Расширенный поиск
22 Сентября  2017 года
Логин: Регистрация
Пароль: Забыли пароль?
  • Джеринден айырылгъан – джети джылар, джуртундан айырылгъан – ёлгюнчю джылар.
  • Билими азны – ауузунда кирит.
  • Ашлыкъ – бюртюкден, джюн – тюкден.
  • Адеб этмеген, адеб кёрмез.
  • Аманнга да, игиге да оноусуз къатышма.
  • Джашынгы кесинг юретмесенг, джашау юретир.
  • Эркишиге тары кебек танг кёрюнюр.
  • Ач да бол, токъ да бол – намысынга бек бол.
  • Гугурук къычырмаса да, тангны атары къалмаз.
  • Билим ат болуб да чабар, къуш болуб да учар.
  • Окъугъан озар, окъумагъан тозар.
  • Окъугъан – асыу, окъумагъан – джарсыу.
  • Къайтырыкъ эшигинги, къаты уруб чыкъма.
  • Къозулугъунда тоймагъан, къойлугъунда тоймаз.
  • Кёзюнде тереги болгъан, чёбю болгъаннга кюле эди.
  • Тойчу джашха къарама, къойчу джашха къара.
  • Тёрде – темир таякълы, къаяда – чыпчыкъ аякълы.
  • Ариу сёз аурууунгу алыр.
  • Кёб джат да, бек чаб.
  • Сабийни джумушха джибер да, ызындан бар.
  • Окъугъанны бети джарыкъ.
  • Сёлеш деб шай берген, тохта деб, сом берген.
  • Чакъырылгъанны аты, чакъырылмагъанны багъасы болур.
  • Тюзню ётмеги тюзде къалса да, тас болмаз.
  • Къызбайны юйюне дери сюрсенг, батыр болур.
  • Чакъырылмагъан къонакъ къачан кетерин сормаз.
  • Хар адамгъа кеси миннген тау кибик.
  • Хар зат кесини орнуна иги.
  • Олтуруб кёрюнмей эди да, ёрге туруб кёрюне эди.
  • Къартны бурнун сюрт да, оноугъа тут.
  • Ач къарным, тынч къулагъым.
  • Суу да къайтады чыкъгъан джерине.
  • Орну джокъну – сыйы джокъ.
  • Акъдан къара болмаз.
  • Хансыз джомакъ болмаз.
  • Дуния малгъа сатылма, кесингден телиге къатылма.
  • Алгъанда – джууукъ, бергенде – джау.
  • Ана къолу ачытмаз.
  • Къралынгы – душмандан, башынгы от бла суудан сакъла.
  • Къолу уллу – асыу, аягъы уллу – джарсыу.
  • Тилчи бир сагъатха айлыкъ хата этер.
  • Этни бети бла шорпасы.
  • Чыбыкълыкъда бюгюлмеген, къазыкълыкъда бюгюлмей эди.
  • Тёрени джагъы джокъ.
  • Ёнгкюч къууана барыр, джылай келир.
  • Телини эшигин, махтау джабар.
  • Агъач халкъгъа алтынды, иссиликге салкъынды.
  • Бет бетге къараса, бет да джерге къарар.
  • Байны оноуу, джарлыгъа джарамаз.
  • Мал ёлсе, сюек къалыр, адам ёлсе, иши къалыр.

Сабий жырла

25.05.2003 0 4821

 

Баппахан

Бап-бап-баппахан,
Баппа-баппа-баппахан!
Юй тюбюнде сары теке,
Сандыракъгъа барыр теке.

Жигейчиги жары теке,
Ашагьаны тары теке,
Ичгенчиги боза теке,
Текелени оза теке.

Таш юсюне мине теке,
Къош ичине кире теке,
Бурма теке, тура теке,
Къая ранда тура теке.

Агьач къабукъ къыра теке,
Жашчыкъланы ура теке,
Чырпы бюксем, къыркъа теке,
Ачыулансам, къоркъа теке.

Дыгьы этейим, "дыгъ" этейим,
Сени оюннга тюзетейим,
Сакъалынгдан салдырайым,
Исламейге бардырайым.

К списку

 

БЕШИК ДЖЫР

Белляу-белляу,
Белляу-белляу,
Балачыкъны мен бешикге бёлейим,
Белляу-белляу,
Белляу-белляу,
Балачыкъгъа кёб тилекле тилейим.

