Расширенный поиск
29 Марта  2024 года
Логин: Регистрация
Пароль: Забыли пароль?
  • Эри аманны, къатыны – аман.
  • Джарлы тюеге минсе да, ит къабар.
  • Байлыкъ келсе, акъыл кетер.
  • Чакъырылмагъан къонакъ – орунсуз.
  • Баш болса, бёрк табылыр.
  • Эл элде бирер малынг болгъандан эсе, бирер тенгинг болсун.
  • Олтуруб кёрюнмей эди да, ёрге туруб кёрюне эди.
  • Аджашхан тёгерек айланыр.
  • Айтханы чапыракъдан ётмеген.
  • Иги бла джюрюсенг, джетерсе муратынга, аман бла джюрюсенг, къалырса уятха.
  • Ёлюк кебинсиз къалмаз.
  • Къонакъ аз олтурур, кёб сынар.
  • Иесиз малны бёрю ашар.
  • Джолунга кёре – джюрюшюнг, джагъанга кёре – юлюшюнг.
  • Адам боллукъ, атламындан белгили болур.
  • Бермеген къол, алмайды.
  • Къралынгы – душмандан, башынгы от бла суудан сакъла.
  • Чомартха Тейри да борчлуду.
  • Эр сокъур болсун, къатын тилсиз болсун.
  • Алтыда кюлмеген, алтмышда кюлмез.
  • Къыз келсе, джумуш эте келеди, къатын келсе, ушакъ эте келеди.
  • Иги сёз – джаннга азыкъ, аман сёз башха – къазыкъ.
  • Мухардан ач ычхынмаз.
  • Мал ёлсе, сюек къалыр, адам ёлсе, иши къалыр.
  • Тай асырагъан, атха минер.
  • Билимли ёлмез, билимсиз кёрмез.
  • Джетген къыз джерли эшекни танымаз.
  • Тёрени джагъы джокъ.
  • Адамны бетине къарама, адетине къара.
  • Байлыкъ болгъан джерде, тынчлыкъ джокъду.
  • Тенгни тенглиги джашай барсанг билинир.
  • Эр абынмай, эл танымаз.
  • Ач келгенни – тойдур, кеч келгенни – къондур.
  • Ёксюзню тилеги къабыл болур.
  • Тюкюрюк баш джармаз, налат кёз чыгъармаз!
  • Сабыр джетер муратха, сабырсыз къалыр уятха.
  • Къонагъынгы артмагъын алма да, алгъышын ал.
  • Келлик заман – къартлыкъ келтирир, кетген заман – джашлыкъ ёлтюрюр.
  • Чарсда алчыны эл кёреди.
  • Атадан ёксюз – бир ёксюз, анадан ёксюз – эки ёксюз.
  • Мураты болгъанны джюрек тебюую башхады.
  • Ашатыргъа иш – ашхы, ишлетирге аш – ашхы.
  • Атлыны ашхысы, ат тизгининден билинир
  • Азыгъы аз, алгъа къабар, аты аман, алгъа чабар.
  • Тили узунну, намысы – къысха.
  • Окъуусуз билим – джокъ, билимсиз кюнюнг – джокъ.
  • Къарт болгъан джерде, берекет болур, сабий болгъан джерде, оюн болур.
  • Окъдан джара эртде-кеч болса да бителир, сёз джара, ёмюрге къалыр.
  • Къулакъдан эсе, кёзге ышан.
  • Ишге юренсин къоллары, халкъ бла болсун джоллары.

Къарачай-малкъар халкъ джырла

12.09.2003 0 8808

 

АРИУЧУКЪ

Ёмюрде кишини сюймеген эдим
Сен ариучукъну кёргюнчю,
Аллыма къараб турурса, ариу
Мен Москвадан келгинчи.

Къолунгдагъы да ол портфельни
Сен бу акъ столгъа салсанг а,
Кесинг баргъан ол Москвагъа
Мени да ала барсанг а.

Кел, ариучугъум, да кел, ариучугъум,
Москва болсун элибиз,
Тансыкъ болсала письмо иерле,
Бек джалынсала келирбиз.

Бир ариу чыбчыкъ да ойнайды, наным,
Ол ташдан суугъа секире,
Къачаннга дери турлукъма, наным
Туугъан кюнюме ёкюне.

Ёмюрде кишини сюймеген эдим
Сен ариучукъну кёргюнчю
Аллыма къараб турурса, ариу,
Мен Москвадан келгинчи.

