Расширенный поиск
9 Декабря  2016 года
Логин: Регистрация
Пароль: Забыли пароль?
  • Зар адам ашынгы ашар, кесинги сатар.
  • Насыблыны баласы кюн кюнден да баш болур, насыбсызны баласы, кюн кюнден да джаш болур.
  • Адам бла мюлк юлешмеген эсенг, ол адамны билиб бошагъанма, деб кесинги алдама.
  • Гугук кесини атын айтыб къычыргъанча, мен, мен деб нек тураса?
  • Юре билмеген ит, къонакъ келтирир.
  • Суугъа – таянма, джаугъа – ийнанма.
  • Атлыны кёрсе, джаяуну буту талыр.
  • Тойгъан джерге джети къайт.
  • Джыйырма къойну юч джыйырма эбзе кюте эди.
  • Къобан да къуру да къобханлай турмайды, адам да къуру да патчахлай турмайды.
  • Адамгъа аман кюн соруб келмейди.
  • Къатын байлыкъны сюер, эр саулукъну сюер.
  • Джаз бир кюнню джатсанг, къыш талай кюнню абынырса.
  • Чоюнну башы ачыкъ болса, итге уят керекди.
  • Тамбла алтындан бюгюн багъыр ашхы.
  • Рысхы – сют юсюнде кёмюк кибикди.
  • Айранны сюйген, ийнек тутар.
  • Аман къатын алгъан, арыр, иги къатын алгъан джарыр.
  • Биреуге аманлыкъ этиб, кесинге игилик табмазса.
  • Артына баргъанны, къатына барма.
  • Джетген къыз джерли эшекни танымаз.
  • Эли джокъну – кёлю джокъ.
  • Билимсиз иш бармаз.
  • Чабакъ башындан чирийди.
  • Джаным-тиним – окъуу, билим.
  • Аманнга алтын чыдамаз.
  • Айырылмаз джууугъунга, унутмаз сёзню айтма.
  • Соргъан айыб тюлдю, билмеген айыбды.
  • Иги сеники эсе да, сюйген кесимикин этеме.
  • Ачыкъ джюрекге джол – ачыкъ.
  • Сёлеш деб шай берген, тохта деб, сом берген.
  • Келгинчи, къонакъ уялыр, келгенден сора, къонакъбай уялыр.
  • Нёгер болсанг, тенг бол, тенг болмасанг, кенг бол.
  • Сакъ юйюне сау барыр.
  • Чомарт бергенин айтмаз.
  • Сёз садакъдан кючлюдю.
  • Ана – юйню кюн джарыгъы.
  • Джаш болсун, къыз болсун, акъылы, саны тюз болсун.
  • Эки къатын алгъан – эки ташны ортасына башын салгъан.
  • Ат да турмайды бир териде.
  • Этек чакъмакълары баш джаргъан, сёлешген сёзлери таш джаргъан.
  • Аман адам элни бир-бирине джау этер.
  • Биреуге аманлыкъны тилеме да, кесинге ашхылыкъны тиле.
  • Эри аманны, къатыны – аман.
  • Къайгъыны сюйген, къайгъы табар.
  • Таш бла ургъанны, аш бла ур.
  • Ата – билек, ана – джюрек!
  • Чакъырылмагъан джерге барма, чакъырылгъан джерден къалма.
  • Кёб къычыргъандан – къоркъма, тынч олтургъандан – къоркъ.
  • Сабийликде юретмесенг, уллу болса – тюзелмез.

Стихи Зейтуна Геккиева

28.06.2010 0 1235

Имя Зейтуна в первый раз прозвучало во время первого концерта Государственного фольклорно-этнографического ансамбля "Балкария" 24 января 1989 года. Зейтун, молодой юноша, который за одну ночь написал песню о переселении, и вечером, придя на концерт, осмелился попроситься на сцену исполнить её для зрителей. Тогда еще боялись открыто говорить о депортации. Организаторы концерта - общественное объединение "Ныгъыш" - оценили смелость молодого исполнителя, и Зейтун выступил перед зрителями. "Пока я пел, - вспоминает Зейтун, - не мог поднять голову - было очень неловко: первый раз на сцене и песня только написана. Когда закончил петь, в зале стояла тишина. Тут мне действительно стало страшно, но вот, я медленно поднимаю глаза и вижу, как женщины, сидящие в первых рядах, плачут... Зал аплодировал стоя".