Алай эте,
Алай эте,
Джукълаб къалгъын, балам, бешикде,
Былай эте,
Былай эте,
Иш тындыргъын, балам, эшикде.

Алай эте,
Алай эте,
Чабыб кетгин, балам, джолунга,
Былай эте,
Былай эте,
Къалам тутхун, балам къолунга.

Алай эте,
Алай эте,
Балам, сен уллучукъ болгъаенг,
Былай эте,
Былай эте,
Балам, сен къуллукъчу болгъаенг.

Алай эте,
Алай эте,
Алий улу Умар болгъаенг,
Былай эте,
Былай эте,
Гюрджу улу Къурман болгъаенг.

К списку

 

Жол оюну

Алты, алты, эки-тёрт
Келип, бизни кёрюп кет.
Айда, айда тенгли сай,
Алты, алты, эки-тёрт

Келип,бизни кёрюп кет.
Айда, айда тенгли сай,
Кимди бизде энди бай?
Ой-ра, ори-ра, ой!

Аз да къалтырама сен,
Кел да, бизде онгну кёр,
Эки-эки, тёрт-алты,
Бизде барды кёп макъы.

Ач эшикни, хыли бай,
Чабырынгы гымых кий.
Эки-эки, беш-алты,
Чапды теке бек къаты.

Амма, манга баппу бер,
Чабып, сууну бурайым,
Къынгыр-мынгыр биз бла
Кёнчегими жамайым.

Алты, алты, эки-тёрт,
Келип, бизде ойнап кет.
Бек арыгъан болмасанг,
Тирмен суугъа кесгич эт.

Жылкъы къулакъ, суу аякъ -
Дарманды аны оту.
Къаза, къаза кет да тенг,
Аны тюбюн эзме сен.

Золку кибик, жюзаякъча, созула,
Къысха келдинг ызымдан.
Ариу айтса, къозула, -
Эки-эки, тёрт-алты,
Ойра, ори-ра-ой!

К списку

 

ОЙ  БИР ДЖАШЧЫКЪ, БИР ДЖАШЧЫКЪ

Ой бир джашчыкъ, бир джашчыкъ,
Бир джашчыкъда бир башчыкъ,
Бир башчыкъда тёппечик,
Арты чунгур джелкечик,
Аллы сыйдам тулучукъ,
Кеси ата улучукъ.
Туруб тургъан мангылай,
Айтханынгы ангылай.
Битиб тургъан къашчыкъла,
Ёссюн быллай джашчыкъла
Кёре тургъан кёзчюкле,
Джашчыкъ айтады сёзчюкле.
Солуй тургъан бурунчукъ,
Джашчыкъ алтын джурунчукъ.
Айта тургъан ауузчукъ,
Этед ариу тауушчукъ.
Ауузчукъда тишчикле,
Джашчыкъ этеди ишчикле.

К списку

 

Бешик жыр

Жукъла, кёз гинжичигим,

Сен жукъугьа кетсенг а,

Татлы тюшле кёре, кюле,

Ишиме бош этсенг а.

 

Бёлляу-бёлляу эт, кюнюм,

Къатын алып кёрейим,

Сен аурума, бауурчугъум,

Сен жаша, мен ёлейим.

 

Кёзчюклеринг нюр жана,

Ёсюп, жюрюп кетерсе.

Тау жигити болуп, мени

Жумушуму этерсе.

 

Алма терек тюбюнде,

Суу тауушха тынгылай,

Тынч-тынч жукълап къалчы, кёзюм,

Мен да бешик жыр жырлай.

 

Жукъу саулукъ береди,

Жукъла, алтын тауугьум,

Жукълап турсанг, эркелерме,

Сенсе жашау зауугьум.

 

К списку

 

 

 

БАРА-БАРА БАЗ ТАБДЫМ
(Экинчи вариант)

 

Бара-бара баз табдым,
Базны ичинде таракъ табдым.
Таракъны аммагъа бердим,
Амма манга баппу берди.
Баппуну итге атдым,
Ит манга кючюк берди.
Кючюкню къойчугъа бердим,
Къойчу манга къозу берди.
Къозуну къонакъгъа сойдум,
Къонакъ манга къамчи берди.
Къамчини джерге урдум,
Джер манга чёмюч берди.
Чёмючню суугъа атдым,
Суу манга кёмюк берди,
Кёмюкню тапкагъа салдым.
Ары джанындан бир мияу,
Бери джанындан бир мияу,
Келдиле да хап-хуп дедиле,
Ичдиле да кетдиле.

