- Сууда джау джокъ, кёб сёзде магъана джокъ.
- Къанны къан бла джуума, аманны аман бла къуума.
- Ётюрюкчюню шагъаты – къатында.
- Эртде тургъан бла эртде юйленнген сокъуранмаз.
- Тил – кесген бычакъ, сёз – атылгъан окъ.
- Чакъырылгъанны аты, чакъырылмагъанны багъасы болур.
- Алгъанда – джууукъ, бергенде – джау.
- Ата джурт – алтын бешик.
- Адам къыйынлыгъын кёлтюрюр, зауукълугъун кёлтюрмез.
- Тёрени джагъы джокъ.
- Джаралыны джастыгъында сау ёлюр.
- Азыкълы ат арымаз, къатыны аман джарымаз.
- Кёб ант этген, кёб ётюрюк айтыр.
- Тау башында, тау болмаз, джангыз терек, бау болмаз.
- Кёб джашагъан – кёб билир.
- Сагъышы джокъ – джукъучу, акъылы джокъ – къаугъачы.
- Адеб этмеген, адеб кёрмез.
- Акъыл неден да кючлюдю.
- Суугъа – чабакъ, къаягъа – ыргъакъ.
- Хатерли къул болур.
- Таякъ этден ётер, тил сюекден ётер.
- Къонакъ кёб келюучю юйню, къазаны отдан тюшмез.
- Къонагъы джокъну – шоху джокъ.
- Уллу айтханны этмеген – уллаймаз.
- Акъдан къара болмаз.
- Этни бети бла шорпасы.
- Акъыллы эркиши атын махтар, акъылсыз эркиши къатынын махтар.
- Къатын къылыкъсыз, эр тынчлыкъсыз.
- Азыгъы аз, алгъа къабар, аты аман, алгъа чабар.
- От кюйдюрген, сау болса да, тот кюйдюрген, сау болмаз.
- Хансыз джомакъ болмаз.
- Джарлы тюеге минсе да, ит къабар.
- Чалманны аллы къалай башланса, арты да алай барады.
- Сакъламагъан затынга джолукъсанг, не бек къууанаса, не бек ачыйса.
- Чабакъсыз кёлге къармакъ салгъанлыкъгъа, чабакъ тутмазса.
- Къонакъ аз олтурур, кёб сынар.
- Эринчекни аурууу – кёб.
- Ашыкъгъанны этеги бутуна чырмалыр.
- Къатыны харакетли болса, эри къымсыз болур.
- Хунаны тюбюн къазсанг, юсюнге ауар.
- Тойгъанлыкъ къойгъа джарашады.
- Билим – акъылны чырагъы.
- Ышармагъан – кюлмез, кюлмеген – къууанчны билмез.
- Къайтырыкъ эшигинги, къаты уруб чыкъма.
- Орну джокъну – сыйы джокъ.
- Тили узунну, намысы – къысха.
- Къуллукъчума, деб махтанма, къуллукъ – хаух джамчыды!
- Алма терегинден кери кетмез.
- Магъанасыз сёз – тауушсуз сыбызгъы.
- Зарда марда джокъ.