- Къыз келсе, джумуш эте келеди, къатын келсе, ушакъ эте келеди.
- Этим кетсе да, сюегим къалыр.
- Ашхылыкъ джерде джатмайды, аманлыкъ суугъа батмайды.
- Билгенни къолу къарны джандырыр.
- Ётюрюк хапар аякъ тюбю бла джюрюйдю.
- Джюз элде джюз ёгюзюм болгъандан эсе, джюз джууугъум болсун.
- Адамгъа аман кюн соруб келмейди.
- Гугурук къычырмаса да, тангны атары къалмаз.
- Кимни – тили, тиши онглу, кимни – къолу, иши онглу.
- Чомарт бергенин айтмаз.
- Алтыннга тот къонмаз.
- Чабар ат – джетген къыз.
- Бет бетге къараса, бет да джерге къарар.
- Бёрю да ач къалмасын, эчки да ашалмасын.
- Къайгъы тюбю – тенгиз.
- Аякъларынгы джууургъанынга кёре узат.
- Кёлю джокъну – джолу джокъ.
- Хар адамгъа кеси миннген тау кибик.
- Эки элинги тыйсанг, джети элде махталырса.
- Къобан да къуру да къобханлай турмайды, адам да къуру да патчахлай турмайды.
- Джаш къарыу бла кючлю, къарт акъыл бла кючлю.
- Аманны къуугъан, аманлыкъ табар.
- Дуния аламаты сен эсенг да, игиме деб айтма.
- Биреуню тёрюнден, кесинги эшик артынг игиди.
- Бети – къучакълар, джюреги – бычакълар.
- Эки къатын алгъан – эки ташны ортасына башын салгъан.
- Ишни ахырын ойламай, аллын башлама.
- Биреуню эскиси биреуге джангы болмайды.
- Юйюнгден чыкъдынг – кюнюнгден чыкъдынг.
- Мени джылытмагъан кюн, меннге тиймесин!
- Ана – юйню кюн джарыгъы.
- Итли къонакъ джарашмаз.
- Чалманны аллы къалай башланса, арты да алай барады.
- Ёлмесенг да, къарт дамы болмазса?
- Джырчы джырчыгъа – къарнаш.
- Джахил болса анасы, не билликди баласы?
- Джогъун бар этген, барын бал этген.
- Адамны сабийин сюйген джюреги, бычакъча, джитиди.
- Алгъанда – джууукъ, бергенде – джау.
- Алим болгъандан эсе, адам болгъан къыйынды.
- Джукъу тёшек сайламайды.
- Эллинг бла джау болсанг да, юйюнг бла джау болма.
- Акъыл къартда, джашда тюйюлдю – башдады.
- Юреннген ауруу къалмаз.
- Ышармагъан – кюлмез, кюлмеген – къууанчны билмез.
- Ашхы – джыяр, аман – джояр.
- Эски джаугъа ышанма.
- Айтхан сёзюне табылгъан.
- Къазанчы аман болса, къазаны къайнамаз.
- Хар сёзню орну барды.
ЁЛМЕЗЛАНЫ МУРАДИН САБИЙЛЕГЕ., назмула. элберле. жомакъла
14.12.2021 18:36:29
С А У Ж Ы Л
АКЪТОН Январь Къаратал кёмюкча акъды, Жер терен батып къаргъа. Къап къара уа юй ожакъды, Сора бусакъда къаргъа. Курт да акъ айыуча акъды. Бахчада антау да акъ. Энди эл орам сокъмакъды, Тал да оюулу къырпакъ. Кюн тийсе да, жылыусузду, Къарт аппа къочхар тонлу. Кёл да, суу жагъа да бузду, Акътонда сууукъ уллу. БУРУЛ Февраль Балдражюз мыйыкъ бурады, Жаз хорлатырыкъ сунуп. Бурулда боран урады, Жол баргъан ачыусунуп. Огъурсузду да, талайды Къутургъан селпича Табанын зауукъ жалайды Куркада жукълап хубол. Балдражюз жаныйды хаман, Курт басады арбазны. Бузлатырма деме, аман, Ийиси ура жазны. БАЛДЫР Март Балдырда жылыу киреди, Седирей жагъа бузу. Кёк да, жер да кёгереди, Сур къышны кетип усу. Кечеден иги къорайды, Аз-аз къошула кюннге. Кюн да ышарып къарайды, Жер да ачылып кенгнге. Мыкъыриш Жанкъозчукъ да – ызындан. – Эрикгенбиз, сур къыш, энди, Кетчи хайда сен мындан. ЛАККУР Апрель Кюн таугъа, тюзге къагъады, Жылыта тереклени. Бурунчукълары агъады Чорбатда сюммеклени. Къар эрийди, седирейди, Суу халычыкъла болуп. – Эйра Тал да, чирчикден толуп. Чыпчыкъчыкъ ариу жырлайды, Энди ёлмейди ачдан. Куркачыгъындан къарайды Хуболчукъ да агъачда. ГОТМАН Май Инжиликчикле Чирчикле да – эрикде. Къанатчыкъларын къагъалла Къарылгъашчыкъла кёкде. Кюн да энди хычыуунду, Готманда жууаш тийип, Жарыгъын да, жылыуун да Дуньягъа элпек ийип. Эйра, школ жыл терк ётгенди, Не узун эсе да ол. Эйра, жай солуу жетгенди! Эйра, жабылгъанды школ! БАШКЪУСХАН Июнь Сур къыш къысталып къарлы Таулагъа, къызыуду жай. Эрттенлик – чыпчыкъ жырлы, Къарт аппа малгъа къарай. Башкъусхан жашил къайнай, Гурт этеди гурт тауукъ. Сабийле кёлде ойнай, Эришедиле зауукъ. Уруза, кимит гокка, Бабунач, зурап Баппахан кийген бокка, Ой, учду аяз къагъып. БУЗЧАЧАР Июль Тау эл чалгъыгъа чыгъады. Ташыуулду аууру. Кёк жашнайды, кёк чагъады, Огъурсузду даууру. Тау бетде чалгъы чалады Жаш жыйын, сатыр туруп, Къарт жыйын гебен салады, Къызланы болушдуруп. Бузчачар ауур озады. Жыл бакъгъан кюнле – къыстау. Мытырны иши осалды: Сур къыш этерикди дау. КЪЫРКЪАР Август Къыркъарда кёгет жетеди, Кёгетни кюню къысха. Тáлай къайнатма Ыннака узун къышха. Кюн татыуундан толады Хар кёгет да, мол ёсе. Жай перекетли болады, Къол эринмей ишлесе. Бахчагъа сюйюп барабыз, Не кёгет сюйсенг да бар. Жетерин сакълап турабыз, Бек чомартды да къыркъар. КЪЫРКЪАУУЗ Сентябрь Сабанла алтын болуп, Чайкъаладыла желде. Къыркъаууз жетсе, солуп Турмайды киши элде. Болмай эриннген, талгъан, Эл ишни бирден алады. Сабийле тансыкъ болгъан Школ эшик да ачылады. Къадалып сабан оралла, Къууаналла тирликге. Турнала кетип баралла, Мудахлыкъ салып кёкге. СОГЪУМ Октябрь Чыпчыкъла жырламай, шошду Танг, эрттен, арбаз да. Кюн жылыу да энди бошду, Жарыгъы да азды. Согъумда – шулпу, сууукъ, Согъумда – туман, кирши. Энди акъмыйыкъ жууукъ, Ол да согъумну иши. Киштикчик, жукъусурай, Терезе кёзден къарайды. Арбазда мудахды тай, Жел жалкъачыгъын тарайды. АРГЪЫШ Ноябрь Кюз арты газгаз Тау агъач керти жомакъ. Акъ къайын ариу алтын Жыйрыгъын кийип, омакъ. Тал, элме, жёге, чынар, Къарагъач, кюйрюч да – нар Тюрсюнлю. Ариуду кюз, Неди, не къажар кюйюз? Тюкъюзгю, чопал-чопал Сыргъачыкъларын тагъып. Энди халжардады мал, Тау бетге къырау къагъып. АЛТАЙГЪЫР Декабрь Жел, ура, боран болады, Ёзенден суху жетип, Черекге ыфсыл Суу бетин мукъур этип. Тунтуяды, шошаяды Сора, ачыуу татып. Кюн да жарыгъын жаяды, Тауланы жылтыратып. Сабийле юйден къачалла, Чаначыкъларын созуп, Тик тёшден къызыу учалла, Аязны, желни озуп. 2021 |
|
|
|
16.12.2021 18:04:24
НЕМЕ
