Расширенный поиск
21 Сентября  2018 года
Логин: Регистрация
Пароль: Забыли пароль?
  • Аш кетер да бет къалыр.
  • Кёл ашады да, кеси ашады.
  • Ат да турмайды бир териде.
  • Халкъны джырын джырласанг, халкъ санга эжиу этер.
  • Суугъа – таянма, джаугъа – ийнанма.
  • Мал ёлсе, сюек къалыр, адам ёлсе, иши къалыр.
  • Ауузу бла къуш тута айланады.
  • Бир онгсуз адам адет чыгъарды, деб эштирик тюлсе.
  • Таукел тауну аудурур.
  • Дуния малгъа сатылма, кесингден телиге къатылма.
  • Ётюрюкден тюбю джокъ, кёлтюрюрге джиби джокъ.
  • Этим кетсе да, сюегим къалыр.
  • Аманнга игилик этсенг, юйюнге сау бармазса.
  • Тойгъа алгъа да барма, тойда артха да къалма.
  • Къызны минг тилер, бир алыр.
  • Эки къатын алгъан – эки ташны ортасына башын салгъан.
  • Аман эсирсе, юйюн ояр.
  • Кирсизни – саны таза, халалны – къаны таза.
  • Ётюрюкню башын керти кесер.
  • Айырылгъанланы айю ашар, бёлюннгенлени бёрю ашар.
  • От кюйдюрген, сау болса да, тот кюйдюрген, сау болмаз.
  • Къатын къылыкъсыз, эр тынчлыкъсыз.
  • Адеб джокъда, намыс джокъ.
  • Келинни – келгинчи, бёркню кийгинчи кёр.
  • Аман адам элни бир-бирине джау этер.
  • Киштикге къанат битсе, чыпчыкъ къалмаз эди.
  • Огъурлуну сёзю – суу, огъурсузну сёзю – уу.
  • Бети – къучакълар, джюреги – бычакълар.
  • Телиге от эт десенг, юйюнге от салыр.
  • Таула не мийик болсала да, аууш табылыр.
  • Тамчы таш тешер.
  • Тилчи тилден къаныкъмаз.
  • Эте билген, этген этеди, эте билмеген, юретген этеди!
  • Кенгеш болса, уруш болмаз.
  • Кёзден кетген, кёлден да кетеди.
  • Тик ёргени, тик энгишгеси да болады.
  • Аджал соруб келмез, келсе, къайтыб кетмез.
  • Джырына кёре эжиую.
  • Тамырсыз терекге таянма – джыгъылырса.
  • Байдан умут эте, джарлыдан ёгюз багъасы къорады.
  • Тёрде – темир таякълы, къаяда – чыпчыкъ аякълы.
  • Джарлы джети элни сёзюн этер.
  • Ашда уялгъан – мухар, ишде уялгъан – хомух.
  • Ач да бол, токъ да бол – намысынга бек бол.
  • Иги сёз – джаннга азыкъ, аман сёз башха – къазыкъ.
  • Къонакъны къачан кетерин сорма, къачан келлигин сор.
  • Кёбден умут этиб, аздан къуру къалма.
  • Къоркъакъны кёзю экили кёрюр.
  • Душманны тышы – акъ, ичи – къара.
  • Адамны сыфатына къарама, сёзюне къара.

Алгъышла

31.12.2012 1 6239
***
Бу юйден алгъыш кетмесин,
Къаргъыш бу юйге джетмесин.
Дуниябыз мамыр болсун,
Ырысхыбыз къалын болсун.
Урунуб джашайыкъ,
Халал къыйын ашайыкъ!!!


***
Бу элде элсиз къыйынлыкъ киши сынамасын,
Джашлай ёлгенди деб, киши джылямасын,
Бу элден насыб къурумасын,
Арбазларында ит улумасын.
Черек, ызына айланыб,
Минги таугъа миннгинчи,
Чегетде кийик юсюне кийим кийгинчи,
Кече арасында бир исси кюн тийгинчи,
Уруш отун сынамайын къалайыкъ,
Къууанчлада алгъыш аякъ алайыкъ,
Бир бирибизге джарыкъ бетден къарайыкъ!!!


