Юйгюзге да игилик, сыйлы окъуучула эм да Эльбачыла!
Сиз билгенден, талай жылны ичинде Жырчы Сымаил бла Мёчюланы Кязим атлы адабият эришиу ётюп тургъанды, жарсыугъа, быйыл ол тёре къуралалмады. Болса да, андан уллу къыйынлыкъдан миллетибизни Уллу Аллах сакъласын!
Мен адабият бла, энчи уа назмучулукъ бла байламлы "Биринчи атламла " деген ат бла бериуле эте турама, хапарлы болгъаныгъызча, жазгъан адамла аздан - аз... Ол а не ючюндю? Мени оюмума кёре, адам талай зат ючюн жазаргъа болады шёндю:
1. Къагъытха кёлюндегин, жюрегиндегин тюшюрмесе, тынчаялмайды. - Ол меничала болур))).
2. Жаза башлайым да, юйюме бир хайыр да тюшюрюрме.
3. Миллетге назмучула керекдиле, назму болмагъан адабият - сюймекликсиз да болур, ол а - таза сезимди, жашауну татыулу да, бай да, сейир да этген, айнытхан!

Къысхасы!
Башында айтылгъан эришиуге къатышып, лауреатла болгъанла: Къушджетерланы Айшат, Газаланы Амина, Жабелланы Лаура эм да мен - Апполаны-Рахайланы Диана жангы эришиу ётдюрюрге излейбиз!
1. 35 жылдан артыкъ болмагъан.
2. Назмулары бир жерде да басмаланмагъан.
3. Ана тилинде жазгъан. Мен орус тилде, ингилиз эм да башха тилде уста жазама деген бар эсе, таулу тилге кёчюрюрге кюрешсин, къолундан келгенича, аланы да къошабыз.
Жюз тизгинден тёрт жюзге дери назмуларын бу темагъа салсынла, къысха хапар кеслерини юслеринден, суратлары.
20 мартха дери ишлери эришиуге алынадыла.
20 - чы мартдан 12 апрельге дери жюри ол намзуланы тинтирикди эм да биринчи, экинчи, ючюнчю жерлеге тийишли болгъанланы айырлыкъды.

1 жерге - 15 минг сом.
2 жерге - 10 минг сом.
3 жерге - 5 минг сом.

Бу ёчлеге къошаргъа сюйген бар эсе, хош келсин!
rahaevadiana@yandex.ru - мени почтамды, бери жазсын.
Ёчге берилген ахчаны уа ким ёзденлик этгени эришиуню ахырында айтылыр!

Алайды да, сакълайбыз!
Бу ёчле ючюн окъуна эришмесегиз да, къарачай - малкъар адабиятны жарыкъ жаннган чырагъы ёчюлмесин, аны айыбы бизде болур деген оюмну тутуп, хайт дегиз!!!!!!!!!


БУ ЭРИШИУНЮ ЮСЮ БЛА СОРУУЛАРЫ БОЛГЪАН "АКЪТАМАКЪ" ТЕМАДА СОРСУН, БЕРИ ЖАНГЫЗ НАЗМУЛА САЛЫНАДЫЛА.

Цитата

Къара чачлы пишет: Гаджаланы Асият 1989джылда Къарачай-Черкес республикада Хуса элде туугъанма, онбир классны Даусуз элде 2006 джылда бошаб, андан сора 2012 джылда медицина джаны бла институтну бошаб, бюгюнлюкде врач психиатр-нарколог болуб ишлейме! Я Аллахым эркинсе, Неда келед къолунгдан. Къарнашымы Сен сакъла, Джаханимни отундан. Къарнашыма тилекле, Мен Аллахдан тилейме. Джандетлеге киририн, Джюрегимден излейме.

Асият, Аллах къабыл этсин тилеклеринги, къарнашынгы обир дуниясы джарыкъ болсун!

Назмулурангы сюзюлюрюне разымыса, хапарсызма, уллу халатла да эслемейме, джангыз, басымла бирча тюшмей, окъусанг, бираз джунчутадыла. Разы болсанг, Акътамакъда сюзербиз. :))

Zhashuev,
Хош кел ))))!
Аперим санга ))))!
Биз бу эришиуню этейик деген заманда, тюберге излеп, танышып, хапар айтып, жаш адамны фахмусуна аны бла бирге кьууаныргьа дегенбиз. Алайды да, ахшы жаш, манга телефон номеринги бир бер.
Сакълайма )))
Тюбейик, фахмулугьунгу юсюнден бериу да этейик, сенича Жашла бизни миллетге бек керекдиле )))
Аперим энтта да)))!