Неме деп бир тюрлю затчыкъ Жашайды да бизде, Сейир ишле боладыла, Ийнан, юйюбюзде. Киштикча, ол бир тауушсуз Жюрюйдю ташатын. Не кёрмейме, не билмейме Аны атын-затын. Столгъа жеталмайды; баям, Гитчеди, юч къарыш. Алай хилисинден юйде Болгъан – къара къатыш. Жабыу тюшюп, шинтик аууп, Кийим да – чачылып. Сынып харип илляучукъла, Буфет да ачылып. Жазады ол къабыргъада, Бурмачыкъла буруп, Кампетлени табады ол, Турсам да букъдуруп. Кёзден ташады да, юйде Не этмейди, ой, не? Адам къалай тутсун муну, Къыстарча юйюне. Къашыкъ бла ашамай ол, Къайнатмадан тояды, Кокаларын неге болса Анга ышып къояды. Китапланы, тефтерлени Чачхан, жыртхан да – ол. Къолу жетген затны оя, Чапхан, жортхан да – ол. Бузлатмадан бузчукъ алып, Кампет кибик эмеди. Тутуп эшик къолчакъладан Учхан да ол Немеди. Ол диванда, ундурукъда, Топчукъча секиреди. Шифоньерни ичин тёгюп, Ары кеси киреди. Бу юй, ой, къутургъан бугъа Кирген юйге ушайды. Былай барса, юйюбюзню Неме чачып бошайды. Излеп табалмайма аны, Биледи да бугъа. Тоба, тутсам а бузукъну Берликме Мамугъа! Ой, жашчыкъ, ол сиркиу ючюн, Сен нек мудах боласа? Бузукъ Немеди, ансы хау, Сен бек иги баласа! 06 01 21 |
|
|
|
17.12.2021 19:22:32
ТЕНГИМИ САУГЪАСЫ
Эйра-ра Жыл болгъанды энди. Кёп тюрлю саугъа алып Кёп тенгим келгенди. Кёрчю, эм иги саугъа Асланчыкъ этгенди. Энди барды кючюгюм, Не зауукъма энди. Тамбла атам бла Мен къошха барлыкъма, Мен айыуталам бла Къой кютюп турлукъма. Къарарыкъма мен анга, Ол уллу болгъунчу. Сора бир кёрсюн бёрю Къой элтип алгъынча! 1970 |
|
|
|
21.12.2021 19:20:15
КЮМЮШ ЖАУУН
Жаз жауун жауду, жауду, Букъа-башындан ауду. Ол суучукъну жибитди, Гылыучукъну жибитди. Сакъ жауун – жазны жыры. Анакадан жашырын Чартлап чыкъдым арбазгъа, Жауун чапхан арбазгъа. Ары-бери жюрюдюм, Ой, жибидим, жибидим. Энди уа, юйге кирип, Чачымы къурутайым. Жомакъда жашчыкъ кибик, Кюмюшчашчыкъ боланым, Ариу жашчыкъ болайым! 1971
Изменено: |
|
|
|
23.12.2021 21:08:03
ЧАПДЫМ, ЧАПДЫМ
Кёк чагъады, жел урады, Жаз жауун жауа турады. Ол суусап къысхан жерни Къандыра, къууандырады. Мен юйден къарап кёреме: Суу толкъунланып бара. Ётюрюк айтады деме, – Бир къарчы, бир къара. Сакъ жауун, жылкъы жетгенча, Терк жетди да, узайды. Хар булут да, акъ желтенча Желпегин Тышына чабып чыкъдым да, Мен жалан аякъ чапдым. Ой, чапдым, чапдым, чапдым да, Хар кёлде да кюн тапдым. 1971 |
|
|
|
28.12.2021 20:19:45
ЖАНГЫ ЧУРУКЪЧУКЪЛА
Жап-жангы чурукъчукъла, Яра жортурукъчукъла, Тёзмей зауалгъа Чапдыла ары-бери. Чурукъла ичлеринде уа Ол эки да какачыкъ. Какала юслеринде уа – Хыпияр Билякачыкъ. Жюйрюкчюкле, тиричикле, Сиркиучюкле, жигитчикле Анакалагъа жетип Къайтдыла, букъу этип. 2015 |
|
|
|
05.01.2022 21:11:58
ЖУКЪУЧУКЪНУ ЖЫРЧЫГЪЫ
Айыу жукълайды кенг куркасында, Чыпчыкъ – бийик уясында. Тишхан терен тешигинде, Бала – жылы бешигинде. Булутчукъда жукълайды жауунчукъ, Къамилчикде – ырдауунчукъ. Чёпде жукълайды чыкъ, Тёшегинде – гитче къызчыкъ, Тюшле кёре, къыйнамай жукъ… Жукъламайды жаланда услучукъ. 2013
Изменено: |
|
|
|
09.01.2022 09:43:19
Айыу Куркасында Тишхан (къарачайча чычхан дейдиле, по смыслу догадываюсь, что мышь) Къамилчикде Ырдауунчукъ Услучукъ ((
Я самая классная на форуме))))))))))))))
|
||||
|
|
|||
Читают тему (гостей: 2)