К списку песен

 

АЧЕЙ УЛУ АЧЕМЕЗ

Къазанланы Алийди
Кърым Семенланы чабыр киерге юретген,
Кесини къарт анасын
Кърым Семенлагъа сюйретген.
Кърым Семенлары
Азнаур къабакъгъа келдиле,
Ала анда Азнаургъа
Ханса, бийсе демедиле.
Азнаур къабакъны ала
Къазсыз, тауукъсуз этдиле,
Къазанланы къызбайны
Сауутсуз-сабасыз этдиле.
Кърым Семенлары андан
Ачемез къабакъгъа келдиле,
Бу элде ханнга бир кечеге
Кимни къатыны ариуду дедиле.
Ачемезни къатыны ариу Боюнчакъ
Бургъан чачлы, джумушакъ сёзлю,
Къара къашлы, дугъум кёзлю,
Татлы тилли ариу Боюнчакъ,
Къара шилли, мамукъдан джумушакъ.
Ачемезге Кърым хан келечи салгъанды,
Ол келечи салыб джигит Ачемезге баргъанды.

- Мени хан келечиге санга ийгенди,
Юйюнден дженгил кетсин дегенди,
Ариу Боюнчакъны хан излейди.

- Излей эсе, патчах бла хан бирди,
Башха болмай къатын бла джан бирди.
Ханны къатыным бла хатерин кёрелмем,
Джаным саулай къатынымы берелмем.
Ол джууаб бла ханны келечиси къайтханды,
Ханнга барыб бу хапарны айтханды.

- Итден туугъан Ачемез алай джигит эсе,
Атасындан къалгъан къой сюрюую къайдады?

- Хан къочхар башы, къой башы неге санайды,
Хан алай джигит хан эсе,
Алгъын туугъан тюнгюч уланы къайдады?
Алай айтханлай хан секириб тургъанды,
Сермеб алыб, сауутларын такъгъанды.

- Итден туугъан ит Ачемез, мында эсенг
Бери чыкъ деб, эшиклени къакъгъанды.
Ачемезни ариу къатынчыгъы Боюнчакъ
Эшиклени ачыб анга къарагъанды.

- Къурманынг болайым, аурууунгу алайым,
Ачемез юйден кетгенди, къорагъанды,
Тийрем, хоншум сёзчюдюле, джатма къой,
Джарыкъ айны бир кесек батма къой,
Эски ичиргилерибизни къакъма къой.
Хан къайтыб кетди кёзюуге дери эшикге,
Ачемез садагъын салыб турду тешикге.
Хан келиб тёше-мёшеге олтургъанды,
Ариу Боюнчакъ ханны чарыкъларын тартханды.
Джигит Ачемез садагъын чардакъдан атханды,
Акъ орунну къызыл къандан толтургъанды,
Ханны ёлюсюн эшик артына атханды.
Эртден бла ханны ёлюсюн салдыла чанагъа,
Джандетлени джети эшиги бош болсун
Ачемезни бизге табхан анагъа.
Ханны кёк кийизге чырмаб ийдиле,
Къатынына, ариу бийчеге саугъагъа.
Мени джауум къарасын ол кюн
Кёнделенде болгъан къаугъагъа.

К списку песен

 

БИЙНЁГЕР

- Гезох улу джигит туугъан Биинёгер!
Тамада къарнашынг Умар ит ауруудан ауруйду.

- Ауруй эсе анга дарманнга не джарар!

- Анга джарарыкъ акъ маралны сютюдю,
Аны тутарыкъ ана къарнашынгы итиди.

- Мен баргъан эдим ана къарналшарыма ит тилей,
Ала манга ит кючюкню бермелле,
Эгечден туугъанны къонакъ кибик кёрмелле.

- Санга ит бермеген, аны кибик, ит болсун,
Дуниядан да Бийнёгерлей тюб болсун.

- Андан бардым Къубайдийлеге ит тилей,
Ала мени къонакъ кибик кёрдюле,
Тилегенимде эки парий кючюк бердиле.
Аланы алыб мен уугъа айланыб тебредим,
Уллу Басханны тауларына ёрледим,
Тау башында айлана-айлана сорукъдум,
Узаймайын асхакъ кийикге джолукъдум.
Юч аякълы бир кийик чыкъды аллыма,
Быллай кюн келсин сюймегениме, къанлыма.
Юч аякълы бир кийик чыкъды аллыма,
Эки аягъындан ючюнчюсю бек мийик,
Учлары да чарыкъ тизген миз кибик.
Ол узакъ барды сабыр болуб атдырмай,
Ышаннга салыб атар кибик тохдамай.
Ол кийикни сюре-сюре тебредим,
Къарыууму бошаб, сагъыш этиб олтурдум,
Уучу башлыгъымы къар джуммакъладан толтурдум,
Къар джуммакъланы уруб, бачхыч этиб башладым,
Ёрлеб чыкъдым ол чынгыл къаяны башына,
Мыдахлыкъ келди Гезох улуну джашына.
Тёрт джанына къараб кийигими кёрмедим,
Дагъыда бираз барыб, сора эследим.
Бара-барыб тёгерегим тул-тубан болду, чарс болду,
Акъ маралым мени аллымдан тас болду.
Армау болуб бир кесекни мен турдум.

