Аудио :: Аудио:: Хапчаева Р

Ёнгкюч къууана барыр, джылай келир.
Чыбыкълыкъда бюгюлмеген, къазыкълыкъда бюгюлмей эди.
Эркишини аманы тиширыуну джылатыр.
Орну джокъну – сыйы джокъ.
Чарсда алчыны эл кёреди.
Тилсиз миллет джокъ болур.
От этилмеген джерден тютюн чыкъмайды.
Намыс болмагъан джерде, насыб болмаз.
Мухар, кеси тойса да, кёзю тоймаз.
Зар адам ашынгы ашар, кесинги сатар.
Ашхы адам – халкъ байлыгъы, ашхы джер – джашау байлыгъы.
Сагъыш – къартлыкъгъа сюйюмчю.
Аман адам элни бир-бирине джау этер.
Игини сыйлагъан адетди.
Минг тенг да азды, бир джау да кёбдю.
Чомартха Тейри да борчлуду.
Сангырау къулакъ эл бузар.
Джюрек кёзден алгъа кёрюр.
Эл ауузу – элек, анга ийнаннган – халек.
Эм уллу байлыкъ – джан саулукъ.
Кюл тюбюндеги от кёрюнмейди.
Ач, тоймам, дейди, тойгъан, ач болмам, дейди.
Чабакъгъа акъыл, табагъа тюшсе келеди.
Чалманны аллы къалай башланса, арты да алай барады.
Сибиртки да сыйлы болду, кюрек да кюнлю болду.
Къарыусузгъа кюлме, онгсузгъа тийме.
Кюн – узун, ёмюр – къысха.
Суугъа – чабакъ, къаягъа – ыргъакъ.
Чакъырылгъанны аты, чакъырылмагъанны багъасы болур.
Юйюнг бла джау болгъандан эсе, элинг бла джау бол.
Сютню башын джалагъан къутулур, тюбюн ичген тутулур.
Ашда – бёрю, ишде – ёлю.
Аджаллыгъа окъсуз шкок атылыр.
Кёрмегеннге кебек – танг, битмегеннге сакъал – танг.
Ишленмеген джаш – джюгенсиз ат, ишленмеген къыз – тузсуз хант.
Джумушакъ сёз къаты таякъны сындырыр.
Магъанасыз сёз – тауушсуз сыбызгъы.
Къобан да къуру да къобханлай турмайды, адам да къуру да патчахлай турмайды.
Эл ауузу – элия.
Аурууну келиую тынч, кетиую – къыйын.
Ариуну – ауруу кёб.
Гырджын – тепсини тамадасы.
Башда акъыл болмаса, эки аякъгъа кюч джетер.
Эркишиге тары кебек танг кёрюнюр.
Бюгюн дуния кибик, тамбла ахыратды.
Биреу къой излей, биреу той излей.
Кийимни бир кюнню аясанг, минг кюннге джарар.
Нарт сёз – тилни бети.
Ачылгъан эт джабылыр, кёрген кёз унутмаз.
Кёзню ачылгъаны – иги, ауузну джабылгъаны – иги.

Логин:	Регистрация

Пароль:	Забыли пароль?

Запомнить меня

Аудио

Хапчаева Р

Скачать

Адрес