Кёчгюнчюлюкню кюню
Малкъар элле ёмюрде унутмазла,
Сегизинчи мартны эртенин.
Заманнга кёре айталмай турдула
Малкъар халкъы къаллай зарауатлыкъ кёргенин.
О, таулу халкъым, сен кёрмеген не къалды?
Ачлыкъдан, жалангачлыкъдан къыйналгъан халкъым!
Бир минг тогъуз жюз къыркъ тёртюнчю жылны эске тюшюре,
Жырлайма мен бу жырны сюйген Малкъар миллетиме!
Боран ургъанча жетдиле таулагъа,
Аскерчиле санап бизни жаулагъа.
Халкъ, ангыламай, къарайды алагъа,
Къыйынлыкъ келгенин билмей Малкъаргъа.
Заман бермей хапчукларын жыйаргъа,
Хазыр болуп окъдан атып жояргъа,
Таулуланы машналагъа жыйдыла
Элтип товар вагонлагъа къуйдула.

Эжиуу
Мен бу жырны жырлайма алагъа;
Къыйынлыкъ кёрген атам бла анама,
Жаныбыздан сюйген бийик таулагъа,
Кёчгюнчюлюк сынагъан адамлагъа.

                                                    2
Туугъан эллерин къойалмай таулула,
Амал тапмай башларын къутхарыргъа.
Тюзлюк излей, тилек тилей Аллахдан,
Жиляй-жиляй кете элле тауладан.
Жоллары айланнганед Казахстаннга,
Жюреклери къалгъан эди таулада.
Тау сууларыча саркъа жилямукъла,
Сарнай баралла таулу тишириула.

Эжиуу
Мен бу жырны жырлайма алагъа;
Бу затлагъа чыдагъан адамлагъа.
Ары жетмей жан берген пакъырлагъа,
Темир жолну жанында къабырлагъа.
                                3
Азияда окъуп билим алалмай,
Комендантсыз башха элге баралмай,
Сыныкълыкъны сынап, тёзюп къадаргъа,
Жашадыла саналмайын адамгъа,
Къарт къарыусуз атала бла анала,
Къум тюзледе эллерине тарала,
Къагъанакъла ашдан тоймай къычыра,
Жата элле бешикледе жан ала.

Эжиуу
Мен бу жырны жырлайма алагъа;
Тифден ёлген ата къарындашлагъа.
Андан бери къайталмагъанлагъа,
Азиядагъы таулу къабырлагъа.

                  4
Къазауатдан келген таулу жашла уа,
Эллеринде киши тапмай къыйнала.
Юйюрлерин къайда табаргъа билмей,
Элден элге айлана элле излей.
"Не этгенле къырал ючюн ёлгенле,
Къазауатдан къолсуз, бутсуз келгенле" -
Деп жазгъанды бизни Къайсын Москвагъа
Назмуларын чыгъаралмай басмагъа.

Эжиуу
Мен бу жырны жырлайма алагъа;
Урушда ёлген таулу жашлагъа.
Къаллайда да тюрленмеген тюз башха,
Бизни Кязимге салынган сын ташха.

5
Ахырда мени айтырым келеди -
Кёчгюнчюлюкню билирге керекди.              
Унутмайыкъ миллетибиз кёргенин,
Унутмайыкъ Азияны тюзлерин.
Унутмайыкъ ачлыкъдан ёлгенлени,
Унутмайыкъ къыйынлыкъ бергенлени.
Берия бла Сталин этген хатаны,
Унутмайыкъ биз сегизинчи мартны.

Эжиуу
Мен бу жырны жырладым алагъа;
Чечен миллетге эм Ингушлулагъа,
Къарачайны, Малкъарны адамына,
Кёп ёмюрлени жашасынла ала!


Керек жолла
Къырал закон, шариат
Эм да адет тюбешип,
Башладыла даулашны,
Тюзлюк черте ёчешип.

Айтды закон: - Менме тюз,
Эркин болсун хар адам,
Этмегиз мени учуз,
Салырма уллу заран!

Адет къоркъуп зорлукъдан,
Болмаса да ыразы,
Мурулдады ачыудан,
Кючден чыгъа ауазы:

-Тюз алгъынча амал жокъ,
Азлыкъ бизден кетмейди.
Кёп болгъанны къарны токъ,
Оноу бизге жетмейди!

Аманлагъа табынып,
Сый намыс да тюп бола,
Кяфырлагъа алданып,
Миллет барад жоюла.

