Эльбрусоид :: Форум :: С днем рождения, БИЛЯЛ!

Аджашхан тёгерек айланыр.
Зар адамны насыбы болмаз.
Адеб базарда сатылмаз.
Къууут – джелге, берне – бошха.
Уллу къашыкъ эрин джыртар.
Ана къойну – балагъа джандет.
Тюзлюк шохлукъну бегитир.
Эте билген, этген этеди, эте билмеген, юретген этеди!
Ашлыкъны арба юйге келтирир, чана базаргъа элтир.
Босагъа таш юйге кирмей эди, тыбыр таш эшикге чыкъмай эди.
Джетген къыз джерли эшекни танымаз.
Ана къолу ачытмаз.
Сёз сёзню айтдырыр.
Чабакъгъа акъыл, табагъа тюшсе келеди.
Ишин билген, аны сыйын чыгъарады.
Ачлыкъда тары гырджын халыуадан татлы.
Босагъагъа джууукъ орун болса, ашыгъыб тёрге озма.
Джуртун къоругъан озар.
Билгенни къолу къарны джандырыр.
Экеулен сёлеше тура эселе, орталарына барыб кирме.
Ёпкелегенни ашы татлы болады.
От кюйдюрген, сау болса да, тот кюйдюрген, сау болмаз.
Джашлыкъ этмеген, башлыкъ этмез.
Эки ойлашыб, бир сёлешген.
Ишленмеклик адамлыкъды.
Аз сёлешген, къайгъысыз турур.
Душманны тышы – акъ, ичи – къара.
Тау башында, тау болмаз, джангыз терек, бау болмаз.
Тойгъа алгъа да барма, тойда артха да къалма.
Ишлемеген – тишлемез.
Адам бла мюлк юлешмеген эсенг, ол адамны билиб бошагъанма, деб кесинги алдама.
Баланы адам этген анады.
Иши джокъну, сыйы джокъ.
Уллу къазанда бишген эт, чий къалмаз.
Тамчы таш тешер.
Тай асырагъан, атха минер.
Къыз келсе, джумуш эте келеди, къатын келсе, ушакъ эте келеди.
Чомарт бергенин айтмаз.
Уллу суу бла уллу ауруудан башынгы сакъла.
Мал тутхан – май джалар.
Хар ишни да аллы къыйынды.
Оюмсуз атлагъан, аджалсыз ёлюр.
Тенги кёбню джау алмаз, акъылы кёбню дау алмаз.
Арба аугъандан сора, джол кёргюзтюучю кёб болур.
Къатын къылыкъсыз, эр тынчлыкъсыз.
Магъанасыз сёз – тауушсуз сыбызгъы.
Сёлеш деб шай берген, тохта деб, сом берген.
Ачыу алгъа келсе, акъыл артха къалады.
Булут кёкге джарашыу, уят бетге джарашыу.
Ауурну тюбю бла, дженгилни башы бла джюрюген.

RSS

С днем рождения, БИЛЯЛ!

Sabr

Гость

#26

Джаратама0

13.04.2011 03:44:56

всезнайка

Бек сау бол, Къызыл-Къалачы эгешчигим. Сени да, Сестренканы да форумда эслегенлей, элибиз эсге тюшюб къалады. Бу назмучукъ да, 1970-чи джыллада мен школну таууса, джазылгъанды. Ол заманда элибизге кёб хайырым тиерикди деб тура эдим. Элни чачылыб кетерин, школгъа джюрюрге да хазна сабий табылмай къаллыгъын билмей эдим...

КЪЫЗЫЛ-КЪАЛА

Кюнбетни ташлары ушайла нечик
Шыпан къойлагьа, джайылыб тургьан.
Къаялары да ? къонгур ёгюзлеге,
"Пуф" деб джатыб, кюушене тургьан.

Былайда къарт-джаш да таныйды мени,
Хансха-ташха да къууанады джюрек.
Кесими Сосуркъача кёреме мында,
Балакъ тюбюм бла ёталмаса да джюджек.

Терсими, тюзюмю да кёргюзтген кюзгю,
Тау элим турады мени къучакълай.
Къара ханслай джагъылады аппаны сёзю,
Амманы сёзю да ? ит тил чапыракълай.

