Эльбрусоид :: Эльбрусоид

Кютгени беш эчки, сызгъыргъаны уа, джерни джарады.
Къонакъ болсанг, ийнакъ бол.
Къайтырыкъ эшигинги, къаты уруб чыкъма.
Аман эсирсе, юйюн ояр.
Намыс болмагъан джерде, насыб болмаз.
Байны оноуу, джарлыгъа джарамаз.
Ашаса, ашамаса да, бёрюню ауузу – къан.
Ётюрюкню къуйругъу – бир тутум.
Душманны тышы – акъ, ичи – къара.
Акъыллы эркиши атын махтар, акъылсыз эркиши къатынын махтар.
Ашхылыкъ джерде джатмайды, аманлыкъ суугъа батмайды.
Азыкъ аз болса, эртде орун сал.
Чомартха Тейри да борчлуду.
Ёмюрлюк шохлукъну джел элтмез.
Дуния малгъа сатылма, кесингден телиге къатылма.
Адебсиз адам – джюгенсиз ат.
Этек чакъмакълары баш джаргъан, сёлешген сёзлери таш джаргъан.
Джюрек кёзден алгъа кёрюр.
Ауругъаннга – кийик саулукъ, джетген къызгъа – чилле джаулукъ.
Башланнган иш битер, къымылдагъан тиш тюшер.
Окъугъанны бети джарыкъ.
Къошда джокъгъа – юлюш джокъ.
Ата Джуртча джер болмаз, туугъан элча эл болмаз.
Дженгил джетерикме деб, узун джолну къоюб, къысхасын барма.
Тилсиз миллет джокъ болур.
Къонакъ аз олтурур, кёб сынар.
Кёзню ачылгъаны – иги, ауузну джабылгъаны – иги.
Бети – къучакълар, джюреги – бычакълар.
Бек анасы джыламаз.
Чоюнну башы ачыкъ болса, итге уят керекди.
Къобан да къуру да къобханлай турмайды, адам да къуру да патчахлай турмайды.
Суу да къайтады чыкъгъан джерине.
Аш берме да, къаш бер.
Къызны минг тилер, бир алыр.
Хар ишни да аллы къыйынды.
Алма терегинден кери кетмез.
Таш ата билмеген, башына урур.
Сабыр джетер муратха, сабырсыз къалыр уятха.
Иги адам абынса да, джангылмаз.
Ёлюр джаннга, ёкюл джокъ.
Ач – эснер, ат – кишнер.
Накъырда – кертини келечиси.
Джаным-тиним – окъуу, билим.
Ётген ёмюр – акъгъан суу.
Телиге акъыл салгъандан эсе, ёлгеннге джан салырса.
Ёлген ийнек сютлю болур.
Эл тойса, тоймагъан, эл къойса, къоймагъан.
Ач къарынны, токъ билмез
Ышармагъан – кюлмез, кюлмеген – къууанчны билмез.
Къарт айтханны этмеген, къартаймаз.