Кёчюрген да этгенсе,
Къум тюзлени сынадыкъ.
Аз азапмы бергенсе,
Не кёрмедик, не къалдыкъ?!

Сёзю къатыдан къаты
Бола баргъанын эслеп,
Адет сёзюню артын
Бошады былай, тилеп:

 - Аллахны буйругъундан
Жетдик быллай болумгъа.
Закон, сени къолунгдан
Келликди тап къураргъа.

Таулуланы кеслерин,
Кишиге да салмай бой,
Къурашдырып чеклерин,
Жашау этерге бир къой!

Закон къагъытла жайып,
Эсин алагъа атды.
Этгенча терсге айып,
Башында чайкъайды айтды:

- Тинтип билгенме тюзюн,
Адет, бу чырмауланы.
Халкъынг да ачсын кёзюн,
Къойдукъ жер къармауланы.

Бир къыралбыз, ангыла,
Чек бёлгенден не хайыр?!
Мен айтханнга тынгыла,
Кесинге табын айыр.

Дау сёзле тырмандыла,
Къачан да харамдыла.
Башхагъа амандыла,
Была уа тамамдыла!

Деп жыйды къагъытларын,
Кетерге хазырланып.
Шариат эслеп халын,
Къарады ачыуланып.

Сёз да къошмай ушакъгъа,
Ангылады боллугъун.
Закон кетди узакъгъа,
Адет кёрдю бошлугъун.

Къыйналды мудах болуп,
Амал тапмай азлыкъгъа,
Эскерди кёлю толуп,
Нек къалгъанын жакълыкъгъа.

Шариат, а адетни
Инг башына салып къол,
Айтды эрча: - Миллетни
Тюп этмезге, жигит бол!

Файгъамбар да къыйналгъанды,
Азлыкъ эди тыйгъычы.
Тюз жолунда сыналгъанды,
Ийман болду къылычы!

Сен да, адет, жашланы
Ийман бла бирлешдир.
Аллах сюйсе ташланы,
Къаяланы тепдирир!

Тазалыкъда умутха,
Жол да къысха болады.
Заман бара жумуртха,
Къуш болуп да учады!

Деп кёлюн жолгъа салып,
Адетни да къучакълап,
Къуранын къолгъа алып,
Кетди; тюз, сабыр атлап!

Шариатны айтханы,
Билейд тюзлюк къаманы,
Хар ишинде Аллахны,
Барды кеси заманы.

Окъуу халкъны онгун керир,
Ийман бизни къатласа.
Эркинлик къууанч да келир,
Миллет бирча атласа!


Былайды
Бирни берсенг, эки даулап кюрешме.
Бай болалсанг, ёхтемленип сёлешме.
Аллай болсанг ахырынг болур аман
Мардасызны бек ачытады заман!

Ёхтемликни къаты кепге жыялсанг,
Сагъышынгы тил озгъанын тыялсанг!
Жюрегинг да сабырлыкъ бла байланып,
Бу дунияда насып тапсанг айланып.

Унутмайын жарлылыкъда тешикни,
Амалсызгъа жабып къоймай эшикни,
Халаллыкъны сингдиралсанг къанынга,
Аллах берир къалгъанын да жанынга!

Жолоучу къартны осуяты.
Къутургъан адамланы ичиндесе, бил аны,
Чыдамайды тиллери сюзмей, сёкмей хар жанны.
Гяурланы жеринде къуру кесинге ышан,
Не кёрсенг да алада, этме хайырсыз тырман!

Келишип, къурашдырып, алдасынла бир бирин.
Кюрешсе да сау дуния, тазалама кирлерин.
Аллайланы керегин бермей къоймайды заман.
Тыйгъычы уа тилинги болсун хаманда ийман.

Жаула бары жыйылып, кётюрселе къаманы,
Даудан къоркъуп, ажашып, кечип къойма аланы.
Аманлыкъгъа игилик этсенг, жокъду эрлигинг:
Начаслагъа, билип къой, жокъду сени берлигинг!

Насып табар умутда,къыйналып жыйгъангы,
Жоюп арсар жумушгъа, билдирмейин тасхангы,
Алгъынча жарлы болуп, жангыдан башлаялсанг,
Керти эрсе бу ишге жарсымайын къалалсанг!

