- Кёб къычыргъандан – къоркъма, тынч олтургъандан – къоркъ.
- Джарашыу сюйген – джалынчакъ.
- Ёгюзню мюйюзюнден тутадыла, адамны сёзюнден тутадыла.
- Тойгъан антын унутур.
- Эл элде бирер малынг болгъандан эсе, бирер тенгинг болсун.
- Тин – байлыгъынг, терен саулугъунг.
- Айырылгъанланы айю ашар, бёлюннгенлени бёрю ашар.
- Аман адамны тепсинге олтуртсанг, къызынгы тилер.
- Суу ичген шауданынга тюкюрме.
- Чакъырылмай келген къонакъ сыйланмай кетер.
- Адамны аманы адамны бети бла ойнар.
- Телиге от эт десенг, юйюнге от салыр.
- Эрине къаргъыш этген къатын, эрнин къабар.
- Аш берме да, къаш бер.
- Сёз къанатсыз учар.
- Эшекге миннген – биринчи айыб, андан джыгъылгъан – экинчи айыб.
- Къумурсхала джыйылсала, пилни да джыгъадыла.
- Олтуруб кёрюнмей эди да, ёрге туруб кёрюне эди.
- Къарыусузгъа кюлме, онгсузгъа тийме.
- Къан бла кирген, джан бла чыгъар.
- Кёпюр салгъан кеси ётер, уру къазгъан кеси кетер.
- Айран тёгюлсе, джугъусу къалыр.
- Къонакъны къачан кетерин сорма, къачан келлигин сор.
- Айтхан сёзюне табылгъан.
- Экиндини кеч къылсанг, чабыб джетер ашхам.
- Бермеген къол, алмайды.
- Кийиминг бла танылма, адамлыкъ бла таныл.
- Таш бла ургъанны, аш бла ур.
- Сагъыш – къартлыкъгъа сюйюмчю.
- Аджаллыгъа окъсуз шкок атылыр.
- Билими азны – ауузунда кирит.
- Кийимни бичсенг, кенг бич, тар этген къыйын тюлдю.
- Ойнай билмеген, оюн бузар.
- Этек чакъмакълары баш джаргъан, сёлешген сёзлери таш джаргъан.
- Нарт сёз къарт болмаз.
- Чабакъсыз кёлге къармакъ салгъанлыкъгъа, чабакъ тутмазса.
- Уллу сёзде уят джокъ.
- Кесинге джетмегенни, кёб сёлешме.
- Орну джокъну – сыйы джокъ.
- Кесинг сынамагъан затны, адамгъа буюрма.
- Джыланны къуйругъундан басарынг келсе, аны башы болгъанын унутма.
- Къанны къан бла джуума, аманны аман бла къуума.
- Тай асырагъан, атха минер.
- Биреуге аманлыкъ этиб, кесинге игилик табмазса.
- Ханы къызы буюгъа-буюгъа киштик болду.
- Чомарт къонакъ юй иесин сыйлар.
- Бастасын ашагъан, хантусун да ичер.
- Тас болгъан бычакъны сабы – алтын.
- Ишленмеклик адамлыкъды.
- Адамны джюреги нени кёрюрге сюйсе, кёзю да аны кёрюрге ёч болады.
Профиль
|
|
|
|||