- Тиширыусуз юй – отсуз от джагъа.
- Къарын къуру болса, джюрек уру болур.
- Ашлыкъ – бюртюкден, джюн – тюкден.
- Айранын берсенг, челегин да къызгъанма.
- Бети къызарыучу адамны, джюреги харам болмаз.
- Ишге юренсин къоллары, халкъ бла болсун джоллары.
- Намысы джокъну – дуниясы джокъ.
- Эл ауузу – элек, анга ийнаннган – халек.
- Окъ къызбайны джокълайды.
- Хатерли къул болур.
- Таукел къуру къалмаз.
- Сабыр джетер муратха, сабырсыз къалыр уятха.
- Сабийни джумушха джибер да, ызындан бар.
- Тыш элде солтан болгъандан эсе, кесинги элде олтан болгъан игиди!
- Айтханы чапыракъдан ётмеген.
- Сёз сёзню айтдырыр.
- Адам сёзге тынгыла, акъыл сёзню ангыла.
- От кюйдюрген, сау болса да, тот кюйдюрген, сау болмаз.
- Аман адам этегингден тутса, кес да къач.
- Джашны джигитлиги сорулур, къызны джигерлиги сорулур.
- Билимден уллу байлыкъ джокъду.
- Тёгюлген тюгел джыйылмайды.
- Рысхы – насыбха къор.
- Къошда джокъгъа – юлюш джокъ.
- Байлыкъ адамны сокъур этер.
- Сагъыш – къартлыкъгъа сюйюмчю.
- Къонакъ болсанг, ийнакъ бол.
- Ишленмеклик адамлыкъды.
- Арба аугъандан сора, джол кёргюзтюучю кёб болур.
- Аллахха ийнаннган кишини, Аллах онгдурур ишин.
- Тулпарлыкъ, билекден тюл – джюрекден.
- Хата – гитчеден.
- Джюрек кёзден алгъа кёрюр.
- Мал кёб болса, джууукъ кёб болур.
- Ишлегенден, къарагъан уста.
- Дженгил джетерикме деб, узун джолну къоюб, къысхасын барма.
- Биреуню тёрюнден, кесинги эшик артынг игиди.
- Тюзлюк тас болмайды.
- Орундукъ тюбюнде атылсам да, орта джиликме, де да айлан.
- Ашхы сёз таш тешер.
- Аман къатын сабий табса, бий болур…
- Акъыллы – эл иеси, тели – эл баласы.
- Юйюнгден чыкъдынг – кюнюнгден чыкъдынг.
- Атлыны кёрсе, джаяуну буту талыр.
- Ёлген аслан – сау чычхан.
- Аш берме да, къаш бер.
- Иги адамны бир сёзю эки болмаз.
- Джаным-тиним – окъуу, билим.
- Къарнынг бла ёч алма.
- Байдан умут эте, джарлыдан ёгюз багъасы къорады.
СЮЙМЕКЛИК КИТАБЫ+, Малкъар поэзияны сюймеклик антологиясы
30.01.2013 21:01:06
СЮЙМЕКЛИК КИТАБЫ+
Хурметли къарындашларым, багъалы эгечлерим! Бугюнлюк дунияда барыбызны да ауара этип тургъан бир уллу къыйынлыкъ барды. Ол да ана тилибизни унутулуп баргъаныды. Мен да, къайсы биригизча, аны юсюнден кёп сагъыш этеме.Телевидение, радио, газетле, интернет тилибизни ахыры да ырбыннга тыйып къойгъандыла, хау. Алай терслик кесибизде да барды: ана тилибизге алай уллу кёллю болургъа керек тюйюл эдик. Бизни осал дерслик китапларыбыз, болмачы устазларыбыз, фахмусуз жазыучуларыбыз, журналистлерибиз, уллу кёллю ата-анала да алагъа къошулуп, кеси сабийлерибизни ана тилибизден айырыр ючюн не этмедик? Аланы алларында бизни бырыбызны да гюнахыбыз кемсиз уллуду. Сабийин сюйген ана баласына ёз тилинде бешик жырла, жомакъла, элберле айтады, тауча сёлешеди. Ол алай къыйын иш тюйюлдю да!Тилин билмеген сабий артда тау адетден айырылады, аны себепли, ата-анасына, халкъына да суууйду. Къысхасы, ана тилин билмеген адам учуз болады, Бюгюнлюкде биз анга кесибиз шагъатбыз. Орусча къайгъы сёз бергенлени аз кёрмейбиз, тойда орусча тепсегенни къой да.Ана тилибиз къарыусузду, эршиди, бюгюннгю жашауну сурамына келишмейди деп жалан да ана тиллерин билмегенле айтадыла. Алай, Аллахны ашхылыгъындан, тилибизни шатык билгенле, ариу сёлешгенле алыкъа кёпдюле.