Translit
Жюреклеге тюшген такъыйкъала
08.01.2017
0
371
Бу сурат 1970 жылда 1 сентябрьде Хасанияны орта школунда алыннганды. Ол кюн ары халкъыбызны атын белгили этген жазыўчуланы къаўуму келген эди. Аланы араларында Къайсын да.
Устазла, школчула да къонакълагъа бет жарыкълы тюбегендиле. Сабийле назмучуланы чыгъармаларын кёлден айтып, аланы ыразы этип, акъылманланы насийхат сёзлерине къулакъ салып тынгылагъандыла. Таматала да къуру къолла бла келмеген эдиле. Биринчи классха баргъанлагъа Къулий улуну сабий китапларын саўгъалагъан эдиле.
Аллында тизгинде - ол саўгъалагъа къуўаннган къаўум школчу. Экинчи тизгинде солдан онгнга малкъар тилден бла адабиятдан устаз Чочайланы Хусейди. Аны къатындагъы белгисизди, школну устазы Аналаны Халимат. Жазыўчула Тёппеланы Алим, Макытланы Сафар, Шахмырзаланы Саид, мектепни ол жыллада директору Къайгъырмазланы Асият, Къулийланы Къайсын, Толгъурланы Зейтун. Аланы жанындагъыла уа устазла Созайланы Тамара, Къарчаланы Шама, Клавдия Скачкова. Бирсиле да школну окъуўчулары бла хунерли устазлары.
Суратдагъы белгили жазыўчуларыбыз бюгюнлюкде дунияларын алышхандыла. Жаннет ахлулары болсунла. Бу школчуланы араларында уа ол жарыкъ тюбешиўню эслеринде тутханла да табылырла.
Аламат къыйматлы суратны уа Къарчаланы Шама сакълагъанды. Ол школда жыйырма алты жыл ишлегенди. Бюгюн а аны туўгъан кюнюдю. Анга жетмиш беш жыл толады. Алгъышлайбыз, узакъ ёмюр тежейбиз. Миллетибизни кюнюн жарыкъ этер ючюн ол жыллада кючлерин-къарыўларын аямагъан устазларыбызгъа хурмет этебиз, ала бла ёхтемленебиз.
Османланы Хыйса,
Комментариев нет