Аланла, сиз Къара Чачлыны, къара суучукълагъа ушаш, миниатюраларын окъудугъузму? Аланы къалай джазылгъанларына эс бёлдюгюзмю?
Мен джангыдан окъуб чыкъдым да аланы - "поэзия" деген буду дедим. Къара чачлыны кесине да, фахмусуна да кёз тиймесин, алай а махталлыкъны махтамасакъ къалай болур?
Диананы акъ бла, къара бла да джазгъанларына къарасам - бир иги повесть, роман джазар чекге джетгенин ангылайма. Ол уллу чыгъарма - миниатюра мынчакъладан къуралыргъа да болур, назму бла хапар аралашыб барыргъа да болур, башха тюрлю джазылыргъа да болур.
Къара чачлыны бек алгъа назмуларын окъудукъ, бираздан хапарларын, энди уа лирика миниатюралары бла шагъырей болдукъ. Къара чачлыны джазгъанларын окъуй, не эсе да, Байрамукъланы Халиматны мени юсюмден джазгъаны эсиме тюшдю (25.12.1993 джыл, «Ленинни байрагъы»): "... Билял бизни литературада ёмюрлюк орнун алгъанды. Аны фахмусу ичине сыйынмай, тёрт джанына джилтинлеча чачырай, джюреклени джарытады, къууандырады. Мен литературагьа кёб джылны къуллукъ этеме, аны тамбласына сагьыш эте билмесем, сора мен кимме? Билялча джазыучу болгьан поэзиябызны тамбласына мен къоркъмайма, ол ёсерикди, кесин кимге да сюйдюрлюкдю… ".
Халимат умут этгенча болмады иш: бизни поэзиябызгъа, адабиятыбызгъа къой, Ана тилибизге тюшгенди къоркъуу. Алай а, Диананы чыгъармаларын окъусам, Халиматны сёзлерин, анга джораланнганча кёрюб, бираз тюрлендириб, айтама: "Дианача джазыучулары болгъан адабиятыбызны тамбласына мен къоркъмайма: ол ёсерикди, кесин кимге да сюйдюрлюкдю"...
Да алайды, Диана, мен ангылагъаннга кёре, бир уллу чыгъарма джазар дараджагъа джетгенсе. Башласанг - бир кюн бир битер. Сен джаза-джаза къыйналырса, биз а окъуй-окъуй къууанырбыз. Аллах болушсун.
_______________________________
_______________________________
Кесинги да, "Алтын къалам" конкурсда хорлагъанынг бла алгъышлайма. Ангылагъанла бары да джазгъанынга баш (5) багъаны салгъандыла. "Хайт" де.