- Кийик эсенг, ышаннга салыб атма къой,
Саулукъ марал эсенг, эмчегингден тартма къой?
Джашырма да айт, сен шайтанмыса, джинмисе?
Мен шайтан да тюлме, джин да тюлме,
Мен кийик тюлме, ышаннга салыб атаргъа,
Саулукъ марал тюлме, тутуб эмчегимден тартаргъа.
Мен кийик тюлме, Апсатыны ариу къызыма,
Мени къоймай эсенг, сау къайтмагъын ызынга.
Ашадынг, ичдинг - этибизден тоймадынг,
Бизни бу къая ранлада къоймадынг.
Алай болса да, мен саннга бир иги алгъыш айтайым:
Тёбен джанынг тенгиз болсун, терк болсун,
Огъары джанынг мийик болсун, кёк болсун,
Эки кёнделенинг сени шайтан кирмез бек болсун,
Аны ичинде сени джашар кюнюнг кеб болсун,
Бизни къоймай эсенг адам келмесин къатынга.

- Мен тюбедим шайтан кибик кийикге,
Ол айтханча, тёбен джаным тенгиз болду, терк болду,
Эки кёнделеним, шайтан ётмез, бек болду,
Аны ичинде мени джашар кюнюм кеб болду.
Онбеш кюнню къая ранда джашадым,
Билек этлерими кесим тутуб ашадым.
Уучу итим манга къараб юргенинде,
Къая ранда къыйынлыкъны кёргенинде,
Бутларымдан кесиб анга ашатдым,
Онбеш кюнню этим бла джашатдым.
Къарачыгъыз къарнашы Умарны тюшюне,
Оналтынчы кюн табды излей келиб юсюне.
"Тюш" деб, кеб тиледи Бийнёгерден,
Къычырыгъын эштдирелмейин джерден.
Мадар табмай ол Холамгъа чабханды.
Холам, Чегем, Басхан къалмай келдиле,
Къая ранда Бийнёгерни кёрдюле,
Кеб мадарла, кеб лагъымла этдиле,
Мадар табмай ызларына кетдиле.
Къарнашы Умар кёз туурасындан кетмейди,
Бийнёгер а аны айтханын этмейди.
Умар аннгъа: Тюшмесенг, санга этерими айтайым, - деди.
Тамада къызынгы кюн чыкъгъаннга сатарма,
Кичи къызынгы кюн батханнга атарма,
Ариу къатынынгы къойнума алыб джатарма.

- Ол сёзледен манга хайыр чыкъмазын билеме,
Аланы айтыб энди менден тилеме,
Ёрлегенимча ызыма энер джол табмайма,
Джанымы сюеме, башымы къаядан атмайма.
Бабугейде барды мени тос къатыным,
Аны табсам, бир да кёбдю айтырым.
Анга билдиригиз, ол айтханча этерме,
Ол айтса, къаядан секириб кетерме.
Къарнашы Умар муну къабыл кёргенди,
Салыб барыб анга хапар бергенди.

- Къабартыда джашагъан келиним, къоб ёрге!
Къарнашым Бийнёгер хазырланнганды кёрюрге.
Тос къатыны тангнга дери къаты-къуту хант этди,
"Бийнёгер ёлген джерде ёллюкме" - деб ант этди.
Атланды ол, эки бутун ат этиб,
Къутас чачын саулай джамчы этиб,
Джылай-джылай кёлек аллын тамчы этиб,
Эки къолун бутларына къамчи этиб,
Чаба, джорта, ол Бийнёгерге джетгенди.

- Узалалсам, санга джетер зди билегим, - деди,
Къабыл болсун бюгюн этген тилегим.
Тюше эсенг тюш, тюшмесенг да
Ёлюгюнгю къая ранда къара къушла ашарла,
Сюйген тенглеринг кюе, бише джашарла.
Секир, ёлюгюнгю къая ранда тыймачы,
Джууукъну, тенгни керексизге къырмачы.
Кесим этген акъ кёлегинги кёзлеринге чырмачы,
Алтынлыны учундан тутуб быргъачы,
Кесинг ойнаучу акъ ёшюнюме чынгачы.
Акъ кёлекни кёзлерине чырмады,
Алтынлыны бурнундан тутуб быргъады.
Аллына тюшдю Бийнёгерни тёббе чырчасы,
Ол кюнден сора къысха тохтады Бийнёгерни кийик учасы,
Илиниб чыкъдынг мындан, темир ыргъакълай,
Андан чачылыб тюшдюнг, хычын джуммакълай.
Джангыз кекелчигинг тюшдю къатынынгы аллына,
Къыбдысын алыб урду джарлы къатын къарнына.
Мийикде кёреем Апсаты къызыны къаласы,
Былай болгъанды Гезохну джигит баласы.