***
Боза аякъны алайыкъ,
Джарыкъ бетден къарайыкъ,
Бу суу бла чёпню башыды,
Таулуну джарыкъ ашыды.
Уллуду бу аякъны хурмети,
Джарыкъ болсун муну этгенни бети!!!


***
Алгъыш аякъ алайыкъ,
Аманлыкъдан къалайыкъ,
Аузубузгъа салайыкъ.
Бу аякъны башы ачыкъ кибик
Аллахны кёлю бизге ачыкъ болсун!!!


***
Чуакъ кекде джулдузла джылтырай,
Джелден терекледе чапракъла къалтырай,
Заман барад, аллына атлай.
Къач кече бу заманда джукълай,
Къач кекде ариу тиеди ай,
Аллах турсун сизни къуандрыгъанлай…
Кюн ортада кебеди эрденги чыкъ
Аллах керед мени джюрегим сизге ачыкъ
Аллах джашау берсин,
Аллах насып берсин
Игини сизге этсин аманны кери этсин!
Амин.


***
Иман болуб джюрекледе, ишлегиз сууаблыкъны,
Кече, кюнде хар къайдада, унутмагъыз джууаблыкъны.
Халал, джигер урунуб, чомарт болсун къолугъуз,
Къайры, къачан барсагъызда, джарыб турсун джолугъуз.
Танг алада, эртденликде, булбуллача джырлагъыз,
Сюйюнюгюз ариулукъгъа, нюр чачыб ийнакълагъыз.
Тохтамай урунугъуз, хорлатмай къыйын ишге,
Заран, бузукъ этмегиз, джашауугъузда кишиге.
Адеб, намыс, тюз иннет, джюреклеригизде орналсын,
Къыйынлыкъдан, чырмауладан Аллах сизни сакъласын.


***
Кезлеригиз джулдузлача джансынла!
Къолларыгъыздан бал тамчыла тамсынла!
Ашхы-иги муратларыгъыз толсунла!
Джюрегигизде гокка хансла чакъсынла!


***
Джангы джылны сакълайбыз,
Алгъышла да айтабыз,
Ойнайбыз, кюлебиз,
Алай кетсин ёмюрюбюз!

Огъурлу болсун Джангы Джыл!
Алгъышла бары толсунла!
Мамырлыкъ эм сабырлыкъ,
Болсун хар бир адамда!


***
Аллах саулук-эсенлик берсин! Сизни юйдегигиз адамлада эм иги, эм намыслы, деб айтылырча болсун!

Алгъышдача,асыл болсун Джангы Джыл!
Умутлача джарыкъ болсун Джангы Джыл!
Рахатлыкъгъа кенг джол ачсын Джангы Джыл,
Берекетни керелесин Джангы Джыл!
Эй, Джангы Джыл,сабийлеге бол джылы бешик,
Эй, Джангы Джыл, игиликге ач Тейри эшик
Эй, ДжангыДжыл, джюреклени эт сен къанатлы,
Тёгерекни - джерни, кёкню эт сен къууатлы.
Къоркъууланы кери этиб, насыбны джандыр,
Игиликни бери этиб, аны бла къандыр.
Джыргъа джол бер, къартха тёр бер, келе тургъан Джыл,
Сабийлени эслеринде ариу ыз къалдыр!


***
Къуанчлы болсун Байрамыгъыз!
Шош болсун кечелеригиз.
Джарыкъ болсун кюнлеригиз.
Берекетли болсун тепсилеригиз.
Саулукълу болсунла АТА--АНА.
Насыблы болсунла Балала!!!


***
Палах джолу кенг болгъандан,
Сен аманнга тенг болгъандан,
Аллах сакъласын.

Кюн тийгенде кюнсюзлюкден,
Эрир джерде кюйсюзлюкден,
Аллах сакъласын.

