Ашатыргъа иш – ашхы, ишлетирге аш – ашхы.
Ышармагъан – кюлмез, кюлмеген – къууанчны билмез.
Биреуню тёрюнден, кесинги эшик артынг игиди.
Ёлюк кебинсиз къалмаз.
Байлыкъ болгъан джерде, тынчлыкъ джокъду.
Акъылсызны джууукъгъа алма, акъыллыны кенгнге салма.
Тюзлюк шохлукъну бегитир.
Дууулдаса – бал чибин, къонса – къара чибин.
Термилгенинги табмазса, кюлгенинге тюберсе.
Юй кюйдю да, кюйюз чыкъды, ортасындан тюйюш чыкъды.
Иги джашны ышаны – аз сёлешиб, кёб тынгылар.
Азыгъы аз, алгъа къабар, аты аман, алгъа чабар.
Суу ичген шауданынга тюкюрме.
Башы джабылгъан челекге, кир тюшмез.
Ачылгъан эт джабылыр, кёрген кёз унутмаз.
Узун джолну барсанг, бюгюн келирсе, къысха джолну барсанг, тамбла келирсе.
Къонакъны къачан кетерин сорма, къачан келлигин сор.
Ата – билек, ана – джюрек!
Къарын къуру болса, джюрек уру болур.
Ат да турмайды бир териде.
Ойнаб айтсанг да, эслеб айт.
Акъыллы башны – тили къысха.
Чомарт къонакъ юй иесин сыйлар.
Ашхы – джыяр, аман – джояр.
«Ма», - дегенни билмесенг, «бер», - дегенни билмезсе.
Рысхы джалгъанды: келген да этер, кетген да этер.
Окъугъан – асыу, окъумагъан – джарсыу.
Ариу сёз джыланны орнундан чыгъарыр.
Ач уят къоймаз.
Сабий кёргенин унутмаз.
Эринчекни эр алмаз, эр алса да, кёл салмаз, кёл салса да, кёб бармаз!
Кенгеш болса, уруш болмаз.
Адамны артындан къара сабан сюрме.
Тил – кесген бычакъ, сёз – атылгъан окъ.
Танг атмайма десе да, кюн къоярыкъ тюйюлдю.
Чомартны къолун джокълукъ байлар.
Уллу атлама – абынырса, уллу къабма – къарылырса.
Ач къарным, тынч къулагъым.
Орну джокъну – сыйы джокъ.
Кийим тукъум сордурур.
Билимден уллу байлыкъ джокъду.
Чомарт бергенин айтмаз.
Ашхы болсанг, атынг чыгъар, аман болсанг, джанынг чыгъар.
Биреуге аманлыкъны тилеме да, кесинге ашхылыкъны тиле.
Окъуу – билимни ачхычы, окъуу – дунияны бачхычы.
Джангызны оту джарыкъ джанмаз!
Билмегенинги, билгеннге сор.
Гитче джилтин уллу элни джандырыр.
Джумушакъ терекни къурт ашар.
Намыс болмагъан джерде, насыб болмаз.