 

К списку

 

УЯН ЭНДИ, ТЕНГЧИГИМ,

Уян энди, тенгчигим,
Кюн тау башладан къарады,
Эрлай тур да сен кийин,
Заман озуб барады.

Санларынгы сен ойнат,
Джуу бетинги, къолунгу,
Школгъа заман озгъунчу,
Алай аша ашынгы.

Ашаб, ичиб бошасанг,
Бар школгъа окъургъа,
Хар не тюрлю джанындан,
Окъуб билим алыргъа.

Ичме тютюн, аракъы,
Бузма ариу къанынгы,
Кир ишлеге бошлама
Субай ёсген санынгы.

Хайда, мени тенгчигим,
Тут быланы эсингде,
Джарыкълыкъ ючюн сен кюреш
Хар бир тутхан ишингде.

К списку

 

КЪОЛГЪА БАРДЫМ, КЪОЛУМ СЫНДЫ

Къолгъа бардым, къолум сынды,
Бузгъа бардым, бутум сынды,
А буз, а буз, сен неден кючлюсе?
Мен кючлю болсам мени кюн да эритмез эди.
А кюн, а кюн, сен неден кючлюсе?
Мен кючлю болсам, мени булут да джабмаз эди.
А булут, а булут, сен неден кючлюсе?
Мен кючлю болсам, мени джангур да чачмаз эди.
А джангур, а джангур, сен неден кючлюсе?
Мен кючлю болсам, мени джаугъан джангуруму джер да джутмаз эди.
А джер, а джер, сен неден кючлюсе?
Мен кючлю болсам, чыкъгъан кырдыгымы къозулу къой да отламаз эди.
А къой, а къой, сен неден кючлюсе?
Мен кючлю болсам, къозуму къонакъгъа да соймаз элле.
А къонакъ, а къонакъ сен неден кючлюсе?
Мен кючлю болсам, къанджыгъа баууму чычхан да ашамаз эди,
А чычхан, а чычхан сен неден кючлюсе?
Мен кючлю болсам, мени кишдик да сытмаз эди.
А кишдик, а кишдик, сен неден кючлюсе?
Мен айхай да кючлюме, темир таракъ тишлиме,
Къангалы юйню ачама, къаймакъ алыб къачама,
Бийле бла ашайма, бийчеле бла джатама!

К списку

 

ДЖЮУ-ДЖЮУ-ДЖЮУ АЛА
(Биринчи вариант)

Джюу-джюу-джюу ала,
Эки чычхан суу ала,
Амма боза бишире,
Акка кийик тюшюре.
Босагъадан абына,
Сакъалчыгъы къабына,
Тамбласы, бюгюннгюсю,
Таугъа кетди дыгъы этерге Чибиниси
Дыгъы-дыгъы-дыгъы-дыгъы-дыгъы!

К списку

 

ДЖЮУ-ДЖЮУ-ДЖЮУ АЛА
(Экинчи вариант)

Джюу-джюу-джюу ала,
Эки чычхан суу ала,
Амма боза бишире,
Акка кийик тюшюре.

Ит къабханд да, ёлеме,
Хан къузлукъгъа барама,
Кюнде айланыб, кюеме,
Кюмюш тюйме тюеме,
Сени бир бек сюеме.

К списку

 

ДУРКЪУ-ДУРКЪУ-ДУРКЪУ
(Биринчи вариант)

Дуркъу-дуркъу-дуркъу ёгюз.
Ёгюз ичи семиз,
Бу урлады, бу сойду, бу биширди,
Бу ашады, бу айгъакъ чыкъды.
Муну да тюйюгюз,
Муну да тюйюгюз,
Муну да тюйюгюз,
Муну да тюйюгюз,
Муну да тюйюгюз!
Джашчыкъны (неда къызчыкъны) эшикге атыб ийигиз!

К списку

 

ДУРКЪУ-ДУРКЪУ-ДУРКЪУ
(Экинчи вариант)

Дуркъу-дуркъу-дуркъу,
Дуркъу ичинде ёгюз,
Ёгюз ичи семиз,
Бу урлады, бу сойду,
Бу биширди, бу ашады,
Бу артха къалды,
Тюйюгюз муну, тюйюгюз, тюй!

