- Ишге юренсин къоллары, халкъ бла болсун джоллары.
- Тойгъан джерге джети къайт.
- Атлыны ашхысы, ат тизгининден билинир
- Биреуге аманлыкъ этиб, кесинге игилик табмазса.
- Хазыр ашха – терен къашыкъ.
- Иги – алгъыш этер, аман – къаргъыш этер.
- Зар адам ашынгы ашар, кесинги сатар.
- Битмегеннге сакъал – танг.
- Баргъанынга кёре болур келгенинг.
- Ата Джуртуму башы болмасам да, босагъасында ташы болайым.
- Байлыкъ болгъан джерде, тынчлыкъ джокъду.
- Ата – билек, ана – джюрек!
- Ариуну – ауруу кёб.
- Сабыр джетер муратха, сабырсыз къалыр уятха.
- Накъырданы арты керти болур.
- Джюрек кёзден алгъа кёрюр.
- Билим – акъылны чырагъы.
- Тюкюрюк баш джармаз, налат кёз чыгъармаз!
- Джаным-тиним – окъуу, билим.
- Ат да турмайды бир териде.
- Эл элде бирер малынг болгъандан эсе, бирер тенгинг болсун.
- Тенгни тенглиги джашай барсанг билинир.
- Орундукъ тюбюнде атылсам да, орта джиликме, де да айлан.
- Ёлген ийнек сютлю болур.
- Юйлю уругъа ит чабмаз.
- Алгъанда – джууукъ, бергенде – джау.
- Этек чакъмакълары баш джаргъан, сёлешген сёзлери таш джаргъан.
- Джюз элде джюз ёгюзюм болгъандан эсе, джюз джууугъум болсун.
- Джолда аягъынга сакъ бол, ушакъда тилинге сакъ бол.
- Тёрени джагъы джокъ.
- Эки элинги тыйсанг, джети элде махталырса.
- Атынг аманнга чыкъгъандан эсе, джанынг тамагъынгдан чыкъсын.
- Ашхылыкъ джерде джатмайды, аманлыкъ суугъа батмайды.
- Аджалсыз ёлюм болмаз.
- Тойгъан антын унутур.
- Чомарт джарлы болмаз.
- Рысхы – сют юсюнде кёмюк кибикди.
- Чомартха хар кюн да байрамды.
- Аманнга игилик этсенг, юйюнге сау бармазса.
- Баш болса, бёрк табылыр.
- Мухар, кеси тойса да, кёзю тоймаз.
- Джашда акъыл джокъ, къартда къарыу джокъ.
- Баш – акъыл ючюн, акъылман – халкъ ючюн.
- Ишлегенде эринме, ишде чолакъ кёрюнме.
- Чабакъсыз кёлге къармакъ салгъанлыкъгъа, чабакъ тутмазса.
- Аманнга да, игиге да оноусуз къатышма.
- Келлик заман – къартлыкъ келтирир, кетген заман – джашлыкъ ёлтюрюр.
- Нарт сёз – тилни бети.
- Кёпюр салгъан кеси ётер, уру къазгъан кеси кетер.
- Келинни – келгинчи, бёркню кийгинчи кёр.
Профиль
|
|
|
|||