Эсимдеди: къаягьа ёрлей, джыгъылыб,
Мен аягъымы сындыргьанымда,
Аппа сылаб, къара ханс джагьыб
Байлагьан эди, сора къатымда

Эски джырланы джырлай эди ол:
Джукъласанг, илгенмезге амал джокъ,
Илгенсенг а ? сыланнгандан хайыр джокъ,
Дей, сыннганымы тюз къайнатхан эди ол.

Джюреги ачыгьаннга, кёлю сыннганнга
Мени назмум да джараса алай,
Андан уллу насыб керек тюл эди манга,
Не этсенг да эт, джоралаб алай...

...Хар зат да турады мени эсимде,
Гошаях къала къаяда тургьанча.
Къарайма къууанч берген элиме,
Бола, дуниягъа джангыдан туугьанча.

Маллагъа суу иче турургьа тегене
Джарашдыргьан чакълы бир затха ?
Не бла джарадынг туугьан элинге??
Деб, меннге тюбеб соргьан къартха,

Не джууаб къайтаралайым мен?
Бери келишмейле ууакъ сылтаула...
Мында туурады ишинг, иннетинг,
Къаяла тургьанча кёзге туура.

Хоу, мени айтырча этгеним джокъ,
Мени ишимден заман хапар айтыр.
Кёлде сюймеклигим туугьан элиме
Эртде кеч болса да туура къайтыр.

Булут болгьан суу джауум болуб
Къайтхан кибик туугьан джерине. ...
Къызгьан бетими турама тутуб,
Кесмезни салкъын ургьан джелине.

tenebek Гость	#27 Джаратама0 13.04.2011 03:55:38 Ёмюрюнг узакъ болсун джуртну джаннгыз тереги Туугьан кюнюнг бла алгышлайма

Azamat_SPb Гость	#28 Джаратама0 13.04.2011 04:11:39 Алгъышлагъа къошулама!

Sabr

Гость

#29

Джаратама0

13.04.2011 04:55:14

Ocean

Алгъыш биргеди. Джууукъда узакъладан эсе, узакъда джууукъла ашхы.

ТАУ бла ТЕНГИЗ

Тенгизге къараб, агъарады Тау,
Тансыкълай Тауну, чайкъалады Тенгиз.
Кюн сайын сынаса да джашау,
Бу дунияны сюебиз кемсиз.

Булутдан кёрюнмесе Тау,
Бютюн къайгъылы болады Тенгиз.
Эшитеме тилегин аны:
Къойма, Аллах, джууукъсуз, тенгсиз.

Джуртубуз, тилибиз да сау,
Насыблы адамлабыз биз.
Мийикде агъарады Тау,
Тёбенде рахатды тенгиз.

Sabr Гость	#30 Джаратама0 13.04.2011 05:08:16 мики Сау бол. "Иги сёзге багъа джетмез". Сиз сёзюгюз бла, ишигиз бла да бу назмучукъда айтылгъанны къатлайсыз: ПУТИ К СПАСЕНИЮ Можно спастись Зарывшись в землю, А можно научиться летать...

Sabr

Гость

#31

Джаратама0

13.04.2011 05:19:44

ALANULAN

Алейкум ас-салам, къарнаш! Къарачай-Малкъар Элни туугъан, джангыргъан Кюнюне къууанч бла джетейик.

КЪАЛАМ бла КИТАБ

Излей эсенг джашарын
Сен бек сюйген Къарачай,
Хакъ бла бир эт джазыуун,
Къара таны(т), къара джай.

Юс да, кёл да толуду
Минг-минг джарадан, табдан.
Себеб джолу ? туруду:
Ол ? Къалам бла Китабдан.

Хакъ сёз бла Акъ сёздю
Къайтарлыкъ хакъыбызны.
Къалам бла Китабды
Къутхарлыкъ халкъыбызны.