К списку песен

 

ГАПАЛАУ

Ёксюз болуб ёсген эдинг, Гапалау,
Кёб къыйынлыкъ кёрген эдинъ, Гапалау.
Къарыусузгъа нёгер эдинг, Гапалау,
Анасына джигит туугъан Гапалау.
Сен джарлылагъа таянчакъ болуученг,
Ала ючюн сёзню таукел салыученг.
Къарыусузлагъа сен кёпюр салыученг,
Анасына джигит туугъан Гапалау.
Джарлы-къарыусузла ючюн кюрешдинг,
Алагъа джер юлюш алаыа дединг.
Тогъуз къама кириб ёлдюнг, Гапалау,
Анасына джигит туугъан Гапалау.
Эки эгечинги артха этгененг,
Джер юлешген джерге чыгъыб келгененг.
Къарыусузланы унутмагъыз - дегененг,
Анысына джигит туугъан Гапалау.
Стауатда тогъуз къазан къайнайды,
Джан джанынгъа тогьуз къама ойнайды.
Ой, кюнде тогъуз къама джылтырайды,
Анасына джигит туугъан Гапалау.
Артха турмай, намысынга уялыб,
Сермешесе къызыл къаннга боялыб.
Тогъуз киши да джан джанынгдан алыб,
Анасына джигит туугъан Гапалау!
Джан алмадынг тогъузаулан тюйгюнчюн,
Джан алмадынг тогъуз къама киргинчин.
Джыгъылмадынг тогъуз къама тийгинчин,
Анасына джигит туугъан Гапалау!
Атанг джокъду кёзюнгю джумаргъа,
Ананг джокъду къан башынгы джууаргъа.
Эгечинг джокъду къучакълаб джыларгъа,
Анасына джигит туугъан Гапалау!
Отунг кёмюлдю, эшигинг джабылды,
Джарлы, ёксюз, бары санга джылайды,
Чотчалада къатынынг къызлай къалды,
Анасына джигит туугъан Гапалау!

К списку песен

 

ДЖАНДАР
(Биринчи вариант)

О Джандар, Джандар, джанынг барсын кябагъа
Сатанай бийче да, ой тюшге эди арагъа.
Тамлыла джыйылдыла, ой, Гудух башы Лабагъа,
Къан чачылды да, ой, Гудух башы Лабагъа, дедим.
Ой бёлек къойну да кюн ортагъа сюре келгенем,
Амырхан улу да тамадабыз эди Хусей дедим а.
Эй тамлыланы мен Гудух башында кёргенме,
Кел, кесибизни бегитейик, биз а къазауат этейик, дегенме.
Амырхан улу Хусейин алай айтханды:

- Болалмайма мен а тейри сора кетмейин,
Къан джаугъан хапарны барыб Къарачайгъа хапар этмейин.
Къойланы алларында барды къашха къой,
Юлеш да юлюшюнгю башха къой.
Ой ортабызда чынар терек арамды,
Джер къачмайын а бюгюн былайчыкъдан ким къачар,
Аны анасындан, ой, ичген сютю харамды.
Къойчуну бир къолу къойда,
Бир къолу байда - дейдиле, о Хусейин,
Бюгюн барыбыз да керти уа къазауат этейик, дегенди,

- Хусейин, сен къачсанг а къара къамангы къоя къач.

- Огъай, Джандар, къара къамамы санга къоялмам, - деди.
Аны ючюн а аздан да бетими джоялмам.
Хусейин кетгенлей а
Къошубузну тёбен джаны
Джаяу къайынла,
Бу къайынлагъа о чаба джорта баргъанма,
Къайынладан а кьайын быкъылыкъла, тейри, алгъанма,
Къоркъуулу джашланы да мен къая раннга салгъанма.
Бычагъымы алыб а бир эки билеуге тутханма,
Джаныугъа тутханма,
Эшикден киргенлей сол тобугъуму джерге салгъанма,
Кирген тамлыланы къарынларын тартыб кетейим, дегенме,
Тогъуз  тамлыны да тамада мурджаргъа салгъанма.
Къарабашланы, ой, итден туугъан Махатчи,
Къарт анансын а бу тамлылагъа сюйретген,
Тамлыланы да ол тау къошлагъа юретген,
Ол а алай айтыб сора къычырды:

- Ой аман тамлыла уа, артыгъызны этдириб
Къоя шойсуз да.