Бу затланы эскере, тенг болгъаннга - иги бол.
Жауларынгы къанындан жийиргенип тартма къол.
Жолоучу атламынгы узакъ  жолгъа хазырла,
Алышырса, бара бер, жылтырсала чабырла!
 
Ауруу кесип жолунгу, тёшек бла бириксенг,
Умутларынг юзюле, кюрешледен эриксенг;
Акъылынгы, санынгы, жанынгы мурат ючюн,
Къуллукъ этдир кесинге, къуруп чыдамны кючюн!

Мурдор ташы жашауну ёткюрлюкдю, сен ийнан,
Тынч тургъанны багъасы сом да жокъду санасанг.
Нелле кеме желпекле желсиз къалсала ала?
Кертиси бла айтханда - эски зыккыл быстырла!

Бу сёзлени айтдырды къыйын жолоучу къадар,
Жангыдан саулукъ табар, жокъду, билеме, мадар
Ахыр сёзюм былайды: ёлюм тюйюлдю палах,
Уллу Аллах, кеч мени, ля-илляха- илля-лах!


Керекле
Къоркъакъ жашар абына,
Харамлыгъын жашыра,
Къарыусузгъа къабына,
Онглуракъгъа баш ура.

Гудучу кече атда
Керти бийча айланады.
Экинчи кюн тутмакъда
Аман къулча сойланады.

Къалауур байны сакълайды,
Айлыгъына къызынып.
Учхан окъну къучакълайды,
Керек болса сызылып.

Керекге кёре къылыкъ,
Къайсы бирин санайым?!
Этмей сёзюмю сылыкъ,
Тюз тамырын къармайым:

Жут керек амал тапса,
Хыйлалыкъ бла кенгешип.
Бир кере татлы къапса,
Кюрешеди жерлешип.

Болалмаса кюч салады,
Тюзге терс атны жагъа.
Жарлыны онгун алады,
Сыйла тёзе властлагьа.

Керек - таплыкъ, тюзлюк - башха,
Тилни жокъду сюеги.
Киши урмаз башын ташха,
Тынчлыкъ тапса жюреги!

Сюйсенг ийнан, сюйсенг къой,
Харам жутлукъ тоймайды.
Салмасанг да тюзге бой,
Аллах ишин къоймайды!

Этимле
Туупэ эмип, ёсе барыу.
Ашап, ичип, къоша къарыу.
Окъуп, соруп, билим алыу.
Ишлеп, тырнап, мурдор салыу.

Андан ары - хаман сатыу,
Ырысхыгъа жанын атыу.
Алай бла ауруу табыу,
Аямайын дарман къабыу.

Сёгюу, сюзюу, тырман этиу,
Халаллыкъдан узакъ кетиу.
Ачыуу бла кеси къалыу,
Ахырында къартдан къатыу.

Башхада уа; Ийман излеу,
Намазлыкъда тилек тилеу,
Садакъадан асыу табыу,
Заман жетсе - кебин жабыу!

Этимлени буду иши,
Къутулдуму андан киши?
Ким да этер ахыр тартыу,
Къалайдады жашау татыу?

Къар амма
Къар жауады. Сабийле да къууанып,
Чыкъгъандыла чаначыкъларын алып.
Ойнау - кюлюу башланнганды орамда,
Къарындашлыкъ эсленеди къарамда.

Уллу тарта, чанада уа гитчеси,
Сау дунияны алгъан кибик экиси,
Тохтамайла гау-гуу этген тауушла,
Сеирдиле сабий - оюн жумушла.

Гитчечигин булжутады кюлдюрюп
Чана учад жангы къарны сюрдюрюп.
Кюнню халы сабийлеге ушайды
Къарны себин, ол да алай ойнайды.

Биринчи къар акъ мамукъча къуйюлду,
Сабийлеге уллу къууанч буюрду.
Женг, бучхакъ да толгъан эдиле къардан,
Уча келип эрикдиле чанадан.

Уллу жашчыкъ башлады токал этип,
Къар жуммакъны тенгерете, кебейтип.
Кюрешдиле жаякълары къызарып,
Гитче бала сюелген эди арып.

Солугъанда кирген эди оноугъа,
Къалай къалсын къатышмайын къалаугъа?!
Уллусу уа юч токалны битдирди,
Бир бирине, тапчыкъ салып, миндирди.

Эки бирча кёмюр ташдан кёзлери,
Топуракъдан тизилди тюймелери.
Таякъ къолгъа сибирки байланды,
Къанжал челек берк орнуна къапланды.