Sabr

Гость

#32

Джаратама0

13.04.2011 05:30:25

Кергелен

Сау бол. Халкъыбыз деген адамланы барына да Аллах кюч берсин. Халкъыбыз а къаллай болгъанын бу тизгинледе айтыргъа кюрешгенме:

ТАУЛУ

Чыбыкълыкъда да излелле,
Сюйгенлерича бюгерге -
Бугъоуларын да юзюб,
Дагъыда сюелдим ёрге.

Энтда излейле бюгерге,
Къолларындан а келмез -
Чыбыкълыкъда бюгюлмеген,
Къазыкълыкъда бюгюлмез.

Sabr

Гость

#33

Джаратама0

13.04.2011 05:40:47

tenebek

Халкъыбызгъа бек къайгъыргъан адам, Аллах разы болсун санга! Алгъышлыкъ бол. Сеничала кёбюрек болсала эди, Джуртха, Халкъгъа къоркъуу болмаз эди.

АЙРЫМКАН

Тенгизни арасында айрымкан,
Къыйынмы эди сеннге суудан айырылгьан?
Къыйынмыды тенгизге къайырылгъан?
Тенгизни арасында айрымкан.

Sabr

Гость

#34

Джаратама0

13.04.2011 05:51:05

Azamat_SPb

Сау бол. Джуртубуз-Халкъыбыз ючюн къолдан келгенни эте барырча, Аллах кюч берсин.

ДЖУРТУМ

Джурт!
Бизге сени сууунг да ? джууурт,
Хауанг да ? джууурт.

Джуртум ? Джыртум.
Джур-тум. Джыр-тум.
Тум ала, тум къара
Алан Джуртум, Къарачай-Малкъар джуртум!
Акъ кечем, къара кюнюм да,
Акъ бёркюм, къара чебгеним да ?
Ислам динли, тюрк тилли Кавказ джуртум.

Ит-тил-чапырагъынг да бола,
Джазыу-Тил-чапырагъынг да бола,
Бёрю ауузун байлагъан сёзюнг да бола,
Хазырларынгда бир огъунг да бола,
Джашайма.

Джуртум ? джырым, тилегим, дууам да мени.
Тауум да ? Минги, кёлюм да ? минги.
Кёз байлай, келсе уа ингир ?
Айырылмаздан къучакъларыкъма сени,
Минги джуртум, джандет джуртум мени.

всезнайка

Гость

#35

Джаратама0

13.04.2011 11:08:43

Sabr
Мени назмум да джараса алай,
Андан уллу насыб керек тюл эди манга,
Не этсенг да эт, джоралаб алай......
Хар зат да турады мени эсимде,
Гошаях къала къаяда тургьанча.
Къарайма къууанч берген элиме,
Бола, дуниягъа джангыдан туугьанча.
Машалла, баракалла

Элибиз а къуралгъанлы джюз джылгъа да бармазгъа башлагъанды. хар ким юйлерин чачдырыб мюиюшлерн тракторбла, ачха алыр ючюн. Ол ачханы джойдула, джуртсуз къалдыла. сорауа... эбзелени Манаф аитханлай, скоро шлагбаум салыб, ачха алыб ётдюрлюкдюле ары, ким болса да алыб-деб. Ангыламайдыла да, къаллай курорт джерден, таза хауадан, кирсиз сууладан къуру къала тургъанларын.
дуния ачхагъа алданганды да бошагъанды. да не этеийк, Аллах игисин буюрсун. Сиз да къайда болсагъыз да, Аллах болсун нёгеригиз, хар атлагъан атламыгъыз онгуна болсун!

ШАТ

Гость

#36

Джаратама0

13.04.2011 18:03:04

Салам, Билал !
Аллах этген муратларынга джетдирсин !!!!!!!!!!!!!!!!!!!!!!!!!!

Билалгъа.

Заман а - бешли бугъа.
Заман - сарыубек.
Тохтаусуз алгъа къууа
Арытды бир бек.

Сени сюрюб не табды?
Тёкдю ол терин.
Аны бла да къалмады,
Арытды кесин.

Андан къачыб не табдынг?
Неге да ЧЫДАМ.
Къоркъутмаз ахыр ахынг
Чыгъа башлаб джан.

Къайда джашасанг да Къууанч бла Джаша!!!

