- Тура эдим джата, къайдан чыкъды хата?
- Къая джолда джортма, ачыкъ сёзден къоркъма.
- Ариу сёз джыланны орнундан чыгъарыр.
- Атлыны кёрсе, джаяуну буту талыр.
- Чабакъгъа акъыл, табагъа тюшсе келеди.
- Байма, деб да, къууанма, джарлыма, деб да, джылама.
- Алтыннга тот къонмаз.
- Эр абынмай, эл танымаз.
- Аш кетер да бет къалыр.
- Урама да – ёледи, сатама да – келеди.
- Ана къойну – балагъа джандет.
- Иесиз малны бёрю ашар.
- Эки къатын алгъан – эки ташны ортасына башын салгъан.
- Джарашыу сюйген – джалынчакъ.
- Акъыл неден да кючлюдю.
- Бети – къучакълар, джюреги – бычакълар.
- Шекер бла туз – бир болмаз, ушамагъан – юй болмаз.
- Джырчы джырчыгъа – къарнаш.
- Булут кёкге джарашыу, уят бетге джарашыу.
- Тил бла келеди джыр да.
- Уруну арты – къуру.
- Миллетни бойну – базыкъ, аны бла кюрешген – джазыкъ.
- «Ёгюз, джаргъа джууукъ барма, меннге джюк боллукъса», - дегенди эшек.
- Къарын къуру болса, джюрек уру болур.
- Ачлыкъда тары гырджын халыуадан татлы.
- Таш бла ургъанны, аш бла ур.
- Адамны аманы адамны бети бла ойнар.
- Кюлме джашха – келир башха.
- Эри аманны, къатыны – аман.
- Эски джаугъа ышанма.
- Аякъларынгы джууургъанынга кёре узат.
- Чарсда алчыны эл кёреди.
- Этни да ашады, бетни да ашады.
- Адамны аты башхача, акъылы да башхады.
- Окъдан джара эртде-кеч болса да бителир, сёз джара, ёмюрге къалыр.
- Аман къатын сабий табса, бий болур…
- Окъуу – билимни ачхычы, окъуу – дунияны бачхычы.
- Айраннга суу къош, телиге джол бош.
- Ашда – бёрю, ишде – ёлю.
- Намыс болмагъан джерде, насыб болмаз.
- Хаухну атма, ёнгкючню сатма.
- Алтыда кюлмеген, алтмышда кюлмез.
- Сакъалы текени да бар, мыйыгъы киштикни да бар.
- Кёбню кёрген – кёб билир.
- Эл ауузу – элия.
- Мал кёб болса, джууукъ кёб болур.
- Азыгъы аз, алгъа къабар, аты аман, алгъа чабар.
- Аманны эки битли тону болур, бирин сеннге кийдирир, бирин кеси киер.
- Сакъламагъан затынга джолукъсанг, не бек къууанаса, не бек ачыйса.
- Хар зат кесини орнуна иги.