Темирлан, салам алейкум.

"Акътамакъ" темагъа кёз джетдирирсе - анда Бегий улу Абдуллах санга джоралаб талай сёз айтханды. Кесине тюбеб сёлешсенг - артыкъ да хайырлы болур: ол да Налчыкъда джашайды.

Мен Биттууланы Беллама. 16 жылым болады, дизайнерге окъуйма. Назму 4-5 жыл алгъа жазып башлагьанма, мындан ары бютюн иги жазарма деп ышанама.


СЮЙМЕКЛИК ЖОЛ.

Мен туугъанлы бери сангады жолум
Алай жолумму ахыры жокъ,
Тартыла санга жеталмай къолум
Жюрегим болду ачыудан токъ.

Жеталмайма санга, кетгенсе узакъ
Жол бауум инчге болгъанды,
Санга баргъан жолум къарчады акъ
Жол жулдузум айча толгъанды.

Къайда излейим мен санга жолну
Узакъда жанады жулдузунг,
Манга узатчы жаным къолунгу
Мен жутулур тенгиз сен болгъун.

Арсар болама къатынга барыргъа
Къоркъама отунга кюйерге,
Барама санга,барама жанаргъа
Мен жанып кетер от эсенгда.

Мадар тапмайма,жолумму тыяргъа
Жюрегим хорлайды мени,
Амал тапмайма санга айтыргъа
Жюрек къулунг болгъанма сени.


АНАМА.

Анам сакълаучу жолум юзюлдю
Кюнюммю басды къара булут,
Анасыз жашау татлы тюйюлдю
Ексюзлюк къойду мени жутуп.

Анам жатыучу отоуну чырагъы
Жанмайды энди, ёчюлдю,
Татлы санлары, ариу сёзлери
Къара жер тюбюне кёмюлдю.
Жашау магъанам ёлдю анам бла
Итинген муратым ёчюлдю,
Терезе тюбюнде ана терегимми
Тамыры терен юзюлдю.

Сен жатыучу жастыкъны, къаты къысама
Мен жыягъыма, жаныма,
Ана жылыуун, татлы ийисин
Сен къойнунга къысхан сунама.

Ёксюзлюк мени сынады ачы
Атамтан, анамдан айырды,
Юйюмю жылыуун эриусюз чачды
Бар насыбыммы да сыйырды.

Къурман болайым сени жанынга
Къалдым мадарсыз, амалсыз,
Сенден алгъа ёлюп мен нек къалмадым
Жашауум, жашау тюйюлдю анасыз.



........... Хорлайды игилик.....

Огъурсуз ит къутурса
Къач дейдиле къатындан,
Аман тенгинг жау болса
Сакъ бол дейдиле андан.

Кёк кёкюреп буз жауса,
Букъ дейдиле жауундан,
Аман къоншунг таш атса
Къач дейдиле амандан.

Тенгинг сатып кер болса
Эришме дейдиле анга,
Адамлыгъынг тас болса
Жашауда жер жокъ санга.

Таш бла ургъанны аш бла ур
Деп юйретгенди атабыз,
Кюйсюзлюкден бол сабыр
Деп айтыучу эди анабыз.

Аманлыкъны игилик
Хорлайды ёмюрде да,
Аллахды барын сюзген
Кёкде да эм жерде да.



СЮЙМЕКЛИК ЖЫРЫМ.



Желле урадыла, терекле къымылдай
Суула агъадыла жрларын жырлай…

Жырлайма менда санга бу жырны
Сакъларма дейме сау жети жылны.

Турлукъма менда сени сюйгенлей,
Турлукъду шаудан суну бергенлей.

Мени унутсанг жиляр жырымда,
Жилямукъларым болур жауунла.

Мени унутсанг жашауум къурур
Мени унутсанг кюн кече болур.

Жети жыл кетер жети кюн кибик,
Турсакъ экибиз бир бирни сюйюп…

Мен, Боташланы Боташны къызы Диана ,1992 джыл Кисловодск шахарда туугъанма. Джашагъаным да, школну бошагъаным да Гитче Къарачайны Римгорское элинде. Ётген джыл Ставропольда медицинский университетни бошагъанма. Бу сагъатда интернатураны ётеме.
Биринчи назмуму 4 классда анама джазгъанма. Ол замандан бери джазгъаным аз болмагъанды, алай а кёбюсю орус тилде. Аланы да школдан, ВУЗдан ары чыгъармагъанма.
Бу конкурс а уа мени джазгъаныма алгъа тюртюу болгъанды. Къурагъанлагъа уллу сау бол!!!