Сапар Ёзден. Басханстан. Турна Аууш.

Sabr

Гость

#37

Джаратама0

13.04.2011 22:49:14

ШАТ

Алейкум салам, Сапар. Сау бол. Алгъыш биргеди.

* * *

Тау башында улуйду Бёрю,
Тенгиз джагъада эшитеме аны.
Къобан суу да энеди бери ?
Тенгиз джутад деб къоркъама аны.

?Кючлерле да тауланы итле?,-
Ангылайма да къоркъууун Бёрюню,
Къарагъанлай турама Кёкге,
Не айтырын сакълаб Тейрини.

Барс бла Бёрю Тюрк тауну сакълайла.
Тенгиз джагъасын сакълайма мен.
Таугъа къайытыр кюнлени санайма,
Къайытырыкъма, болсам сау-эсен.

Ызчы итле сакълайла чекни,
Тауда, тюзде да джетишелле ала.
Не айтырын сакълайма Кёкню,
Кече-кюн да турама къараб.

Мен ? Тейри адамы ? Тейри буюрмай,
Кеси аллыма бир оноу этмем.
Къазакъ Бёрю, сен да кёб улума ?
Кёкню, джерни да уятханса сен.

Къазакъ Бёрю, борчунгдан чыкъгъанса.
Ёрге турургъа унамай эсе халкъ,
Хакъ бла болургъа унамай эсе халкъ ?
Сора, излейди болургъа талкъ.

Ёлюрге излегенни тыяллыкъ тюлсе,
Не этгин, халкъ кеси да этмесе мадар.
Ёзге, Бё́рю, сен тохтарыкъ тюлсе,-
Сени алай джаратханды къадар.

Сени улуууунг, джортууунг тохтагъан кюн
Келликди къауумунга ёлюм.
Ары дери халкъгъа ёлюм джокъду,
Итлеге къаллыкъ тюлдю Элинг.

Улу, Бёрю, уят тюзлени, тауланы да.
Къалтырат амантишлени, джауланы да.
Кёб турмай мен да къошуллукъма санга.
Бу назмум да шагъатды анга.

Эсен кёрюшейик ЁЗДЕН улу Сапар шохум.

Неуловимая Гость	#38 Джаратама0 13.04.2011 23:03:11 Алгъышлайма! Аллах этген муратларыгъызгъа джетдирсин!

Dalila Гость	#39 Джаратама0 13.04.2011 23:11:00 Алгъышлайма! Аллах саулукъдан, насыпдан айырмасын, этген муратларыгъызны толтурсун!

Берекет

Гость

#40

Джаратама0

14.04.2011 01:36:05

Я и не знал, поздравляя Билала, что он и не ведает о столь лестном обширном исследовании его творчества, неизвестным Мерайли, да ещё и с переводами на английский. Получается, что, хотя и не любит Билал дни рождения, я сделал ему поздравление с неожиданным сюрпризом. Сегодня мне известно, что Мерайли, сделавший столь тонкое и глубокое исследование, отрывок из которого я приводил, это критик, переводчик и поэт Павел Иванов.

Берекет

Гость

#41

Джаратама0

14.04.2011 01:39:56

Багъалы, Билал!
Хоншу Элтаркъачыдан Къызыл-Къалачыгъа уллу салам. Сабийликде эгечими гардош салыууна, чагасына кёб джюрюгенме Къызыл-Къалагъа. Анда да барды мени, бюгюн узакъдан тансыкълагъан, сюйген джерчиклерим. Кесими элими не ариу кёрсем да, Къызыл-къаланы табихаты кесича бир тюрлю, башха тюрлю аламат...
Менда ол ?день рождениялангы? сюймеученме. Алай а, алгъышлайма бек сюйюб туугъан кюнюнг бла.
Сени уллу умутларынг бизни халкъыбызны умутларыдыла. Аллах айтыб, ала толуб бизни барыбызгъада бир уллу къуанчлыкъ келсин.
Халкъны барысына да, айырмай хар бир адамына да, болушургъа ачылыб тургъан сескегли, берекетли джюрегинге шошлукъ, рахатлыкъ тилейме Аллахдан.

