Адам бла мюлк юлешмеген эсенг, ол адамны билиб бошагъанма, деб кесинги алдама.
Гитче джилтин уллу элни джандырыр.
Къарнынг ауруса, ауузунгу тый
Айырылмаз джууугъунга, унутмаз сёзню айтма.
Тилде сюек болмаса да, сюек сындырыр.
Чабакъгъа акъыл, табагъа тюшсе келеди.
Адамны сабийин сюйген джюреги, бычакъча, джитиди.
Джюз элде джюз ёгюзюм болгъандан эсе, джюз джууугъум болсун.
Тёзген – тёш ашар!
Гугурук къычырмаса да, тангны атары къалмаз.
Ёмюрлюк шохлукъну джел элтмез.
Тил бла келеди джыр да.
Ётюрюкню башын керти кесер.
Бети – къучакълар, джюреги – бычакълар.
Ишлегенден, къарагъан уста.
Насыб бютеу халкъны юлюшюдю.
Тёрде – темир таякълы, къаяда – чыпчыкъ аякълы.
Джыйырма къойну юч джыйырма эбзе кюте эди.
Чакъырылмагъан къонакъ тёрге атламаз.
Кёбге таш атма.
Сабийни джумушха джибер да, ызындан бар.
Зарда марда джокъ.
Тил – кесген бычакъ, сёз – атылгъан окъ.
Намысы болмагъанны, сыйы болмаз.
Джашынгы кесинг юретмесенг, джашау юретир.
Джырчы ёлсе, джыры къалыр.
Эллинг бла джау болсанг да, юйюнг бла джау болма.
Тюзню ётмеги тюзде къалса да, тас болмаз.
Аман адам этегингден тутса, кес да къач.
Мал тутхан – май джалар.
Иги – алгъыш этер, аман – къаргъыш этер.
Минг тенг да азды, бир джау да кёбдю.
Кёпюр салгъан кеси ётер, уру къазгъан кеси кетер.
Кёлсюзден сёзсюз тууар.
Джан саулукъ бермей, сан саулукъ бермезсе.
Сабыр джетер муратха, сабырсыз къалыр уятха.
Ашда – бёрю, ишде – ёлю.
Аман адамны тепсинге олтуртсанг, къызынгы тилер.
Окъугъан – асыу, окъумагъан – джарсыу.
Керти сёзге тёре джокъ.
Тамырсыз терекге таянма – джыгъылырса.
Эркишиге тары кебек танг кёрюнюр.
Баш – акъыл ючюн, акъылман – халкъ ючюн.
Окъугъан озар, окъумагъан тозар.
Джаш къарыу бла кючлю, къарт акъыл бла кючлю.
Ашхы болсанг, атынг чыгъар, аман болсанг, джанынг чыгъар.
Таукел адам тау тешер.
Ёпкелегенни ашы татлы болады.
Чакъырылмагъан къонакъ къачан кетерин сормаз.
Юйлю уругъа ит чабмаз.