К списку

 

ДУ РКЪУ-ДУРКЪУ-ДУРКЪУ
(Ючюнчю вариант)

Дуркъу-дуркъу-дуркъу ичинде ала ёгюз,
Бу урлаб келди, бу сойду да къазаннга салды,
Бу биширди да аш саламгъа чыгъарды,
Бу да ашады да тойду,
Бу да барды да иесине айтды да къойду,
Тюйюгюз, тюйюгюз, муну эшикге атыб ийигиз!

К списку

 

БИРЕМ-БИРЕМ

Бирем-бирем, экем-экем,
Бауур олтан, сабдан къалай
Елю бугъа, сары тай, тору тай,
А-а малтай, ча-а малтай,
Ичи балтай, чыкъ, Тотай!

К списку

 

ЧЫКЪЫР-ЧЫКЪЫР, ГЕНДЖАХАН

Чыкъыр-чыкъыр, Генджахан,
Улакъларынг макъыра,
Эчкилеринги чакъыра.
Согъа эсенг, сокъ,
Сокъймай эсенг къой,
Бет теринги сой,
Чабыр эт да кий,
Отджагъагъа сий.

К списку

 

ОНБЕШ, ОНБЕШ, ОНБЕШ

Онбеш, онбеш, онбеш,
Сен санасанг да онбеш,
Мен санасам да онбеш,
Сюйсенг сана, сюйсенг къой,
Онбешди да онбешди.

К списку

 


ЭРТДЕ БИРЕУ БАР ЭДИ

Эртде биреу бар эди.
Темир тиреу бар эди.
Таш тегене бар эди.
Агъач челек бар эди.
Къумурсханы къой этиб,
Къумгъа джайгъан бар эди.
Къарт атасын джаш этиб,
Къатын алгъан бар эди.
Къарт анасын джаш этиб,
Эрге берген бар эди.
Ёлген атны сау этиб,
Чарсха чабхан бар эди.
Къара сууну къайнатыб,
Къаймакъ алгъан бар эди.
Ёлген къушну сау этиб
Эл сарнатхан бар эди.

К списку

 

КЪАКЪ-КЪАКЪ КЪАРГЪАЛА

Къакъ-къакъ кьаргъала,
Къамиш тюбю джаркъала,
Ачы сууда балыкъла,
Тийре ичинде джылкъыла.
Джылкъы кимни джылкъысы?
Къазий улу Къаммолатны джылкъысы.
Къаммолат къайры кетгенди?
Мал джолуна кетгенди.
Мал джолундан къачан келликди?
Джылкъы чыкъса келликди.
Джылкъы чыкъса, джаз болады.
Балалары къаз болады.
Къазий улу Къаммолат,
Миннген атынг къашхалакъ,
Сыртына миннген сыйпалакъ,
Бегене чара тындыргъан,
Отуз къалакъ сындыргъан.

К списку

 

БИРДЕН БИЛЕУ

Бирден билеу,
Экиден эгеу,
Ючден ючгюл,
Тюртден тёнгек,
Бешден бешик,
Алтыдан ашыкъ
Джетиден къашыкъ
Сегизден сенек,
Тогъуздан токъмакъ,
Ондан оймакъ,
Буздан таймакъ,
Абил билим,
Чыкъсын тилинг!

К списку

 

КЪАР ДЖАУАДЫ, БОРАЙДЫ

Къар джауады, борайды,
Ханны неси къорайды?
Джылкъычысы джылайды,
Тууарчысы джау гыбытны,
Башын-башын сылайды,
Отунчусу кюледи,
Джашы тоюб джырлайды,
Къызы ёпкелеб къыйнайды.

К списку

 

БЕШИК ДЖЫР

Белляу-белляу, бёлейим
Сеннге ашхылыкъла кёрейим,
Джандан сюйген джан балам,
Адам болуб кёрейим.

Джанымдан сюйген балам,
Сенсе джюрек сюйгеним,
Сен рахат болмайын,
Тынчлыкъ табмайд джюрегим.

Джюрегими къууанчы,
Джашаууму джубанчы,
Накъут-налмаз джашчыгъым,
Гокга ханслай, джашчыгъым.

Белляу-белляу, джылама,
Кёзлерими гинджиси,
Белляу-белляу, тынч джукъла,
Джюрегими инджиси.

Акъ сютюмю береме,
Джукъла, кийик улагъым,
Джаным кибик кёреме,
Нюр джаухардан чырагъым.