Nurgan

Гость

#42

Джаратама0

14.04.2011 02:12:30

Къара благъа

всезнайка бла Берекет кеслериники этдиле да къойдула Билялны.Гитче Къарачайгъа отношениясы болмагъанча?! Берекет,мен а къарт анам бла Билялны атасына хычынла да алыб къол тутаргъа барыб тургъанма ораза бла Къурманда!
Билял,менге да джазмасанг назму ёпкелей башлагъанма)))

Tinibek Гость	#43 Джаратама0 14.04.2011 02:34:18 Кёп джаша Билал Лайпан! Саулукла, куанчла. Тюшлерин, тилеклерин кабул болур иншаАллах. Алайла Аланланы кюнлери де джарыктан джарык болур.

Tinibek Гость	#44 Джаратама0 14.04.2011 03:23:01 Барс бла Бёрю Тюрк тауну сакълайла. Тенгиз джагъасын сакълайма мен. Таугъа къайытыр кюнлени санайма, Къайытырыкъма, болсам сау-эсен. Барс бла Бёрю Сабр бла ШАТ Аламат назму. Машаллах.

Sabr

Гость

#45

Джаратама0

14.04.2011 05:17:09

Неуловимая
Tusen takk! - минг сау бол.

* * *

Бир Терекденбиз барыбыз да биз:
Аты болса да Джангыз, Раубазы...
Болса да къыш, келсе да кюз,
Джуртну джашилди бизге ауазы.

Бир Ташданбыз барыбыз да биз:
Аты болса да Къара не Къадау.
Тейрини атлары боладыла джюз ?
Барына да салабыз махтау.

Динни, Тилни, Джуртну да берген
Бир Аллахха салабыз махтау.
Къуралгъынчы Къарачай-Малкъар Эл ? Барс Эл,
Къызгъа, джашха да джокъ арыу-тохтау...

Sabr

Гость

#46

Джаратама0

14.04.2011 05:29:26

Dalila

Сау бол. Барыбыз да къууаныр кюнле алдадыла.

* * *

Кимден чыкъса да кёлюнг,
Туугъан джерингден чыкъмаз.
Кёк бла Джерни чеги ?
Ата джуртубуз Кавказ.

Къындан чыкъгъан къылышча,
Тау джитиле да алай.
Суула да джанкъылышча...
Джандет - Малкъар-Къарачай.

Ариулукъ бла хазнадан
Байды джерибиз бизни.
Бу тауладан, сууладан,
Аллах, айырма бизни.

Sabr

Гость

#47

Джаратама0

14.04.2011 06:02:21

Берекет

Салам! Сени сёзюнгю мен бек багъалатама. Суратлау сёзню сенича терен ангылагъан азды. Адабият-литература джол бла баргъан болсанг эди - культурабызгъа уллу хайырынг тиерик эди. Ууакъ-ууакъ тырнагъан затларынгы бир джерге джыя, джарашдыра барыб, бир китаб этиб да чыгъарырса деб умут этеме. Асхатны джазгъанларын, биографиясын да джыйыугъа кёб къыйынынг кетгенди - ала да тас болмазла, инша Аллах. Аллахха аманат бол.

* * *

Бу назму джыйым тюлдю,
Джыйын джанлыды бу.
Джыйын джанлы да тюлдю,
Къазакъ бёрюдю бу.

Бу назму джыйым тюлдю,
Джашил чегетди бу.
Джашил чегет да тюлдю,
Джангыз Терекди бу.

Бу назму джыйым тюлдю,
Таш къалауду бу.
Таш къалау да тюлдю,
Къадау Ташды бу.

Бу назму джыйым тюлдю,
Нарт джылкъыды бу.
Нарт джылкъы да тюлдю,
Боракъ атды бу.

Бу назму джыйым тюлдю,
Халкъгъа сёзюмдю бу.
Халкъгъа сёзюм да тюлдю,
Мени ёзюмдю бу.

Бу назму джыйым тюлдю,
Мени дуниямды бу.
Дуниям бла къалмай,
Мени ахратымды бу.