***
Анама.

Дуния мюлкден багъалы,
Джашау джолуму джарытхан.
Сенге сюймеклик бек сыйлы,
Джюрек чырагъым - анам!

Ачы хапарда - балым,
Хар бир ауруудан дарман.
Кече-кюн менге къайгъылы,
Джан джууугъум - анам!

Толу айлай тынчлыкълы,
Сёзюнг мыдахдан къутхаргъан.
Джюзге да джетсе джылым,
Сабийме сенгне, анам.

Эм базымлы тенгим,
Неде да мени ангылагъан.
Таза хауалы джелим,
Кезбау умутум - анам!

Ауур сёзню кечиую,
Кеси джарсыуун унутхан,
Джашайса баланг ючюн,
Ёмюр сагъышым - анам!

Таза кёллю, умутлу,
Джашау магъана танытхан.
Сени къолунгда джаш тёлю,
Сыйлы устазым - анам!

Хар ишимде болушлукъ,
Узакъмы, джууукъму болсанг.
Айтама, джашырмай джукъ,
Нени да сенге, анам.

Болса кёзюнгде джыламукъ,
Мени джанымы къыйнагъан,
Башха кёрюнед хар зауукъ.
Къайгъырма джукъгъа, анам!

Толу джюрекден ийнана,
Тилейме Уллу АЛЛАХдан
Саулукъ хар сени санынга,
Насыб тыйыншлы, анам!

Ётсюн, ашыгъыб, джылла -
Сен эм багъалы адам!
Хар бир кёзюуде, заманда
Сюеме сени, анам!

***
Кюмюш кече

Чууакъ кечеги кёкде
Джарыкъ джулдузла джылтырай,
Шошлукъ джайылыб элде -
Сау дуния джукълайды!

Акъ, кёбелек къарла
Хар бир джерни да джабыб.
Юй башладан джырлайд
Джел, оюула салыб.

Сууукъ хауа кюмюшлей,
Къардан кюйюз дуу джанад,
Нызы терек ийисле
Арбаз мюйюшден чачад.

Сейир халлы бурчакъла
Джибек чачлай тозураб,
Терек тизгин мынчакълай
Тауну башын къучакълайд.

Кечеги кёкню кюрени
Джерни юсюн джарытад,
Рахат тёге акъ нюрюн,
Тюнню тюшге ушатад.

Кюмюш къышхы кечеде
Кёзбау талпыу джашайды,
Джаннга тынчлыкъ джибере,
Ариу макъам бла джырлайды.

***

Талай джыл мындан алгъа
Эсиме сагъыш келеди,
Джюрекге сала тамгъа,
Джукъуму эки бёледи.

Мен ангъа джууаб излей
Арада заман ётеди.
Оюмну дауда билей
Сагъышлайма:"Джашауну магъанасы недеди?"

Кюн, кече заман аулай
Биз неге джашау джоябыз?
Къууана да, бир джылай
Не хайыр анда табабыз?

Бир, излейбиз байлыкъны.
Алтынны кюнлей кёребиз.
Толтура хар къылыкъны
Айбатлыкъны джесирине киребиз.

Сыйын кёрмей джарлыны,
Ашхыдан байны сайлайбыз.
Унутуб адамлыкъны,
Ачхадан насыб сакълайбыз.

Бир бирден омакъ бола,
Артыкълыкъда эришебиз.
Тыш къарамгъа къайгъыра,
Джелбаш ариулукъгъа илешебиз.

Акъыл, билимни багъасын
"Престижно" ючюн унутабыз,
Джорукълукъну хауасын
Улху тёлей, къаралтабыз.

Тутуб джюрекде зарлыкъны,
Тюлкю тилледе сёлешебиз.
Къарамлада тарлыкъны
Адет кибик юретебиз.

Булджуулагъа джоюб заманны,
Динни орунсуз къоябыз,
Кереклисин эслемейин джанны
Къуру бу дуния бла тоябыз.

Былай ашырсакъ кюнлени
Биз тюзлюкге келмезбиз,
Башха динлей тюрлениб
Джалгъан миллетге джетербиз.

Биз ол бушууну кёрмезлей
Динни джолларын сайла'йыкъ,
Джюз-минг тилекле тилей,
Джангыз АЛЛАХны сыйла'йыкъ.

АЛЛАХ разылыкъ излеген
Джашау магъана болурча,
Ычхыныб гюнахлы тизгинден,
Нюрден джюрекле толурча.

Диана, хош кел. Назмуланы сюзюлюу Акътамакъ кафеде ётеди, джуукъ бол!

Айшат,
Сау бол!!!!!