- Да не этейик а хуна къошха
Атхан огъубуз кирмейди,
Не эте тургъанларын ичине киргенлерибизни уа
Киши билмейди - дегендиле.

- Алай болса хуна къошха отну салыгъыз,
Джандар джашны - таулу джашны тутуб
Багъа алыгъыз.
Ала да ол хуна къошха отну салдыла,
Джарлы да Джандарны да ала ортагъа алдыла, дейди.
Анам этген а болур кёкдюр гебенек,
Кёк гебенекни да, ой, чыркы сайын окъ тийди,
Аны да джиби сайын а къан сингди.

К списку песен

 

ДЖЁРМЕ
(Биринчи вариант)

Тау артындан аугъан эди малгар аскер,
Тау аллындан чыкъгъан эди зытчыу аскер.
Нёгерликге чийбыдырны джаратмалла,
Бара-барыб кылды кёпюрден ары атлалла.
Чийбыдыргъа бирер къамчи сермедиле,
Джашла барыб тау башына ёрледиле,
Ёрледиле, анда джёрме кёрмедиле.
Джёрме кетди мукъут болуб аргъы бетге,
Джюрюгюз, таш салдырайыкъ Орусланы Къалабекге.
Къалабекни сакъалында тюгю джокъду.
Аскер джашла ызларына тебредиле,
Изледиле, джёрмени уа кёрмедиле.
Эй, джёрме тюлдю, ногъана башды,
Джёрмеледе бир къаралды къачды.
Мени джёрмем джёрмеледен базыкъ эди,
Мени джёрмем сау аскерге азыкъ эди,
Мени джёрмем бир къарыннга джазыкъ эди.
Мени джёрмем бир улоугъа джюк болады,
Тышындагъы къара ичеги бир улоугъа джиб болады,
Чотчалада джёрме урлагъан, Шымаухалай, тюб болады.
Джёрме кетди бир тёнгереб шалбар аугъа,
Башы къалды Шымауханы джёрме даугъа.
Тышындагъы къара ичеги бир улоугъа джиб болады.
Джёрме амалтын Шымаухабыз нёгерине джалчы болур.

- Бир джёрмени эндиргенем, къарнымдады,
Бирси джёрме ташадады, къойнумдады,
Джёрмелеге бир учарым мени энтда бойнумдады.
Джёрме десенг от тюшеди Генджаханны абасына,
Ийнанмагъыз Чотчаланы тобасына.
Джау сюртюгюз джоргъа аджирни джууагына,
Джёрме дауну сиз айтмагъыз Шымауха деген алтынлыгъа,
Барыгъыз да тарыгъыгъыз Чотчалада къатынлагъа.
Игилени ашхы джерде сёзю болур,
Аманланы джёрмеледе кёзю болур.
Эртден бла эртденнгиде къобмагъанла,
Габашланы юйде излеб табмагъанла,
Табсала да бурунларын къаблагъанла,
Аркъаларын сенге буруб олтургъанла,
Отджагъаны бурун суудан толтургъанла,
Ийнелерин шалбар учха тюйрегенле,
Джыл кёзюне тюй бюртюклей юйрегенле...
Эй, джёрме, сени эшигинг бир къурусун!
Аллах берсин джёрмелени чынг уллусун!

К списку песен

 

ЗАРИЯТ

Джандетли болсун да ма Сюйюнчланы да Зарият
Этген ишинги да ма ушатмайды дунияда болгъан
Закон бла шериат.
Ой аллах айтса да мен эрге барлыкъ тюлме
Мени арбазыма да белги атларым а киргинчи,
Белги атыма да ёксюз къарнашчыгъым миннгинчи,
Бау аллы сабанны да белги ёгюзле бла сюргюнчк.
Ой мени анам, да мен эрге барлыкъ тюлме,
Мени джауум а бу ёге ананы сынасын,
О мени къанлым да анасы ёлюб джыласын.
Бу байрым кюнде да мен тойда тепсей тураем,
Алтыны кичиси да ма Махай келди аллыма.
Ол алайда уа ол алай айтханед:

- Бек тюз а болдунг да, Зарият, берген сёзюнге,
Къалай къарарыкъса да энди уялмай кёзюме?
Межгит аллында да сени Ахматха алдыла,
Мени джюрегиме да бир кетмез къайгъы салдыла.
Ой аны айтханлай да салыб юйюне келгенди,
Факъыр а кийимлерин а, ой тоба болсун, кийгенди.
Дуния кийимлерин да ол къолтугъуна чырмады,
Ол барыб башын а Бызынгы суууна быргъады.
Сууну аллын да ма шоркъа этиб тыяды
Сени кямарынгы да ма накъут налмаз а ташлары,
Зарият амалтын да суу юлюшю болалла
Уллу Бызынгы къыздан айбат а джашлары.
Ой сууну аллын шоркъа этиб тыяды
Сени кямарынгы да ой накъут налмаз а чюйлери,
Зарият амалтын а суу юлюшю болалла
Тоба болсун, Бызынгыны уллу бийлери.