Тогъуз айны къарнымда,
Ауур кёрмей джюрютдюм,
Сен джыласанг джюрегим
Бузча болуб эрийди.

Байны малы кёб болур,
Джарлы малы - арыкъды,
Джарлылыкъгъа джылама -
Джарлы кёлю джарыкъды.

Тобугъумда ёсдюрюб,
Уллу киши этерме,
Рахат болур джюрегим,
Муратыма джетерме.

Акъыл-балыкъ сен болсанг
Сени халкъгъа берирме,
Бир насыбым бар эсе,
Халкъгъа джараб кёрюрме.

К списку

 

БЕЛЛЯУ

Белляу, белляу, бёлейим,
Балачыгъым, сенден алгъа ёлейим,
Кёб джашагъын, хайырынгы кёрейим,
Бешигинги бауу, бала ычхынсын,
Башынгдан огъурлу къаргъа къычырсын.
Къаргъаланы къонушлары къолдады,
Сени атанг келе эсе джолдады.
Джолукъгъаннга балачыгъын сорады,
Соргъанындан иги хапар алады,
Ол алгъанын хурджунуна салады.
Бал ашасын, бала, сени тамагъынг,
Кюрен тартсын, бала, сени къабагъынг.
Къабагъынгда алтын терек орналсын,
Тюб тамыры Ташлы-Сыртдан къарасын,
Баш булчугъу джулдузланы санасын,
Келген къонакъ атын анга байласын.
Чапырагъы сау сюем-къарыш болсун,
Салкъынында минг джолоучу солусун.
Къонакъ юйюнг кёб къонакъладан толсун,
Къонакълагъа къысыр малла союлсун.
Сойгъан малларынгы башы сарыды,
Айтхан сёзюнг дюнелеге дарыды.
Тум къарады балачыгъымы кёзлери,
Бала, ариу кёзлеринге нюр джаусун,
Сени ананга сени кибик кёб туусун.
Малынг, мюлкюнг, балачыгъым, кеб болсун,
Ашар, джашар кюнюнг кёб болсун,
Халыуа салырма, бала, сени дженгинге,
Сукъланмагъын, балачыгъым, тенгинге.
Тенглеринг сеннге сукъланырча юй болгъун,
Хар насыбдан, балачыгъым, сен толгъун.
Кюнлеринги ойнай, кюле батдыргъын,
Тангларынгы рахат джукълаб атдыргъын.
Сау эл сени игилигинге къарасын,
Балачыгъым джарлылагъа джарасын.
Сау къутулгъун къууанч бла бешикден,
Чабыб тюшсюн гитче бала эшикден.
Джукъла, бала, белляу, белляу, бёлейим,
Джукъудан тойсанг, бешигингден алырма.
Джукъламасанг тынчлыгъымы бузаса,
Ишлерими этдирмейин созаса.
Сен джукъласанг, кёлюм тынчлыкъ табады,
Эки къолум джарлылыкъгъа чабады.

К списку

 

БЕЛЛЯУ, БЕЛЛЯУ, БАЛАЧЫГЪЫМ

Белляу, белляу, балачыгъым,
Сенден алгъа ёлейим,
Сени адам болуб,
Къатын алыб кёрейим.
Белляу, белляу, бёлейим
Хайырынгы кёрейим,
Белляу, белляу бёлейим
Сенден алгъа ёлейим.
Джаша, бала, джашауунгдан тояйым,
Къурманынга къуба ёгюзле сояйым.
Къурманлыгъынг тауда отлагъан кийикди
Мени джашым тенглеринден мийикди.
Бешик бауунг болгъа эди окъа,
Ичген сууунг болгъа эди кёк шоркъа.
Шоркъаладан, бала, суула алырса,
Къыйнлыкъладан, аллах айтса, къалырса.
Бал ашасын, бала, сени тамагъынг,
Кюрен тартсын сени тургъан къабагъынг.
Джайны игиси, бала, сеннге кюз болсун,
Аллахны кёлю сора сеннге тюз болсун.
Белляу,белляу, бала, сени бёлейим,
Сора сеннге кеб игилик кёрейим.
Джашай-джашай сора, бала, къарт болгъун,
Тенглеринги арасында толу юй болгъун.
Толу юй болсун мени балам, алгъышлыкъ,
Сени сюймеген болгъа эди ачы къаргъышлыкъ,
Арбазынгда алтын терек орналсын,
Тюб тамыры ташлы таудан къарасын,
Баш булчугъу джулдузланы санасын.
Лайлу, лайлу ланынга,
Къор болгъаем, бала, сени джанынга.
Лайлу, лайлу лайлыкъдан,
Топ-туп эте ойнай кюле келгин джайлыкъдан.
Белляу-белляу, белляу-белляу бёлейим,
Къарнашларымы келиб кёрейим,
Къарнашларым келе эселс джолдалла,
Джолукъгъаннга сора бизни соралла,
Ала бизден хайыр хапар алалла,
Хапарларын хурджунларына салалла,
Джолукъгъаннга джоллукъ джесир къоялла.
Мени балам тенглеринден мийикди,
Мени балам тауда айланнган кийикди.
Тенглеринг сукъланыр кибик бир болгъун,
Келинле келир, къызла чыгъар той болсун.
Лайлу, лайлу бала сени нанынга
Къор болсунла сени эгечлеринг джанынга.
Санларынг этсин, бала, сени салауат,
Джанынг болсун сыйлы аллахха аманат.
Белляу айтыб бешигинге бёлейим.
Хайда джукъла, хайырынгы кёрейим.

