События

Cобытия / Другое

Translit

«АЛТЫН КЪАЛАМ – 2015»

16.03.2015 0 1183

…Джигер халкъым,

Тил байлыкъны сен эртдеден уулагъанса,

Джерден, суудан,

Ауаз джыйыб, кескин сёзле къурагъанса.

Ол сёзлени,

Чарпытмайын, тёлюлеге джетдиргенсе,

Бизге бюгюн

«Ана тил» деб, учунурча этдиргенсе.

(Семенлени Исмаил)

Къарачай-Черкес республика 2015-чи джылны «Ана тилни джылы» деб белгилегени бла байламлы, Регионла арасы джамагъат организация «Барс Эль» бла «Эльбрусоид» фонд бирге ол ашхы ишге юлюш къошар муратда, эки республикада (КъЧР бла КъМР) да къарачай-малкъар тилни уста билген джаш адамланы арасында адабият конкурс бардырады. Анга къошуллукъла джыллары бла юч къауумгъа юлешинникдиле: 17 джылгъа (школ сохтала) дери (1-чи къауум), 18 джылдан 22-ге дери (2-чи къауум), 23 джылдан 30-гъа дери (3-чю къауум). Конкурсха келген чыгъармалагъа багъа бериуде да хар къауумгъа излем бирер тюрлю боллукъду. Конкурсха эки ай (мартны 16-дан – майны 16 дери) бериледи. Ол болджалгъа сыйынмагъанны чыгъармасына къараллыкъ тюлдю. Конкурсха ётген ишлени (сочинение неда эссе) маджаллары алгъа «Элбрусоидни» сайтына сюзюуге салынныкъдыла. Ахырында алимледен, джазыучуладан, журналистледен къуралгъан жюри игиге тергеген чыгъармаладан энчи китаб къураллыкъды.

Конкурсну нюзюрлери:

1. Джаш адамланы эслерин ана тилге, миллет адабиятха буруу, аланы не къадар билирге тырмашдырыу.

2. Миллет байлыкъ не болгъаныны юсюнден джаш адамланы сагъышха чакъыра, къайсы бир халкъны да ана тили, ашхы адамлыры, джурту, тарихи, адеб-намыс джорукълары, джашагъан заманы баш байлыгъы болгъанына ойлашдырыу.

3. Сёз бла суратлаугъа, чыгъармачылыкъгъа фахмулары болгъан джаш адамланы айгъакълау.

Нени юсюнден джазаргъа керекдиле конкурсха къошулгъанла?!

Темалары:

1. «Тилсиз халкъ джокъ болур» (Ана тилни бюгюн болуму бла байламлы сагъышла, оюмла, джарсыула, анга къуллукъ этген адамла).

2. Биз юйюрню махтаулу адамы. (Тукъумда, юйюрде атын иги бла айтдыргъан, джигитлиги, джигерлиги, адеби-намысы, фахмусу бла кесини, юйдегисини, тукъумуну да сыйын чыгъаргъан адам).

3. Биз къаллай ёмюрде джашайбыз? (Бюгюн кюнню игиси бла аманы: неге къууанабыз, неден къыйналабыз? Не шарт ёхтемлендиреди, неге ыйлыгъабыз? Нени тюрлендирлик эдик? Кимни не ючюн сюебиз? Эм уллу мурат…)

4. Ата Джурт къазауат бошалгъанына 70 джыл. Аны ызы хар юйдегини джазыуунда.

5. Табигъат – миллет байлыгъы. (Туугъан элинг, джашагъан джеринг, джер бауурну хурмети, берекети; табигъатны сакълау - хар адамны борчу; къалай ариу чагъадыла терекле)

Конкурсну излеми:

а) Чыгъарма къарачай-малкъар тилде (халатсыз) джазылыргъа;

б) Бир адам бир темагъа джазаргъа;

в) Чыгъарманы сайланнган темадан кетмей джазаргъа;

г) Джазылгъаны 14-чю шрифт бла, тизгин аралары - 1,5 см, 5 бетден аслам болмагъан.

Конкурсха теджелген джазма ишледе жюри юч затха артыкъ эс бёллюкдю:

- теманы къалай ачыкъланнганына;

- ана тилни байлыгъы къалай хайырланнганына;

- къаллай юлгюле келтирилгенине.

Конкурсха къошулур ючюн:

Джазма ишин ийген бла бирге, автор суратын (3х4), тукъумун, атын, атасыны атын, джашагъан элин (шахарын), окъугъан джерин, ишин, телефонун, e-mail-ын толусу бла кёргюзюрге унутмасын.

Башында айтханыбызча, фахмулу джазылгъан терен магъаналы чыгъармала китабха теджелликдиле. Конкурсда хорлагъанла (9 адам – хар къауумда 1-чи, 2-чи, 3-чю орунланы алгъанла) къралны ара шахарына, «Эльбрусоид» джыл сайын Москваны вузларын джетишимли тауусхан джаш адамлагъа атаб этиучю къууанч джыйылыугъа чакъырылыб, саугъаларын (ёчлерин) анда аллыкъдыла.

Конкурсха теджеген джазма ишлени тюбюндеги форманы толтуруб бу электрон адресге иерге: Kalam@elbrusoid.org

Конкурсну болджалы: 2015 джыл 16-чы мартдан 16-чы майгъа дери.

Майны 16-дан 26-сына дери конкурсха теджелген джазма ишлеге «Эльбрусоидни» сайтында окъуучула багъа берликдиле эмда профессионал жюри къарарыкъды.

Конкурсну эсеблери сайтда, газетледе, телевидениеде да белгиленникдиле.

Форма:

Тукъум
Ат
Ата аты
Джашагъан эл (шахар)
Окъугъан джер
Ишлеген джер
Телефон
e-mail
Джазма ишни темасы