Айрымканда да бир шейит ёлюк джатады,
Анга ётерге да бир бусурман базмайды.
Алтыны кичиси да ма алай айтыб чыгъады:

- Ол мени ючюн ёлсе мен да аны ючюн а ёлейим,
Джамагъат, буюругъуз да мен бу къара суугъа кирейим.
Алтыны кичиси Махай суугъа киргенди,
Ёлюкню да алыб ол джамагъатха келгенди.
Муну да бек джазыкъсындыла, кёрдюле,
Ёге анагъа да джамагъат налат бердиле.

К списку песен

 

ЗАУРБЕК

Кече джукълаб тургъанлай,
Бир аман тюшле кёргенме,
Малчы къошха къызылбекле
Келгенлерин билгенме.
Умут этдиле Къабартыгъа
Къаудан къошну сюрюрге,
Ышанмалла, бек сюйдюле
Келиб хапар билирге.
Келдиле да: Ой Заурбек,
Мында эсенг бери чыкъ! - делле,
Ай, аман Заурбек,
Итлеринги такъ! - делле.
Бизден къоркъма,
Санга хата джокъ! -делле.
Ышаннган эди алайда Заурбек
Ит тушманланы сёзюне,
Келиб къарадыла ала
Заурбек джарлыны кёзюне.
Бир-бирлерине къарашыб,
Ышардыла, ала кюлдюле,
Ол кюн сизни алайда,
Итле тахсагъызны билдиле.
Секириб туруб, о кече
Мен джан-джаныма къарадым,
Темир таякъ тюшдю къолума,
Халкъ болушсун Заурбекни джолуна.
Барыб къысылгъан эдим
Эски стауатны къатына,
Къаллай къара кюнле келдиле
Бу джазыкъ Заурбекни джанына.
О кече къошдан
От джарыкъла уралла,
Къошубузну толтуруб,
Къызылбекле олтуралла.
Тюшюмде алай кёргенем,
Хант быкъыгъа адам бёскюн асылыб,
О кюн тура кёреем
Ит къызылбекле къаудан къошха басыныб.
Ашыгъыш чабыб барыб,
Эшикни джанын сакъладым.
Джангызлай, о кече
Кесим онекисин къабладым.
Тамадалары Лугъубеж айтды:
Ышаным таб тюлдю,
Къарагъыз эшик аллына,
Быллай кюнле келсин
Мени сюймеген къаллыма.
Хант бише эсе къарагъыз къазаннга.
Бише эсе иги кёрюгюз,
Заурбекни эти бла къанындан
Манга тояр кибик беригиз.
Къыстагъыз къойланы,
Ышырайыкъ, джашла, кетейик,
Бюгече биз къачыб,
Ыбчыкъдан ары ётейик.
Къабартыдан келиб тюшдюле
Къан ичиучю обурла,
Тагъылыб, къалыб кетдиле
Кесинг асырагъан самырла.
Эшик артын сакълаб,
Бир бёлегини учасын алгъанма,
Бюгече быланы уруб,
Бир кесек энди къаннганма.
Лугъубеж чыкъгъан эди юсюме
Къарачыгъыз, аланла, ит къызылбеклени кючюне!
Юсюне чынгаб аны
Мен белинден буугъанма,
Бир кюн ёллюкме,
Бир кюн анамдан туугъанма.
Ай, аман къызчыкъ,
Джетиб самырланы джиберчи!
Къызчыкъ джетиб итлени джиберди,
Итле чабыб джетиб
Аны тишлерин алдыла,
Заурбек бла эгечи ол кече
Онеки ёлюкню сайлаб салдыла.

- Къарнашымы къызылбекле
Джетиб къойлай байлалла,
Ала аны ёлтюрюб,
Джалын къошха сайлалла.

К списку песен

 

КЁГАЛА

Кёкле тюбюнде кёкбаш юйледе
Джашайды ариу Кёгала,
Экибиз бирге кюйюб барабыз
Кёгала, санга тарала.

Джарыкъ джулдузча, сени тюрсюнюнг
Къууат салады шахаргъа,
Ышаргъанчыгъынг, ала кёзлеринг
Къоймайла бизни джашаргъа.