Бу эки къауумгъа да атап, малкъар поэтлени ийнар назмуларындан «Сюймеклик китабын» жарашдыргъанма да, аз-аздан сизни аны бла шагъырей эте турлукъма. Мен, иш этип, поэтлерибизни жалан да тынч, ариу окъулгъан назмуларын къошханма бери. Китап сейир-аламат ийнарларыбыз бла ачылады. Аланы окъуп чыкъгъан таулу адам тилибизни ариулугъун, шатыклыгъын да сезмей амалы жокъду. Ким биледи, муну окъугъандан сора сагъыш этерикле да болурла. Нек эсе да, мен алай сунама. Хурметли окъуучула, назмула юзюлмей барыр ючюн, ёз акъылыгъызны бери жазмазыгъызны тилейме, модераторла да анга эс бурурла деп ышанама. Алайсыз бу иш, татыуу чыкъмай, базарлыкъ болуп къаллыкъды. ЁЛМЕЗЛАНЫ МУРАДИН, Къабарты-Малкъар Республиканы Къырал саугъасыны лауреаты
Изменено: |
|
|
|
Ответы
26.01.2019 16:17:17
***
Жангыз жилямукъ къалтырайды, Алас этип, кёрмейме жукъ. Узакъ узайгъан замаданды, Огъан жарсыудан – жилямукъ. Аны ол къадар эгечи уа Эртте къуругъанды кёзде. Ах, кёп жарсыуум, къууанчым да Алай чачылгъанды желде. Ариу къууанчым, бушуум да Болгъан жулдузла да жиляй, Эрип, жокъ болгъандыла энди, Кетгендиле танг чарсынлай. Гъашик Кетгенди жашлыкъ умутлай. Санга да, о кёз жаш, санга да - Заманды, - къуручу алай. |
|
|
|
07.02.2019 17:58:49
***
Сен, бала, гюлчюкча ариуса, Жарыкъса, тазаса, ингил. Санга сюйюне олтурама, Жаным биягъыча женгил. Бурма чачынгы къууанып да Сылар эдим, ариучукъ, мен, Жашлай, тазалай да сакъла деп Тилей, тийиншлисе да сен.
Изменено: |
|
|
|
17.02.2019 14:34:25
***
Эки кёзю – эки накъут, Эки сыйлы накъутду. Ол кём-кёк кёк дуньяланы Алгъан насыпды, къутду. Жюрекчиги уа – далгюзюр Оту алай жарыкъды. Анга ие болгъан къууанч, Насып да табарыкъды. Эки эрни – эки да лал Шашар кибик ингилди. Очукъладан уппа юзген Минг насыпдан игиди. Ол байлыкъны иечиги Онжетижыллыкъды. Мен агъачда тюбеп къалсам, Къызчыкъ къуру къаллыкъды. |
|
|
|
24.02.2019 15:22:57
***
Сени барды инжинг, налмасынг да, Бош умутду ол кёбюбюзге. Аладан сора - кёк кёзлеринг да… Не керекди, о жаным, ёзге? Ол эки иллезин Акъылдан шашдырлыкъ да кёзге Мен ийнар аскерле жибергенме… Жан тенгим! Не керекди ёзге? Ол эки кёзюнгю жилтиними, Къыркъаууз от салгъанча кюзге, Кюйдюргенди мени, ёлтюргенди? - Не керекди, о жаным, ёзге? |
|
|
|
17.03.2019 17:08:20
***
Жюрекни терен сыры Зынгырдайды къылча. Бир тёгюлчю жаз жыры, Дуньягъа жайылчы! Жаучу гюллеге кёкден. Сен къууанчса, жырса. Байрымгюлчюкге менден Сен салам айтырса. |
|
|
|
24.03.2019 15:16:40
|
|
|
|
13.04.2019 20:30:31
|
|
|
|
20.04.2019 18:58:40
***
Мудах къагъыт келгенди, Алай жаным а хош. Къояса энди. Сора Бош къаргъанаса, бош. Къагъыт узунуракъды, Окъуп арырча кёз. Угъай деген, о бала, Къоратмайд анча сёз. |
|
|
|
04.05.2019 23:14:06
***
Умут терегим чагъады, Къуруйду заманында. Чагъады, къуруйду сора. Алайды жашау мында. Аны эртте да билеме. Алда жалан да – жара. Бу акъылман жюрегим а Кюледи, къаны бара. |
|
|
|
15.06.2019 18:30:05
***
Жаным, ариуну артал да Ийнандырмайды сёзю. Жокъду намысны сенича Дум къара эки кёзю Мен сюеме да! О къойчу, Жаным, ётюрюклени. Тынгыла да, ангыларса Жюрегинг бла мени. |
|
|
|
Читают тему (гостей: 2)