К списку

 

БЕЛЛЯУ, БЕЛЛЯУ, БЁЛЕЙИМ

Белляу, белляу, бёлейим,
Сеннге игилик кёрейим,
Аурумагъын, ёлмегин
Сени ючюн мен ёлейим.

Джылама, балам, джылама,
Сенсе кёзлерими къарасы,
Сен джыласанг чанчады,
Джюрегими джарасы.

Тогъуз айны къарнымда
Ауур кёрмей джюрютдюм,
Сен джыласанг тарала,
Джюрегими эритдим.

Белляу,белляу, бёлейим,
Сеннге ашхылыкъла кёрейим,
Сени алим болуб кёрейим,
Узакъ джерден келиб кёрейим.

К списку

 

БЕЛЛЯУ, БЕЛЛЯУ, БАЛА, БЁЛЮМДЕН

Белляу, белляу, бала, бёлюмден,
Аллах сакъласын бу баланы ёлюмден.
Белляу а белляу, бала бёлюмчек,
Алыб келгин бир оразлы юйден келинчик.

Келинле келсин, юйюбюзден къыз чыкъсын,
Арбазыбызда уллу той болсун
Баланы аллында минг къой болсун.
Мингден артыгъы аны джюз болсун.

Аллахны кёлю башыгъызгъа тюз болсун,
Ай, тюзню ётмеги тюзде джатса да,
Аны ит джолукъса ашамаз,
Ашхы кишилер аман джашамаз.

Ай джашамасынла аманла,
Бек битге элле сабанла,
Ашамасынла аны къабанла,
Белляу-а белляу, бала, бёлейим,
Къолларынгы бекден къаты байлайым.
О байлагъан бауум, бала, бек болсун.
Джашар кюнюнг, бала кёб болсун.
Лай-лай а лай-лай, бала лайтарсын,
Анасыны къыйынларын бала къайтарсын.
Анасыны къыйыны мынга халал аш болсун,
Бу балачыкъ тенглерини ичинде баш болсун.
Арбазынгда алтын терек орналсын,
Келген, баргъан анга атын байласын.
Чапрагъы къары джарым болады.
Аны салкъынында минг атлы къонады.
Тюб тамыры ярабатдан къарайды,
Баш булчугъу кёкде джулдузланы санайды.
Белляу а белляу, бала, бёлейим,
Къолларынгы бекден къаты байлайым,
О байлагъан бауум, бала ычхынсын,
Башчыгъынгдан бир иги къаргъа къычырсын.
Къаргъаланы къон ишлери къолдады,
Бу балачыкъ келе эсе джолдады.
Джолукъгъанына хапар сорады,
Соргъанындан бир хайыр хапар алады,
Бу балачыкъ аллай киши болады.
Лай-лай-а лай-лай, бала, лайлыкъдан,
Къуана, кюле келгин, бала джайлыкъдан.
О джайланы игилери да кюз болсун,
Аллахны кёлю башыгъызгъа тюз болсун.
Белляу а белляу, бала,бёлейим,
Балачыкъны бир толу юй болуб кёрейим.

К списку

(Нет голосов)

  • Нравится

Комментариев нет