Къызаргъанча суукъдан, быхы бурун,
Къоша эди жомакъ чырайгъа нюрюн.
Къаралтсада кёмюр уну кенг аузун,
Ышаргъаны болгъан эди хычыуун

Сирелгенди арбазда сеир салма
Къонакъланы ышартады къар амма.
Аны кёрген, сабийликге къайытад,
Ол сагъатда къайгъыларын унутад!

Юч кюн амма, адамланы къарата,
Сюелгенди жюреклени жарыта.
Кюн тийгенлей, кёпге бармай, эриди.
Аз турса да, талай къууанч келтирди!

Хоразлача батырла
Ичги сёзюн тыйялмай,
Тегерекге жайгъанча.
Бир кишиден уялмай,
Кюсемлерин ачханча,
Хораз кюнню кёргенлей,
Бексиннгенча учаргъа,
Эртден жарыкъ келгенлей,
Къычырад, къанат къагъа!

Кёрюпмю этед къушну,
Бийикледе барыуун?!
Къадарына болушну,
Ангыламай жарауун,
Зарланнганча, танг атмай,
Излегенлей турады.
Къалай къойгъун ушатмай,
Арабызда туурады?!

Эслеп къарасанг зарлыкъ
- Къалайда да аманды!
 Келишмеген хоразлыкъ,
 Жашау жолда заранды!
Къылыкъны кепге жыйгъан,
Женгил ишчик тюйюлдю!
Кесин этимден тыйгъан
- Ол, а бошха кюйюмдю!
Къадарына сыйынмай,
Азмылла кюрешгенле?!
Кертиликге жыйылмай,
Башхагъа эришгенле,
Жан аурута къарайма,
Хораз кибик батыргъа.
Аллайла да жарайла,
Сезимни уятыргъа!

Чомартланы Хусейге
Къадар бирде къара булут
Болуп да тюшер жерге.
Бу кечеде къош ит улуп,
Къалдырады сейирге.

Туугъан кюнюнгю билгенча,
Ит улуйду тохтаусуз.
Тёгерекге дау этгенча:
"Къойдугъуз, - деп, - махтаусуз!"

Ит улуйду тилегенча,
Жазарыммы назмуну
Хрипин чалгъы билегенча,
Жити эте фахмуну!

Хусей харип, ёткюр улан,
Халаллыкъ абындыргъан.
Ашыкъдырды жаннган къаудан,
Ит болсун къабындыргъан!

Адам билгени хуртдакды,
Жашауунда къадардан.
Соруп билмезсе - узакъды,
Жууап чыкъмаз къабырдан!
Машинангы къызыу сюрюп,
Келе тургъаннга урдунг,
Оза бара, кёзюм кёрюп,
Жол жанына аудурдунг.

Мен Кямал бла болушалмай,
Ары-бери чабышдыкъ.
Доктурлагъа къошулалмай,
Тилеклеге жабышдыкъ...!

Эки сагъат жан бералмай,
Кюрешгененг къалыргъа.
Жаш юйдеги къураялмай,
Кирдинг, жарлы, къабыргъа!

Кюйдюм, жандым, не этеим,
Къайда амал буйрукъгъа?!
Бу назму бла белгилеим,
Атынгы окъурукъгъа.

Ата, ана бушууунда,
Аллах чегин салмайды!
Къан бла баргъан къошууунда
Ол арып да талмайды!

Жуукъларынг санга жиляй,
Юзюлюп умутлары,
Къанатлары сыннган къушлай,
Болдула Чомартлары!

Эгиз къарындашынг, Хасан,
Жюрегини жартысын
Асырады. Энди заман
Аллай бушу салмасын!

Болмагъанча кеп тенглеринг,
Эскертменги салдыла.
Малларынгда иелерин
Кермез кюннге къалдыла.

Къаудан жанды. Ахырында
Жанынг отну да озду.
Алтын шынжыр къабырынгда,
Кимни умутун бузду?!

Къайсы къызды кече келген,
Саугъангы къайытаргъан?!
Эртден дууанга сюйелген,
Болду муну айтдыргъан.

Тюз сирнекча терк кюйгени
Бу дунияда ёмюрюнг,
Жарсытады, эл сюйгени,
Эсден кетмейин нюрюнг!

Ариу, ачыкъ ышараенг,
Бетинг жарыкъдан толуп.
Жокъдан болум чыгъараенг,
Жумушха хазыр болуп.

