Аудио :: Аудио:: Шунгаров Хорлам

Къан бла кирген, джан бла чыгъар.
Ётюрюкден тюбю джокъ, кёлтюрюрге джиби джокъ.
Къуллукъчума, деб махтанма, къуллукъ – хаух джамчыды!
Акъыллы эркиши атын махтар, акъылсыз эркиши къатынын махтар.
Борчунг бар эсе, хурджунунга ойлаб узал.
Тёрде – темир таякълы, къаяда – чыпчыкъ аякълы.
Тулпарлыкъ, билекден тюл – джюрекден.
Кёлсюзден сёзсюз тууар.
Акъыл неден да кючлюдю.
Зар адамны насыбы болмаз.
Олтуруб кёрюнмей эди да, ёрге туруб кёрюне эди.
Миллетни бойну – базыкъ, аны бла кюрешген – джазыкъ.
Эм ашхы къайын ана мамукъ бла башынгы тешер.
Чакъырылмагъан къонакъ къачан кетерин сормаз.
Башынга джетмегенни сорма.
Эски джаугъа ышанма.
Арбаз сайлама да, хоншу сайла.
Хар зат кесини орнуна иги.
Ашлыкъ – бюртюкден, джюн – тюкден.
Ётген ёмюр – акъгъан суу.
Джумушакъ терекни къурт ашар.
Тенгинг джокъ эсе – изле, бар эсе – сакъла!
Къоркъакъны кёзю экили кёрюр.
Къазанда болса, чолпугъа чыгъар.
Ашхы тенг джолгъа салыр, аман тенг джолдан тайдырыр.
Ана къойну – балагъа джандет.
Джырчы джырчыгъа – къарнаш.
Тойчу джашха къарама, къойчу джашха къара.
Къайтырыкъ эшигинги, къаты уруб чыкъма.
Ата Джуртуму башы болмасам да, босагъасында ташы болайым.
Аууз сакълагъан – джан сакълар.
Кёзюнде тереги болгъан, чёбю болгъаннга кюле эди.
Къонакъ кёб келюучю юйню, къазаны отдан тюшмез.
Ёнгкюч къууана барыр, джылай келир.
Ичимден чыкъды хата, къайры барайым сата?
Адам къыйынлыгъын кёлтюрюр, зауукълугъун кёлтюрмез.
Эшекге миннген – биринчи айыб, андан джыгъылгъан – экинчи айыб.
Экеу тутушса, биреу джыгъылыр.
Атынг аманнга чыкъгъандан эсе, джанынг тамагъынгдан чыкъсын.
Суугъа – чабакъ, къаягъа – ыргъакъ.
Акъыл бла адеб эгизледиле.
Адеб джокъда, намыс джокъ.
Малны кют, джерни тюрт.
Кютгени беш эчки, сызгъыргъаны уа, джерни джарады.
Къыйынлы джети элге оноу этер.
Джюрек кёзден алгъа кёрюр.
Битмегеннге сакъал – танг.
Арпа, будай – ащды, алтын, кюмюш а – ташды.
Эринчекге кюн узун.
Тойгъан антын унутур.

Логин:	Регистрация

Пароль:	Забыли пароль?

Запомнить меня

Аудио

Шунгаров Хорлам

Скачать

Адрес