- Билеги кючлю, бирни джыгъар, билими кючлю, мингни джыгъар.
- Эр абынмай, эл танымаз.
- Хатерли къул болур.
- Къыз тиширыу кеси юйюнде да къонакъды.
- Сёз – кюмюш, джыр – алтын.
- Кёбге таш атма.
- Эринчекни аурууу – кёб.
- Тойгъандан сора, ашны сёкме.
- Ашхы адам – халкъ байлыгъы, ашхы джер – джашау байлыгъы.
- Ата – билек, ана – джюрек!
- Сескекли кесин билдирир.
- Окъумагъан сокъурду, сокъур ташха абыныр!
- Байма, деб да, къууанма, джарлыма, деб да, джылама.
- Чомарт къонакъ юй иесин сыйлар.
- Аманнга игилик этсенг, юйюнге сау бармазса.
- Тил джюрекге джол ишлейди.
- Ат басханны джер билед.
- Ариу сёз – къылычдан джити.
- Аман адамны тепсинге олтуртсанг, къызынгы тилер.
- Тынгылагъан тынгы бузар.
- Баланы адам этген анады.
- Хаухну атма, ёнгкючню сатма.
- Аджалсыз ёлюм болмаз.
- Минг тенг да азды, бир джау да кёбдю.
- Накъырданы арты керти болур.
- Урунуу – насыбны анасы.
- Ишге юренсин къоллары, халкъ бла болсун джоллары.
- Гыдай эчки суугъа къараб, мюйюзле кёрмесе, джашма алкъын, дегенди.
- Ариу сёзде ауруу джокъ.
- Джашынгы кесинг юретмесенг, джашау юретир.
- Алтыннга тот къонмаз.
- Эркиши – от, тиширыу – суу.
- Юре билмеген ит, къонакъ келтирир.
- Хар зат кесини орнуна иги.
- Къаллай салам берсенг, аллай джууаб алырса.
- Адам къыйынлыгъын кёлтюрюр, зауукълугъун кёлтюрмез.
- Таукел адам тау тешер.
- Бетинги сатма, малынгы сат.
- Тенги кёбню джау алмаз, акъылы кёбню дау алмаз.
- Хар сёзню орну барды.
- Джумушакъ терекни къурт ашар.
- Татлы тилде – сёз ариу, чемер къолда – иш ариу.
- Ана – юйню кюн джарыгъы.
- Чакъырылмай келген къонакъ сыйланмай кетер.
- Тёрени джагъы джокъ.
- Тыш элде солтан болгъандан эсе, кесинги элде олтан болгъан игиди!
- Къарын къуру болса, джюрек уру болур.
- Башда акъыл болмаса, эки аякъгъа кюч джетер.
- Къызны минг тилер, бир алыр.
- Аджаллыгъа окъсуз шкок атылыр.
