- Душманны тышы – акъ, ичи – къара.
- Сёз садакъдан кючлюдю.
- Аманнга игилик этсенг, юйюнге сау бармазса.
- Къарнынг тойгъунчу аша да, белинг талгъынчы ишле.
- Ашхы болсанг, атынг чыгъар, аман болсанг, джанынг чыгъар.
- Къонакъ кёб келюучю юйню, къазаны отдан тюшмез.
- Мадар болса, къадар болур.
- Ана къойну – балагъа джандет.
- Ишленмеклик адамлыкъды.
- Джырчы ёлсе, джыры къалыр.
- Насыб бютеу халкъны юлюшюдю.
- Кечеси – аяз, кюню – къыш, джарлы къаргъагъа бир аш тюш!
- Ишлерге уял да, ашаргъа табма.
- Айыбны суу бла джууалмазса.
- Айырылгъанланы айю ашар, бёлюннгенлени бёрю ашар.
- Къартха ушагъан джаш – акъыллы, джашха ушагъан къарт – тели.
- Эли джокъну – кёлю джокъ.
- Ач къарным, тынч къулагъым.
- Малны кют, джерни тюрт.
- Джангыз торгъай джырламаз.
- Иесиз малны бёрю ашар.
- Бозаны арты дауур болур.
- Эте билген, этген этеди, эте билмеген, юретген этеди!
- Тили узунну, намысы – къысха.
- Кютгени беш эчки, сызгъыргъаны уа, джерни джарады.
- Ётюрюкчюню шагъаты – къатында.
- Кесинге джетмегенни, кёб сёлешме.
- Бермеген къол, алмайды.
- Чомартха хар кюн да байрамды.
- Адамны сыфатына къарама, сёзюне къара.
- Ариу сёз – джаннга азыкъ, аман сёз – башха къазыкъ.
- Ишни аллы бла къууанма да, арты бла къууан.
- Тёзгеннге, джабылгъан эшик ачылыр.
- Айырылмаз джууугъунга, унутмаз сёзню айтма.
- Айранны сюйген, ийнек тутар.
- Тюзню ётмеги тюзде къалса да, тас болмаз.
- Эл тойса, тоймагъан, эл къойса, къоймагъан.
- Аман киши кеси юйюнде – къонакъ.
- Таула не мийик болсала да, аууш табылыр.
- Джюрек кёзден алгъа кёрюр.
- Ачны эсинде – аш.
- Эл ауузу – элия.
- Нафысынгы айтханын этме, намысынгы айтханын эт.
- Мал кёб болса, джууукъ кёб болур.
- Ханнга да келеди хариблик.
- Аууздан келген, къолдан келсе, ким да патчах болур эди.
- Тюз сёз баргъан сууну тыяр.
- Ёзденликни джайгъан – джокълукъ.
- Кесине оноу эте билмеген, халкъына да эте билмез.
- Керти сёзге тёре джокъ.
Профиль
|
|
|||