Сабийлеринг абыннгандан,
Аллах сёзден къабыннгандан,
Аллах сакъласын.

Душманынга тыяннгандан,
Халкъ аллында уялгъандан,
Аллах сакъласын.

Тыбыр ташынг сууугъандан,
Джюреклени сууугъундан,
Аллах сакъласын.

Умутунгу унутхандан,
Кеси адамынг улутхандан
Аллах сакъласын.


***
Аланла, муратларыгъыз толсунла,
Къуруда эсигизде ашхы умутла болсунла.
Джолугъузда гюлле есюб, ариу чагъыб турсунла,
Кюн, ай, джулдузла - сизге къарамларын бурсунла.

Джашау джолда таукел атлаб барыгъыз, алгъа къараб,
Онглу болуб, джуртха, халкъгъа, джуукълагъа, тенге джараб.
Алтын кюнню джылыу тийиб турсун башыгъыздан,
Аллах игилик берсин, айырмасын ашыгъыздан.

Насыб, къуанч, ашхылыкъ юйюгюзде уялансын,
Адамлыкъ, ишленмеклик, тюзлюк сизде къала салсын.


***
Мен кёб айта билмейме,
Кёб ахшылыкъ Аллах берсин.
Алгъышчыла алгъыш этсинле,
Аминчиле амин этсинле.

Алгъышлары къабыл болсун,
Дуниялары мамыр болсун.
Амин деген тилегин тапсын,
Амин демеген тилин къапсын,
Нарт алгъыш юйде къалсын!!!


***
Джокъдан бар этген Аллах,
Барданда джокъ этген Аллах,
Хар затха кючю джетген Аллах,
Джаратхан джанына ырысхы берген Аллах.
Ол буйургъан къууанчны этерле,
Бу юйню келюне джетерле,
Къартда джашда келгенбиз,
Келиргеда кереклибиз,
Къууанчыбыз кюндеда былай болсун,
Бу къууанчха келген насыбдан толсун!


***
Насыб халкъдан кетмесин,
Къыйынлыкъ анга джетмесин,
Келгенлени джашаулары мамыр болсун,
Аджаллары сабыр болсун,
Джарысынла джюрекле,
Къабыл болсунла ашхы тилекле.
Тюз иннет джашасын,
Зарны кюе ашасын,
Ашхыладан юлгю алайыкъ,
Аманладан кенг къалайыкъ!!!


***
Дуниябыз мамыр болсун,
Ырысхыбыз къалын болсун,
Сюйгенлерибиз сюерча.
Сюймегенлерибиз кюерча,
Тобукъларын тюерча,
Аякълары абынырча,
Тамакълары къарылырча,
Джюреклери джарылырча,
Ашхыларыбыз акъыл, иш юретсинле,
Джашла къызлада аны этсинле,
Урунуб джашайыкъ,
Халал къыйын ашайыкъ,
Бир-бирге болушайыкъ,
Аллах сюйгенледен болайыкъ!!!


***
Тынгылагъыз-тынгылагъыз-тынгылагъыз, ауруусуз болугъуз!
Тынгыламагъанла бауурсуз болугъуз.
Къууанчда боза аякъны къолгъа алайыкъ,
Къыраллыкъны тюз джолунда барайыкъ,

Палахдан къурлай къалайыкъ!
Алгъыш бери болсун,
Къаргъыш кери болсун,
Аны сюймеген тели болсун,
Агъачда айланган берю болсун!


***
Ырысхыгъыз, насыбыгъыз кеб болсун!
Болгъандада, алай болсун:
Кекден джаугъан джауум кибик,
Джерден чыкъгъан кырдык кибик,
Агъачлада чырпы кибик,
Сабанлада джылкъы кибик!

Къатын берсе - ариуун берсин,
Къой берсе - тюклюсюн берсин,
Ийнек берсе - сютлюсюн берсин,
Ёгюзберсе - тартханын берсин,
Атбергенде - чабханын берсин!

