Эльбрусоид :: Эльбрусоид

Кёзюнде тереги болгъан, чёбю болгъаннга кюле эди.
Кёз – сюйген джерде, къол – ауругъан джерде.
Рысхы – насыбха къор.
Сагъыш – къартлыкъгъа сюйюмчю.
Адам бла мюлк юлешмеген эсенг, ол адамны билиб бошагъанма, деб кесинги алдама.
Джолда аягъынга сакъ бол, ушакъда тилинге сакъ бол.
Акъыл бла адеб эгизледиле.
Халкъгъа джарагъан, джарлы къалмаз.
Нарт сёз къарт болмаз.
Агъач халкъгъа алтынды, иссиликге салкъынды.
Тойгъан джерден туугъан джер игиди.
Ауурну тюбю бла, дженгилни башы бла джюрюген.
Гыдай эчки суугъа къараб, мюйюзле кёрмесе, джашма алкъын, дегенди.
Адеб джокъда, намыс джокъ.
Ачыу алгъа келсе, акъыл артха къалады.
Алим болгъандан эсе, адам болгъан къыйынды.
Ачылгъан эт джабылыр, кёрген кёз унутмаз.
Аш берме да, къаш бер.
Джиби бир къат джетмей эди да, эки къат тарта эди.
Ашхы сёз таш тешер.
Тенгинг джокъ эсе – изле, бар эсе – сакъла!
Кёб ант этген, кёб ётюрюк айтыр.
Накъырда – кертини келечиси.
Ашхы тенг джолгъа салыр, аман тенг джолдан тайдырыр.
Алтыннга тот къонмаз.
Джаз бир кюнню джатсанг, къыш талай кюнню абынырса.
Ариу сёз – къылычдан джити.
Къызын тута билмеген, тул этер, джашын тута билмеген, къул этер.
Къан бла кирген, джан бла чыгъар.
Ашхы болсанг, атынг чыгъар, аман болсанг, джанынг чыгъар.
Уллу сёлешме да, уллу къаб.
Кийимни бичсенг, кенг бич, тар этген къыйын тюлдю.
Атынг аманнга чыкъгъандан эсе, джанынг тамагъынгдан чыкъсын.
Кийим тукъум сордурур.
Джуртун къоругъан озар.
Татлы тилде – сёз ариу, чемер къолда – иш ариу.
Тилчи бир сагъатха айлыкъ хата этер.
Эли джокъну – кёлю джокъ.
«Ма», - дегенни билмесенг, «бер», - дегенни билмезсе.
Ичимден чыкъды хата, къайры барайым сата?
Кёзню ачылгъаны – иги, ауузну джабылгъаны – иги.
Мухар, кеси тойса да, кёзю тоймаз.
Азыгъы аз, алгъа къабар, аты аман, алгъа чабар.
Тыш элде солтан болгъандан эсе, кесинги элде олтан болгъан игиди!
Къартны бурнун сюрт да, оноугъа тут.
Таукел тауну аудурур.
Эринчекни аурууу – кёб.
Окъумагъан сокъурду, сокъур ташха абыныр!
Къайгъы тюбю – тенгиз.
Билген билмегенни юретген адетди.