Translit
Гитчеле абаданланы къытхандыла
28.12.2015
0
2392
Бу кюнледе шашкаладан бардырылгъан турнир "Эльбрусоид" Фондну ашхы ишлеринден бири болгъанды. Аны келечилери алгъадан окъуна, интернетде билдириу жазып, усталыкъларын кёргюзтюрге сюйгенлени чакъыргъандыла.
- Быллай эришиулени жыл сайын бардырабыз, келгенле, бир бирлери бла танышып, шашкалагъа да юйренип, ким кючлю болгъанын да айырыргъа сюебиз. Турнирни олимпиада жорукъла бла бардырабыз. 24 адам бир бири бла ойнайдыла, аланы араларында къытдыргъанла экинчи тургъа ётмейдиле, ахырында финалгъа да ючеулен чыгъады, - дегенди Фондда ишлеген Къубадийланы Азамат.
Жыл сан бла чек салынмагъаны себепли кеслерин сынаргъа сюйгенле аз тюйюл эдиле. Эки сагъатны ичинде баргъан къызыу оюнлада бек игиле белгиленнгендиле. Аланы араларында эм гитче эки жашчыкъ бек сейирсиндиргендиле. Ючюнчю жерни Къазахстандан келген Алибий Жубаев алгъанды (анга 7 жыл толгъанды). Ол шашкалагъа юйреннгенли эки жыл болады, Нальчикде да турнирлеге къатышып, алчы жерлеге да чыгъа туруучуду.
Биринчи жерни къытхан 12-жыллыкъ Имран Эргашевге уа биринчи эришиу тюйюлдю. Былтыр ды "Эльбрусоидде" ол хорлагъан эди. Сегиз жылында юйренип, СКФО-да, Чегемде турнирледе да сыйлы жерлеге тийишли болгъанды. Была кеслеринден иги тамата адамланы хорлагъандыла.
Экинчи жерде Глашланы Алимди, анга 22 жыл болады. Шашкаладан турнирге биринчи къатышханды, ары дери уа шахматла ойнап тургъанды.
Къытханлагъа майдалла, сыйлы саугъала да берилгендиле.
Темуккуланы Аминат,
Нальчик.
Къайнакъ: "Заман"/22.12.15
Комментариев нет