма санга.
Бу назмум да шагъатды анга.

Эсен кёрюшейик ЁЗДЕН улу Сапар шохум.
 
 
 
#38
Джаратама0
13.04.2011 20:03:11
Алгъышлайма!
Аллах этген муратларыгъызгъа джетдирсин!
 
 
 
#39
Джаратама0
13.04.2011 20:11:00
Алгъышлайма! Аллах саулукъдан, насыпдан айырмасын, этген муратларыгъызны толтурсун!
 
 
 
#40
Джаратама0
13.04.2011 22:36:05
Я и не знал, поздравляя Билала, что он и не ведает о столь лестном обширном исследовании его творчества, неизвестным Мерайли, да ещё и с переводами на английский. Получается, что, хотя и не любит Билал дни рождения, я сделал ему поздравление с неожиданным сюрпризом. Сегодня мне известно, что Мерайли, сделавший столь тонкое и глубокое исследование, отрывок из которого я приводил, это критик, переводчик и поэт Павел Иванов.
 
 
 
#41
Джаратама0
13.04.2011 22:39:56
Багъалы, Билал!
Хоншу Элтаркъачыдан Къызыл-Къалачыгъа уллу салам. Сабийликде эгечими гардош салыууна, чагасына кёб джюрюгенме Къызыл-Къалагъа. Анда да барды мени, бюгюн узакъдан тансыкълагъан, сюйген джерчиклерим. Кесими элими не ариу кёрсем да, Къызыл-къаланы табихаты кесича бир тюрлю, башха тюрлю аламат...
Менда ол ?день рождениялангы? сюймеученме. Алай а, алгъышлайма бек сюйюб туугъан кюнюнг бла.
Сени уллу умутларынг бизни халкъыбызны умутларыдыла. Аллах айтыб, ала толуб бизни барыбызгъада бир уллу къуанчлыкъ келсин.
Халкъны барысына да, айырмай хар бир адамына да, болушургъа ачылыб тургъан сескегли, берекетли джюрегинге шошлукъ, рахатлыкъ тилейме Аллахдан.
 
 
 
#42
Джаратама0
13.04.2011 23:12:30
Къара благъа всезнайка бла Берекет кеслериники этдиле да къойдула Билялны.Гитче Къарачайгъа отношениясы болмагъанча?! Берекет,мен а къарт анам бла Билялны атасына хычынла да алыб къол тутаргъа барыб тургъанма ораза бла Къурманда!
Билял,менге да джазмасанг назму ёпкелей башлагъанма)))
 
 
 
#43
Джаратама0
13.04.2011 23:34:18
Кёп джаша Билал Лайпан! Саулукла, куанчла. Тюшлерин, тилеклерин кабул болур иншаАллах. Алайла Аланланы кюнлери де джарыктан джарык болур.
 
 
 
#44
Джаратама0
14.04.2011 00:23:01
Барс бла Бёрю Тюрк тауну сакълайла.
Тенгиз джагъасын сакълайма мен.
Таугъа къайытыр кюнлени санайма,
Къайытырыкъма, болсам сау-эсен.

Барс бла Бёрю Сабр бла ШАТ Аламат назму. Машаллах.
 
 
 
#45
Джаратама0
14.04.2011 02:17:09
Неуловимая
Tusen takk! - минг сау бол.

* * *

Бир Терекденбиз барыбыз да биз:
Аты болса да Джангыз, Раубазы...
Болса да къыш, келсе да кюз,
Джуртну джашилди бизге ауазы.

Бир Ташданбыз барыбыз да биз:
Аты болса да Къара не Къадау.
Тейрини атлары боладыла джюз ?
Барына да салабыз махтау.

Динни, Тилни, Джуртну да берген
Бир Аллахха салабыз махтау.
Къуралгъынчы Къарачай-Малкъар Эл ? Барс Эл,
Къызгъа, джашха да джокъ арыу-тохтау...
 
 
 
#46
Джаратама0
14.04.2011 02:29:26
Dalila

Сау бол. Барыбыз да къууаныр кюнле алдадыла.

* * *

Кимден чыкъса да кёлюнг,
Туугъан джерингден чыкъмаз.
Кёк бла Джерни чеги ?
Ата джуртубуз Кавказ.

Къындан чыкъгъан къылышча,
Тау джитиле да алай.
Суула да джанкъылышча...
Джандет - Малкъар-Къарачай.

Ариулукъ бла хазнадан
Байды джерибиз бизни.
Бу тауладан, сууладан,
Аллах, айырма бизни.
 
 
 
#47
Джаратама0
14.04.2011 03:02:21
Берекет

Салам! Сени сёзюнгю мен бек багъалатама. Суратлау сёзню сенича терен ангылагъан азды. Адабият-литература джол бла баргъан болсанг эди - культурабызгъа уллу хайырынг тиерик эди. Ууакъ-ууакъ тырнагъан затларынгы бир джерге джыя, джарашдыра барыб, бир китаб этиб да чыгъарырса деб умут этеме. Асхатны джазгъанларын, биографиясын да джыйыугъа кёб къыйынынг кетгенди - ала да тас болмазла, инша Аллах. Аллахха аманат бол.

