Расширенный поиск
9 Июля  2025 года
Логин: Регистрация
Пароль: Забыли пароль?
  • Джангыз торгъай джырламаз.
  • Хазыр ашха – терен къашыкъ.
  • Тели турса – той бузар.
  • Къулакъдан эсе, кёзге ышан.
  • Адамны сабийин сюйген джюреги, бычакъча, джитиди.
  • Этек чакъмакълары баш джаргъан, сёлешген сёзлери таш джаргъан.
  • Тойну къарнашы – харс, джырны къарнашы – эжиу.
  • Джарлы джети элни сёзюн этер.
  • Рысхысына кёре, джаш ёсер, къышлыгъына кёре, мал ёсер.
  • Арыгъан къош чамчы болур.
  • Джолда аягъынга сакъ бол, ушакъда тилинге сакъ бол.
  • Аш кетер да бет къалыр.
  • Тюзлюк шохлукъну бегитир.
  • Джылкъыдан – ат чыгъар, тукъумдан – джаш чыгъар.
  • Билимли ёлмез, билимсиз кёрмез.
  • Кёлсюзден сёзсюз тууар.
  • Аурууну келиую тынч, кетиую – къыйын.
  • Кёл – къызбай, къол – батыр.
  • Кёб ашасанг, татыуу чыкъмаз, кёб сёлешсенг, магъанасы чыкъмаз.
  • Айтхан – тынч, этген – къыйын.
  • Ашхы – джыяр, аман – джояр.
  • Къартны сыйын кёрмеген, къартлыгъында сыйлы болмаз.
  • Адам боллукъ, атламындан белгили болур.
  • Къайгъыны сюйген, къайгъы табар.
  • Мадар болса, къадар болур.
  • Кёл ашады да, кеси ашады.
  • Джумушакъ терекни къурт ашар.
  • Бал чибинни ургъаны – ачы, балы – татлы.
  • Ата Джуртча джер болмаз, туугъан элча эл болмаз.
  • Билмезни кёзю кёрмез, этмезни къулагъы эшитмез.
  • Окъдан джара эртде-кеч болса да бителир, сёз джара, ёмюрге къалыр.
  • Тюзлюк тас болмайды.
  • Билим ат болуб да чабар, къуш болуб да учар.
  • Намысы болмагъанны, сыйы болмаз.
  • Айраннга суу къош, телиге джол бош.
  • Эте билген, этген этеди, эте билмеген, юретген этеди!
  • Гугурук къычырмаса да, тангны атары къалмаз.
  • Къанны къан бла джуума, аманны аман бла къуума.
  • Джети тилни билген джети кишиди.
  • Ариу сёз – къылычдан джити.
  • Адебни адебсизден юрен.
  • Ёлмесенг да, къарт дамы болмазса?
  • Къызны минг тилер, бир алыр.
  • Кёб джашагъан – кёб билир.
  • Тюз сёз баргъан сууну тыяр.
  • Эри аманны, къатыны – аман.
  • Тойгъа алгъа да барма, тойда артха да къалма.
  • Шекер бла туз – бир болмаз, ушамагъан – юй болмаз.
  • Ушамагъан – джукъмаз.
  • Окъугъан – асыу, окъумагъан – джарсыу.

Сейирлик жашаўгъа жол ачхан ара

12.07.2016 0 5396  Аппаева Л.

Фото Евгения Триско

2003 жылдан башлап бизни жашаўубузгъа «Эльбрусоид» деген сёз эркин кирип тебирейди. Эсгерсек, ол жылланы заманын къыйын жыллагъа санайма мен. Нек дегенде? Адамла армаў болуп, эски жашаўну этегинден тутуп, тюрлениўле апчытып, тенгизге батаргъа къоркъгъан, къарыўсуз къанатлылагъа ушай эдиле – къыйын эди сайлаў жоллары. 