Субай санынга ариу джарашхан,
Кёк бетли чепкен киесе.
Экеулен болуб сени сюебиз,
Сен къайсыбызны сюесе?

Энди, ахыры, ачыкъ айтабыз,
Турмайын кенгден кёл ала,
Бу эки къолну къайсын тутарын
Кеси сайласын Кёгала.

Экибиз бирге аллынга келдик,
Бир-бирибизден уяла,
Халал тенглени харам этме да
Бирин сайлачы, Кёгала.

К списку песен

 

КЪАРАЧАЙ ДЖАШ БЛА КЪЫЗНЫ ДЖЫРЫ

Юйюбюзню башы ол мийик таула,
Тауланы тюбю тар сызгъа,
Атам берсе да къалай барлыкъма
Акъылсызгъа, малсызгъа.

Мени атам алай айтады:
Берлик тюлме джарлыгъа,
Атам берсе да къалай барлыкъма
Кеси тели болгъан маллыгъа.

Кютген къоюнг минг болсун,
Саугъан ийнеклеринг джюз болсун
Малланы юйю къуругъа этда
Башынгда акъылынг тюз болсун.

Мен барсам, аллай джашха барлыкъма,
Бармасам, былай къаллыкъма,
Кеси адамлыкъгъа тырмашхан,
Кийим юсюне джарашхан.

Мен барсам, аллай джашха барлыкъма,
Бармасам, былай къаллыкъма,
Уллу аджирге миннгеннге,
Джети тилни тамам билгеннге.

Мен алсам, аллай къызны аллыкъма,
Алмасам, былай къаллыкъма,
Чачын джуууб джыйгъанны,
Кесин кечеги тойдан тыйгъанны.

Мен барсам, аллай джашха барлыкъма,
Бармасам, былай къаллыкъма,
Арбазына арба киргеннге,
Стауатында ити юргеннге.

Мен алсам, аллай къызны аллыкъма,
Алмасам, былай къаллыкъма,
Бурун кибик чачын тарагъан,
Тойдан эсе тоннга къарагъан.

Мен барсам, аллай джашха барлыкъма,
Бармасам, былай къаллыкъма,
Сыртда джылкъы тыйгъаннга,
Къанджыгъагъа аркъан буугъаннга.

Мен алсам, аллай къызны аллыкъма,
Алмасам, былай къаллыкъма,
Къашлары былай кенгден къыйылгъан,
Бир кесекчик тойдан тыйылгъан.

Мен алсам, аллай къызны аллыкъма,
Алмасам, былай къаллыкъма,
Эртден бла эртде тургъанны
Машинаны къаты бургъанны.

Мен барсам, аллай джашха барлыкъма,
Бармасам, былай къаллыкъма,
Алтын къама такъгъаннга,
Алай аджирле бакъгъаннга.

Мен алсам, аллай къызны аллыкъма,
Алмасам, былай къаллыкъма,
Башында акъылын тыйгъанны,
Телиге ёрге тургъакны.

Мен барсам, аллай джашха барлыкъма,
Бармасам, былай къаллыкъма,
Тенглерине акъыл юлешген,
Джетеу бла кеси кюрешген.

Мен алсам, аллай къызны аллыкъма,
Алмасам, былай къаллыкъма.
Джангыз къарапанлай кёргенин алгъанны,
Кийимни бичиб салгъанны.

Мен барсам, аллай джашха барлыкъма,
Бармасам, былай къаллыкъма,
Къачда согъум къакълагъан,
Башын къатын сёзден сакълагъан.

Мен барсам, аллай джашха барлыкъма,
Бармасам, былай къаллыкъма,
Къыйнлыкъда онгсузун сакълагъан,
Зауукълукъда тенгин джокълагъан.

Мен барсам, аллай джашха барлыкъма,
Бармасам, былай къаллыкъма,
Ол алай къара таныгъан,
Халкъына алай джарагъан.

К списку песен

 

КЪАРГЪЫШ ИЙНАР

Къуран окъуй турама, бала,
Аптиек окъуб сен башла.
Джюрегиме ауруу салгъалла,
Джулкъунуб тюшсюн ол къашла.

Аягъымда чурукъла,
Джезден чюйленнген табаны.
Мени сюйгениме тийгеед
Ачы аурууну аманы.

Асыры сюйгенден этгенме,
Алан, къабдалынгдан кюбе тюб.
Сыйлы аллах къойгъаед
Мындан ингирге кюл этиб.

Сенден сора джокъмуду, алан
Шапкасын къалакъ киерик.
Бери айланыб къарай бар, бала
Белингден гёрох тиерик.