* * *

Бу назму джыйым тюлдю,
Джыйын джанлыды бу.
Джыйын джанлы да тюлдю,
Къазакъ бёрюдю бу.

Бу назму джыйым тюлдю,
Джашил чегетди бу.
Джашил чегет да тюлдю,
Джангыз Терекди бу.

Бу назму джыйым тюлдю,
Таш къалауду бу.
Таш къалау да тюлдю,
Къадау Ташды бу.

Бу назму джыйым тюлдю,
Нарт джылкъыды бу.
Нарт джылкъы да тюлдю,
Боракъ атды бу.

Бу назму джыйым тюлдю,
Халкъгъа сёзюмдю бу.
Халкъгъа сёзюм да тюлдю,
Мени ёзюмдю бу.

Бу назму джыйым тюлдю,
Мени дуниямды бу.
Дуниям бла къалмай,
Мени ахратымды бу.

Бу назму джыйым тюлдю,
Халкъ джыйылыуду бу.
Халкъ джыйылыу да тюлдю,
Джангыз адамды бу.

Бу назму джыйым тюлдю,
Джер бла Кёкдю бу.
Джер да, Кёк да тюлдю,
Ачыкъ джюрекди бу.
 
 
 
#48
Джаратама0
14.04.2011 03:16:10
Tinibek

Узакъда джууугъум, Тюркде къарнашым! Сау бол иги сёзлеринг ючюн.
Къарачай-Малкъар Эл джангыдан къуралыб, аны дуниягъа джангыдан туугъанын кёрюб къууанырча этсин Аллах барыбызны да. Эсен бол.

* * *

Тауда, тюзде ? къайда
Болсам да кесим,
Эсим а, эсим ?
Джети къат Кёкдеди.
Башха зат неди
Аны къатында?

Джер
Къаллай бир тарта эсе
Санымы джерге,
Кёк да
Аллай бир тартады
Джанымы ёрге ?

Абынсам да,
Къоймай джыгъылыргъа,
Къаратады
Ай бла джулдузгъа.

Тёнгегим тюшерик
Джерге да,
Джаным кетерик
Кёкге да,

Этеме сагъыш,
Этеме алгъыш.
Джашайбызмы
Джетмезча къаргъыш?

Ахырзаман
Келирми, келмезми?
Адам улу
Ёлюрмю, ёлмезми?

Ахыр
Келликди къайдан,
Чыгъарыкъды къайдан ?
Кёкденми, Джерденми,
Огъесе,
Адамны кесинденми?

Къарайма ёрге,
Къарайма джерге.
Ай бла джулдуз ?
Сын ташда, Кёкде.

Соруу бла джууаб ?
Джашау бла ёлюм.
Алай а рахат
Болмайды кёлюм.

Огъай, бошалмаз
Джашау ёлюм бла.
Айтама муну
Сабийча, кёлюм бла.

Тейри адамы ?
Къарайма Кёкге.
Излей андан
Себеб джюрекге.

Къазакъ джюрекден
Улуйду бёрю.
Эшитеди аны
Адам тюл, Тейри.

Кесимме джолда,
Алай тюлме джангыз:
Джарытады джолну
Джангы Ай бла джулдуз.
 
 
 
#49
Джаратама0
14.04.2011 04:04:30
Nurgan
Кертисин айтсам:

Мен туугъанма Къыргъызстанда, Коксайда.
Мен ёсгенме Къызыл-Къалада, Къарачайда.
Джашагъанма Гитче Къарачайда, Москвада.
Энди джашайма Шимал тенгизни джагъасында - бузлада.
Ахыр джуртум а - назму сёзюм боллукъду...

АДАМ КЪАТЫНДА ЁЛМЕЙДИ АДАМ

Къыйынмыды санга?
Кёлню аман этме.
Адам къатында ёлмейди адам.
Ананг, эгечинг, тенгинг эсе да,
Билмей эсенг да, болур къайгьыргьан.

Мени ангылагьан джокъду да, деме,
Ангылагьан да болур, ангыламагьан да чыгьар.
Кеси кесинги джокъгьа да тергеме,
Сеннге керекли, сен керекли да бар.

Къыйынмыды санга?
Кёлюнгю аз этме.
Гитче, уллу джокъду. Барды адам!
Сен, дуниягьа, джашаугьа келген,
Керекли болуб келгенсе, ийнан!
 
 
 
#50
Джаратама0
14.04.2011 11:19:07
Сау бол, Sabr!
Джарсыуубуз, къуанчыбызда биргелейди.


Эртден ашхы, Nurgan!

Палахгъа къалыргъа башлагъанбыз Билалны юлеше.
Мен артха туракълайым да сеирге бир къарайым. Юлешигиз всезнайка бла сен. Всезнайка (всезнайкады да!) бир зат билиб, айтыр сёз табыб, къаршчы тураллыкъ болур санга.

Сау бол, джарыкъ эгечим, кюлдюрдюнг.
 
 
 
Страницы: Пред. 1 2 3 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2022 Elbrusoid.org  |  Все права защищены Законами Гор.