Мен, устазча айтсам, ол жылла сабийлени окъутуў-айныў жолларында да бек къыйын жылла эдиле: Къарачайда, Малкъарда да сабийлени, жаш тёлюню тюз жолгъа юйретген мекямла жокъ эдиле, «Кёрген кёргенин этер  кёчген арбасын жегер», дегенлей, къарап, иги, магъаналы затлагъа юйренир амалла да бек аз эдиле. Ма ол жыллада жаш тёлюбюзге Эльбрусоид энчи «Тейри эшик ачхан эди». Мени къолума «Эльбрусоид» дайджестни биринчи номери тюшгенде, жюрегиме бир уллу къуўанч келген эди. Мен студентлериме: «Эльбрусоид – сейирлик жашаўгъа жол ачхан ара болду бизге», – деп, алагъа дерслеримде дайджестни окъугъан эдим.

«Къуралыўлукъ болгъан жерде монглукъ къурумайды» деген сёзге кертичилей къала, эльбрусоидчуланы хар ишлери да кереклисича къуралып, бир сатыргъа тизилип бара эдиле. Жашау тенгизинде армаў болуп тургъан жаш тёлюге, баш таяндырыр жер ачылгъанына барыбыз да къуўана эдик. Кертиликге, тюзлюкге къуллукъ этиўню муратха салып ишлеген Эльбрусоидну къуралыў жолу къыйын болса да – этген ишлерини магъанасы, сыйлылыгъы баям эди. Къысха заманны ичинде Къарачайда, Малкъарда, битеў Шимал Кавказда эм диаспораларыбызда да атын айтдырып, жаш тёлюбюзню бир отжагъагъа итиндирген – ол бек уллу усталыкъ эди. Не жаны бла да билимлерин ёсдюрген амалладан сора да конкурслада, тюрлю-тюрлю кружоклада, спортда, тепсегенде, жырларгъанда кеслерин сынаргъа онглары болгъан жаш адамларыбызны жюреклеринде ышаннгылы от жандыра билгендиле Эльбрусоидну ишчилери. 

Устазны иши – излеўдю. Эльбрусоидну проектлери не жаны бла да сабийлеге айнытыў онг бергенлери ючюн, ала бизге, устазлагъа да, керек кюнюбюзде ышаннгылы таянчакъ болгъандыла. Алгъын жыллада эсибизге, тюшюбюзге да келмеген, кеси тилибизге жомакъланы (мультфильмлени) кёчюрюў проектни магъанасыны юсюнден айтыргъа уа сёз тапхан окъуна къыйынды. Ары дери ана тиллеринде шатык, кесгин сёлеше билмеген сабийлерибизге къаллай бир уллу методика болушлукъдула ала! 

Арт жыллада ФГОС-ну (Федеральный государственный образовательный стандарт) жангы излемлери устазланы бек апчытып, ала ол излемге кёре материалла тапмай къыйналгъанларын кёп кере эшитгенбиз. Эльбрусоидну проектлери уа устазлагъа «алтын хазна» болуп, болушадыла, къуўандырадыла. Бюгюнлюкде устазлагъа, студентлеге, сабийлеге, ата-аналагъа да бирча керекли материалланы Эльбрусоидну порталында табаргъа боллукьду. Аланы бир жерде табып хайырланыў, кьаллай бир болушлукъду барыбызгъа да! 

Бизни баш борчубуз – сабийлени жюреклеринде миллет сезимле туўдуруў, аланы тюз жолгъа салыў эсе, Эльбрусоид ол борчну оздуруп да толтурады, дейме. Мени ишим жаш тёлю бла байламлы болгъаны себепли, аланы кёллендирип – кёп бийик жоллагъа итиндирген Тотуркъулланы Алийге, устазча, анача, жюрек ыразылыгъымы билдирирге сюеме. Жер бышына жаратылып, жаланда кеслери ючюн жашагъан адамла кёпдюле, Алий а миллетим деп, уллу муратла салып, ол борчну сыйлы, жетишимли толтурады. Эр кишиге жашаў къадарында юйюрню мурдор ташын бегитиў аны бек баш кишилик борчу эсе – Алий Къарачайны, Малкъарны да миллет отжагъасын игиликге, тюзлюкге, таўкелликге итиндире, ёхтем бегитгенди. Бюгюнгю жашаўубузну сыйлы кюню халкъыбызны жетишимлери бла байламлы эсе, Эльбрусоид – ол тамбла кюнюбюзню ышангылы таянчагъыды.

Аппайланы Лариса,
КъМКьУ-ну педагогика колледжини устазы



(Голосов: 1, Рейтинг: 5)

  • Нравится

Комментариев нет