Жангы келиннге - насийхат сёз
02.02.2017
0
3328
Арт заманлада тойну адетдеча бардыра, алгъыш айта билгенле да аз болгъандыла. Аны себепли бир къуўанчда жангы келиннге акъсакъалладан бири айтхан сёзлерин бек жаратханма, аллай адамыбыз болгъанына да ёхтемленнгенме. Аланы уа Хасанияда жашагъан юч къызны бла бир жашны атасы Хапаланы Идирис айтханды. Мен ол насийхатны жазып алгъанма. Окъуўчулагъа да хычыўун кёрюнюрле деген акъылдама.
«Къызым, шукур Аллахха, сени бу къуўанч кюнюнге жетдик. Энди сен башха юйге бараса, танымагъан босагъадан атларыкъса. Сабыр бол, онг аягъынгы салыр жерни сайла. Эсингде тут: хар элни къой союўу башха болгъанча, хар юйню да башхады турмушу, адети. Ол себепден биринчи кюнюнгден башлап къабыргъангы баргъан жеринге келишдир. Келин къайын анасы къол жуўгъан суў бла басылгъанды дерча бол.
Ниетинги таза тут. Баргъан юйюнгде акъсакъ бар эсе, сен да таякъгъа таян, сокъур бар эсе, кёзлюкле сал, тилсиз бар эсе, аны ангыларгъа юйрен. Хычиннге жаў жарашханча, алай жараш къайынларынгы хуналарына. Жашаўда жюреклени жапсаргъан ариў, жумушакъ сёзле кёпдюле, ма аланы жюрют тилингде.
Сен баргъан юй санга атангы юйюнгден да багъалы болсун. Не гитче ишекликни да жюрегингде басаргъа кюреш, кёлкъалды этме. Кёлюнгю ачыкъ тут, мангылай жарыгъынгы да къурутмай тур. Гурушха отну жандырмасанг, тютюн чыгъарыкъ тюйюлдю. Сени ишинге, халинге, акъылынга, сёлешгенинге кёп кёз сынап къарайды. Аны ангылап, жашаўда тюз жол бла барсанг, насыплы, юлгюлю, махтаўлу болурса.
Жаннга тийиў, жюрек къыйынны суўда уўучунгда тузнуча эрит. Ушхуўурунгу жюрек ыразылыкъ бла эт. Кимге да азыкъны ышара сал. «Аш татлы болсун!» -деп айта бил. Сен этген азыкъ хычыўун, татыўлу да кёрюнсюн!
Сюйюп баргъан адамынг бла къуўанч бла кёп жылланы жаша! Аны юйюню хаўасы санга жарыкълыкъ берсин! Анда ашагъан ашынг балча татлы болсун! Бир хаўаны солуйсуз, саў-эсен жашагъыз, бир биригизни аягъыз, намысны сакълагъыз, ийманлы болугъуз!
Насыплы, узакъ ёмюрлю, толу юйдегили болугъуз! Ниетигиз бир, атламыгъыз огъурлу болсун! Муратларыгъыз бирден толсунла! Тыпыр отугъуз ёчюлмесин!»
Холаланы Марзият жазып алгъанды,
Комментариев нет