Керти хакъдан, Рамазан - муслиман адамла джюреклери бла тансыкълаб, сау джылны кюсеб, тургъан байрамды. Бу айда сагъышынг да, джюрегинг да Сыйлы Аллахны нюрю бла байланыб, Аны ючюн этген къуллугъунг, артыкъсыз да татымлы да, хайырлы да болады. Сау, эсен джетиб, Рамазан айны кёрген адам, танг белги бергенден башлаб, кюн батхынчы дери, кесин ашдан, суудан тыйгъан бла къалмай, этген ишин, айтхан сёзюн, къалгъан кюнледен эсе бегирек эслерге керекди. Аны себебли, бу ай, адамгъа тюз джолну кёргюзюб, ол джол бла джюрютюб, ишни да сёзню да игисин юретген айды. Къуру сёзле бла бу айны берекетини уллулугъун толусу бла киши ангылаталмаз. Файгъамбарыбыз Мухаммад, Аллахны саламы аннга болсун, Рамазанны юсюнден алай атханды: "Аллахны къуллары Рамазан айны ашхылыгъын толусу бла ангыласала, аны джыл бла тенг болурун кюсер эдиле".

Ораза тутхан адет джер юсюнде хаманда да болгъанлай тургъанды. Алимлени айтханларына кёре, ораза тутхан адет, Аллахха табынганны шарты болуб, адам юйюрю къуралгъандан бери Аллахдан келген Джорукълада буюрулгъан халда хаманда сагъынылгъанлай тургъанды. Адам файгъамбардан башлаб, Къуранда айтылгъан бир Файгъамбар къалмай, оразаны кеслерида тутуб, ызлары бла айланнган умметлерине да - тутугъуз деб буйюрукъ бергендиле.

Бизни динибизда аллахдан келген тюз дин болгъаны себебли ол джорукъ, Къуранда, Аллахны игилиги бла, буюрулуб турады. "Аль-бакъара", деген сураны 183-185 аятларында Аллаху Тагъаля былый айтады:

"Эй, ийман келтиргенле! Сизге дерилеге джазылгъан кибик, сизге да ораза борч болуб джазылды. Сиз Аллахдан къоркъгъанладан болур эсегиз а, мардалы санау кюнле. Сизден биринг не ауруулу, не джолоучу болса, оразасын ачсын да, артда анча кюнню башха кюнле бла толтурсун. Алай а, къыйналыб тута эсе (не сау болмазлыкъ ауруу болуб, не къартлыкъ ючюн) анга джулуугъа мискиннге аш ашатсын. Биреу кеси разылыгъы бла тутса, ол анга хайырлыды. Билсегиз, ораза тутуу сизге хайырлыды. Рамазан ай - адамлагъа тюз джолну кёргюзте, хакъны баям эте, (кертини - ётюрюкню) арасын айыра келген Къуран, тюшген айды. Сора сизден ол айгъа ким туура болса, ол айны ораза тутсун. Не ауруулу, неда джолоучу болса ачсын да, анча кюнню башха кёзюуде тутсун. Аллах сизге аны бла къыйынлыкъ излемейди, тынчлыкъ излейди. Сиз ол санны толтуруругъузну излейди. Сизни тюз джолгъа тюзетгени ючюн, Аны уллуларыгъызны да излейди. Сиз Анга шукур этер эсегиз а".

Багъалы эгечле бла къарнашла!

Сыйлы Аллахдан игиликле джер юсюне хаманда джаугъанлай турадыла. Алай а, аланы кёбюсю, адам улугъа къабыл, Рамазан айда болгъандыла . Эм уллу игиликлени башы - Сыйлы Аллахдан келген Къуранды да, ол да бу байрамлы, сыйлы, берекетли айда берилгенди Джабраил мёлекни "къолуна". Келигиз, биз да, Адам улу къуралгъандан бери келген адетни бузмай, Сыйлы Аллахны рахматына хазыр болайыкъ!

Аллах тутхан оразагъызны къабыл этсин!

Ораза тутууну шартлары

Игътикяф

Гъеид намаз

Тарауих намаз (трапы намаз)

Орус тилде (На русском языке )