Тёкдюм муну жюрегимден,
Аны бла да тойалмам.
Ахырда уа тилегимден,
Излем этмей къоялмам.

Тилегим къысхады мени,
Кёп сёзден болмаз хайыр:
Уллу Аллах, сен Хусейни
Жаннет ахлунга айыр!

Кимге да хакъ
Тауукъ бала жийиргенчли,
Къарап гаккы къабыны,
Баргъан кибик, излеп тенгни,
Ийлячинни алына,
Болма, терслик кёп жыкъса да,
Кертиликни чачыучу!
Бирледен кёлюнг чыкъса да,
Хакъ къанынгдан къачыучу!

Юч харам
Таулу, тохта, къой, ажашма,
Сабырлыкъны къыс белге!
Серликге тартынма, шашма,
Къулланма ибилисге!

Шах-шах гюлле, кендриш хансла,
Аракъыны барысы;
Алдан - алдау, ариу чарсла,
Артдан - жерни жар ызы!

Кече, кюн деп къарамасын,
Бу дуниялыкъгъа сабыр,
Башха затха жарамайын,
Къазадыла тар къабыр!

Къан тамыргъа шах-шахланы
Къайнатып, къошсанг жауун,
Тынч юйюнге палахланы
Жайярса даулукъ ауун.

Кирген тынды, ойнагъанча,
Чыгъар жолун тапмазса!
Ачы чайыр чайнагъанча,
Ийнан, татлы къапмазса!

Атанг-ананг, юйюнг-кюнюнг,
Андан учуз кёрюнюп,
Айланырса, кетип тюнюнг,
Сер токълуча, сюрюшюп!

Ол чарс жашау къоймаз Жанны,
Тёгерекде изеусюз.
Ырысхынгы къабып, саны
Этип къояр тиреусюз!

Адамлыкъны тас этерсе,
Кичиугъа ушар халынг.
Урлау-тоноугъа жетерсе,
Тонгузгъа санар халкъынг!

Санамайма аурууланы,
Басынырла тютюнча.
Бек кюсерсе уколланы.
Бала анна сютюнча!

Не иги да тюпге тюшер,
Ишексизлик бол анга!
Ата-ана ичи кюйер,
Къыйналып наркоманнга!

Кендрашха бёленнген мыйынг,
Сыйлар кесин махтаусуз.
Чам сант кезиу-жашлыкъ жайынг,
Тартындырыр тохтаусуз!

Заман бара акъылынгы,
Къуу терекча къурутур!
Къартлыгъынгда сакъалынгы,
Сантлыкъ тёрюне бурур!

Аракъыдан эсиргенле,
"Къаты" тенглик тутарла,
Аязгъанда - тау сюргенле
Кеф тиллерин жутарла!

Чагъыр къуйгъан жигитлик да,
Эс жыйгъанда- чычханчыкъ,
Жёнглерингдеги итлик да,
Билинеди бек ачыкъ!

Юй бийченги, сабийлени,
Сыйын тюпге басарса.
Къыдырсанг да бийиклени,
Ичсенг-кирни къазарса!

Гурт тауукъча багушланы
Тырнап, ийисин жая,
Атып керек жумушланы,
Жюрюрсе тюзде тая!

Жангылгъанма! Гурт тауукъла
Бала ючюн гурулдай,
Ичгичиле - бош зауукъла,
Къан ичерге мурулдай!

Тауукъ - хайыр, сен а - хата,
Этмезчамыды сагъыш?!
Ким да бичсин мынга багъа;
Жауду аракъы алгъыш!

Эсиргенде тазалыкъны
Сом да жокъду багъасы!
Аллай кюнде азатлыкъны,
Бек къысхады жагъасы!

Юч харамда жарамланы,
Жазыуума сингдирдим,
Ала салгъан заранланы,
Мингден бирин билдирдим!

Аыйп этмесин киши да;
Таулу деп башланнганнга,
Болсун ол чюйют, тиши да,
Бек ушар ташланнганнга!

Жашырмайма, кеси халкъым
Жарсытады кёбюрек!
Адамлыкъгъа болмам салкъын,
Ачыкълайым тюзюрек:
Адам, тохта, къой, ажашма,
Харамлыкъны кенге тюрт!
Керексизден тартма, шашма!
Жашауунгдан кирни сюрт!

 

(Голосов: 2, Рейтинг: 3)

  • Нравится

Комментариев нет