Бу назму джыйым тюлдю,
Халкъ джыйылыуду бу.
Халкъ джыйылыу да тюлдю,
Джангыз адамды бу.

Бу назму джыйым тюлдю,
Джер бла Кёкдю бу.
Джер да, Кёк да тюлдю,
Ачыкъ джюрекди бу.

Sabr

Гость

#48

Джаратама0

14.04.2011 06:16:10

Tinibek

Узакъда джууугъум, Тюркде къарнашым! Сау бол иги сёзлеринг ючюн.
Къарачай-Малкъар Эл джангыдан къуралыб, аны дуниягъа джангыдан туугъанын кёрюб къууанырча этсин Аллах барыбызны да. Эсен бол.

* * *

Тауда, тюзде ? къайда
Болсам да кесим,
Эсим а, эсим ?
Джети къат Кёкдеди.
Башха зат неди
Аны къатында?

Джер
Къаллай бир тарта эсе
Санымы джерге,
Кёк да
Аллай бир тартады
Джанымы ёрге ?

Абынсам да,
Къоймай джыгъылыргъа,
Къаратады
Ай бла джулдузгъа.

Тёнгегим тюшерик
Джерге да,
Джаным кетерик
Кёкге да,

Этеме сагъыш,
Этеме алгъыш.
Джашайбызмы
Джетмезча къаргъыш?

Ахырзаман
Келирми, келмезми?
Адам улу
Ёлюрмю, ёлмезми?

Ахыр
Келликди къайдан,
Чыгъарыкъды къайдан ?
Кёкденми, Джерденми,
Огъесе,
Адамны кесинденми?

Къарайма ёрге,
Къарайма джерге.
Ай бла джулдуз ?
Сын ташда, Кёкде.

Соруу бла джууаб ?
Джашау бла ёлюм.
Алай а рахат
Болмайды кёлюм.

Огъай, бошалмаз
Джашау ёлюм бла.
Айтама муну
Сабийча, кёлюм бла.

Тейри адамы ?
Къарайма Кёкге.
Излей андан
Себеб джюрекге.

Къазакъ джюрекден
Улуйду бёрю.
Эшитеди аны
Адам тюл, Тейри.

Кесимме джолда,
Алай тюлме джангыз:
Джарытады джолну
Джангы Ай бла джулдуз.

Sabr

Гость

#49

Джаратама0

14.04.2011 07:04:30

Nurgan
Кертисин айтсам:

Мен туугъанма Къыргъызстанда, Коксайда.
Мен ёсгенме Къызыл-Къалада, Къарачайда.
Джашагъанма Гитче Къарачайда, Москвада.
Энди джашайма Шимал тенгизни джагъасында - бузлада.
Ахыр джуртум а - назму сёзюм боллукъду...

АДАМ КЪАТЫНДА ЁЛМЕЙДИ АДАМ

Къыйынмыды санга?
Кёлню аман этме.
Адам къатында ёлмейди адам.
Ананг, эгечинг, тенгинг эсе да,
Билмей эсенг да, болур къайгьыргьан.

Мени ангылагьан джокъду да, деме,
Ангылагьан да болур, ангыламагьан да чыгьар.
Кеси кесинги джокъгьа да тергеме,
Сеннге керекли, сен керекли да бар.

Къыйынмыды санга?
Кёлюнгю аз этме.
Гитче, уллу джокъду. Барды адам!
Сен, дуниягьа, джашаугьа келген,
Керекли болуб келгенсе, ийнан!

Берекет Гость	#50 Джаратама0 14.04.2011 14:19:07 Сау бол, Sabr! Джарсыуубуз, къуанчыбызда биргелейди. Эртден ашхы, Nurgan! Палахгъа къалыргъа башлагъанбыз Билалны юлеше. Мен артха туракълайым да сеирге бир къарайым. Юлешигиз всезнайка бла сен. Всезнайка (всезнайкады да!) бир зат билиб, айтыр сёз табыб, къаршчы тураллыкъ болур санга. Сау бол, джарыкъ эгечим, кюлдюрдюнг.

Читают тему (гостей: 1)

Логин:
Пароль:
	Запомнить меня на этом компьютере

Забыли свой пароль?
Регистрация