Сынджырыбыз къурушмасын,
Юйдегибиз урушмасын,
Арбазыбыз ташлы болсун,
Келинибиз джашлы болсун!


***
Насыб сенден кетмесин,
Къыйынлыкъ сенге джетмесин,
Джашауунг мамыр болсун,
Муратларынг бары толсун,
Джюрек джолунг мамукъдан болсун,
Абынганынг насыбха болсун,
Къайда айлансангда,
Аллах сакълаучу негеринг болсун!


***
Акъ тулпар атха миниб,
Кек буздан келек кийиб,
Къашларына къар джаууб,
Бир джыллыкъ джолдан аууб,
Келген джолу ыз болуб,
Акъ сакъалы буз болуб -
Алай джетди Джангы джыл!
Акъ тулпарны арытыб,
Джерни юсюн джарытыб,
Аламда джандет ачыб,
Алтын джулдузла чачыб
Тоб тауушла этдириб,
Джерни юсюн тебтиртиб,
Боран этиб, джел этиб,
Уууртларын кебтюрюб,
Кюмюш кибик акъ къардан
Тегерекни толтурду,
Хар юйге къонакъ болуб,
Хант къангагъа олтурду -
Джангы джыл-джангы къонакъ!
Юсю башы бек омакъ,
Къонакъ бла бетлешиб,
Бизда сюйюб олтурдукъ
Къонакъны намысына
Чын аякъла толтурдукъ,
Кеб алгъышла айтылыб
Кеб тилекле тиледик,
Палахны кери этиб,
Бизге насыб бер дедик!

Кюлюмсюреб кезлери,
Джылыу бере къашлары,
Акъ сакъалындан ссылай,
Сезню былай башлады:
Мен бек сюер эдим
Тилеклеге джетсегиз,
Алгъышлада къабыл болур
Мен айтханны этсегиз:
Биринчиден джашауда
Джер юсюнде мамырлыкъ!
Мамырлыкъ келтиреди
Ырахатлыкъ сабырлыкъ.
Аман, аманлыкъ себер,
Ол этгенни этмегиз,
Биреу джардан кетди деб,
Аны ызындан кетмегиз.
Къан джюрекли къан тегер,
Аны ызындан бармагъыз.
Огъурсуз оюм этиб,
Къолгъа сауут алмагъыз.
Къарыусузну къарыулу
Берю кибик таламай,
Мен сыйлы - мен сыйсыз деб,
Душман кезден къарамай.
Сабырлыкъда, тюзлюкде,
Огъурлукъда джашагъыз,
Хар ким ишлеб, тер тегюб,
Таза гырджын ашагъыз!


***
Алгъышлайма байрамынг бла, кюнюнг ашхы болсун, джашаунг узакъ болсун, хурджунунг къалын болсун, насыбынг эркин болсун, ариулугъунгу АЛЛАХ алмасын, саулугъунгу АЛЛАХ къызгъанмасын, джуугъунгу АЛЛАХ джарсытмасын!


***
Айтылгъан алгъышла да айтыллыкъ алгъышла да къабыл болсунла!!! Джашау джолунг тынч болсун джарыкъ болсун. Атанг Ананг сюйгенча бол!!!


***
Аланла!Джангы джыл бла алгъышлайбыз! Барыгъызныда Аллах ишлеригизден, джашауугъуздан, юйдегилеригизден къуанндырсын! Джангы джыл хар юйге огъур аякъ бла, къууанч бла келсин! Миллетибизге буруннгу намысны, адетни келтирсин! Аллах бизни адамланы бир-бирлерин къарнашлача, эгечлеча сюйюб джашарча этсин! Барыбызныда Аллах ашхы муратларыбызны толтурсун!
(Голосов: 9, Рейтинг: 3.78)

  • Нравится

Комментарии (1)

    Джаратама1
    къандаурчукъ
    21.01.2013 12:56:07
    Аламат къаллай иги джумуш этгенсиз буну джазгъанла=)