Юсюнгдеги схарла чепкенинг,
Чыркъ чыркъындан сёгюлсюн.
Менден сюйюб алгъан къызынгы
Джюрек къаны тёгюлсюн.

Джумарыкъ тауукъла чыгъалла
Агъачны къалын джеринден.
Аман окъла тийгеед, гяуур
Мангылайынгы кенгинден.

Ариу айтыб, джалынсанг да
Алдатмам сени сёзюнге.
Сенден да иги джашла бардыла,
Атангы аман кёзюне.

Буруу тюшсюн ичинге, бала,
Дыгалас этиб бурурча.
Къара талау тийгеед санга,
Сен чубар ала болурча.

Узалама да мен джеталмайма
Сени ариу узун санынга.
Ачыууракъ болуб бир аман къаргъадым
Къурман болайым джанынга.

К списку песен

 

ОЙ, ЮШЮДЮМ, ЮШЮДЮМ

Ой юшюдюм, юшюдюм,
Таудан алма тюшюрдюм.
Алмачыгъымы къабдыла,
Менге зыгыт атдыла.
Ол зыгытха базмайма,
Бу зыгытха базама,
Терен уру къазама.
Урудан чыкъгъан беш эчки
Бешиси да къайдалла?
Къазанчыкъда къайнайла.
Умар ашыкъ ойнайды,
Умар кетди отуннга,
Къаргъа битди бутума.
Къаргъа тюйюлдю, къамишди,
Бачхаларым пиринчди,
Он бармагъым кюмюшдю
Ал тишлерим химишди.

К списку песен

 

ФАТИМА

Эм алгъы бурун сюйюб башлагъанма
Ол ариу Фатима, атынгдан,
Ингирге дери туруб кеталмайма
Олтуруб турсам къатынгдан.

Фатима эте, ох, Фатима эте,
Акъ марал атадым атынга,
Тарыгъыуларымы бир айтырыкъ эдим,
Джууукъ олтурсанг къатыма.

Юйюгюзню арты ол терен кёлле,
Къайыкъла бла ётейик,
Бу джерни хауасы сеннге джарашмайды,
Биз тюз джерлеге кетейик.

Келчи кетейик, келчи кетейик,
Мен джер салайым тору атха,
Москвагъа барсакъ письмо да джазарбыз,
Салимахан бла Суратха.

Джурт сейирсиниб къарайды, Фатима,
Аллынгдагъы тарпан ызлагъа,
Москвадан къайтсакъ саугъа келтирирбиз
Бютеу бригадада къызлагъа.

Самолетха миниб учайыкъ, Фатима,
Айланырбыз Кавказ таулагъа,
Елгенле сени тилерик болмазла,
Мен да берлик тюлме саулагъа.

К списку песен

 

ЧАЛКЪЫЧЫКЪ

Алтын кюзде,
Колхоз тюзде
Чалкъычыла чалалла,
Джерни джюгюн,
Джашил тюгюн
Дюрюлеге салалла.

Мен таблайма,
Хыршылайма
Чалкъычыкъны ayyзун.
Алама да
Тынгылайма,
Эштемисиз тауушун.

Кёз ачыгъыз,
Кёл ачыгъыз,
Ишни къолгъа алайыкъ.
Ингир ала,
Бичен чала,
Кёб дюрюле салайыкъ.

Кюн тийгинчи,
Ханс кюйгюнчю
Ойнатайыкъ санланы.
Заман кетсе,
Кёзюу джетсе,
Ач этмезбиз малланы.

Колхоз къызла
Чалкъы ызда
Дюрюлени тырнайла.
Суу джетмезча,
Джел элтмезча,
Капналагъа быргъайла.

Биз аладан -
Капналадан
Къош гебенле къалайбыз.
Мийик-мийик,
Таула кибик
Антауланы санайбыз.

К списку песен

 

ЭШИКЛЕНИ  АРЫ  БИР АЧ

Эшиклени ары бир ач,
Ары бир кирейим,
Кёзлеринги ариулугъун,
Кесим бир кёрейим.

Кёзлерими ариулугъун
Билмегенмисе,
Чегетледе къара дугъум
Кёрмегенмисе,

Эшиклени ары бир ач,
Ары бир кирейим,
Къашларынгы ариулугъун
Кесим бир кёрейим.

Къашларымы ариулугъун
Билмегенмисе,
Акъ къаяда къара къундуз
Кёрмегенмисе?

Эшиклени ары бир ач,
Ары бир кирейим,
Санларынгы ариулугъун
Кесим бир кёрейим.

Санларымы ариулугъун
Билмегенмисе,
Чегетледе субай нарат
Кёрмегенмисе?

К списку песен

(Голосов: 1, Рейтинг: 5)

  • Нравится

Комментариев нет