Багъалы жаш жазыучула!!!
Бюгюн эришиуню ахыр кюнюдю)))).
Назму иерик адам бар эсе, ашырсын кече онекиге дери...
Алайды да, сакълайбыз !

Конкурс бюгюн тамамланады сора:

Цитата
Къара чачлы пишет: Багъалы жаш жазыучула!!! Бюгюн эришиуню ахыр кюнюдю)))). Назму иерик адам бар эсе, ашырсын кече онекиге дери... Алайды да, сакълайбыз !

Конкурсну къурагъанлагъа-бардыргъанлагъа, анга къошулгъанлагъа да разылыкъ бла бирге, бир айтырым да бар эди.

Энди джол (быллай Конкурсла бардырылыб турурча амал болса) авторланы - барыны да - назмулары "Акътамакъ" темада сюзюлюрге керек болурламы: кемликлери ачыкъ айтылыб, авторла кеслери да аланы къоратыр джанындан кюрешмеселе, къалай болур?

Конкурс - халкъда джаш фахмуланы ачыкълагъан бла бирге, аланы назму джазыуда усталыкъларыны ёсерине да себеб болурча болса, иги боллукъ эди. Ёзге, алай болмаса да, Конкурсну хайыры боллугъуна ишек джокъду.

Авторланы маджал назмуларын "Минги Тау" журнал да басмаларгъа разылыгъын билдиргенди.

Аламат, Билал.
Эришиу ётюп бошасын да, назмуланы Минги таугъа да элтирме.
Хорлагьанла бла бериуле да этерме.
Аллах айтса, иги не да)))).
Он бир адам барды да, ол да аламатды! Болмай кьалгьандан Аллах сакьласын!)))
Атабиятыбыз жашарыкьды, Аллах айтса, жашнагьан да, айныгьан да этерикди!!!

Цитата
Къара чачлы пишет: Аламат, Билал. Эришиу ётюп бошасын да, назмуланы Минги таугъа да элтирме. Хорлагьанла бла бериуле да этерме. Аллах айтса, иги не да)))). Он бир адам барды да, ол да аламатды! Болмай кьалгьандан Аллах сакьласын!))) Адабиятыбыз жашарыкьды, Аллах айтса, жашнагьан да, айныгьан да этерикди!!!

Диана, бек къууандым. Бу адабият Конкурс да, ёч да джылдан джылгъа игиден иги бола, Эришиуге къошулгъанла да кёбден кёб бола барлыкъларына - ишегим джокъду.

Эсиме бир иги идея-оюм келгенди. Къарачай-малкъар тилде джазгъан джаш тёлюге (джыллары 35-ден атламагъанлагъа) болушлукъгъа бир фонд ачаргъа керекди. "Фонд поддержки молодых авторов, пишущих на карачаево=балкарском языке" дегенча. Регистрировать, открыть счет. И старшее поколение писателей, и бизнесмены - все, кому не безразлична судьба родного языка и литературы - думаю,будут помогать.

Если ты, Диана, со своими молодыми коллегами-единомышленниками возьметесь за это дело - думаю, польза будет. Главное, начать, дальше будет видно. "Сиз мадар этсегиз, мен къадар этерме". Иги иннет бла тюз ишни башлагъанлагъа, бардыргъанлагъа Аллах болушмай къоярыкъ тюлдю.

Юйге да игилик!!!
Айтханыбызча, жюри эришиуге ийилген назмулагъа 20-чы мартдан 12-чи апрельге дери къарарыкъ эди да, ол тамамланды.
Биринчиси, Лайпанланы Билалны туугъан кюню бла алгъышлайбыз!!! Кеп жаша , Билал!!!)))))))))

Жюри оюм этгеннге кёре, ол оюм а тынгылы, кеп сагъыш этилип , алай къуралгъанды, бу жаш адамла ёчлеге тийишли боладыла:

3-чю жер-Гогуйланы Алибек-5 минг сом.
2-чи жер-Биттууланы Белла-10 минг сом.
1-чи жер-Жашууланы Темирлан-15 минг сом. Темирлан аламат, адетли-намыслы, акъыллы жашды, Аллах фахмусун ёсдюре барсын! Аперим!

Эм да бек гитче болуп жыл саны, эришиуге къатышхан Рахайланы Амина 3 минг сом бла саугъаланады.

Багъалы жамауат, бу эришиу, Аллах айтып, жыл сайын бардырыллыкъды. Келир жылдан башлап а кеси да Лайпанланы Билалны аты бла ётдюрюллюкдю. Билал жаш телюге бек къайгъырады, аны сагьышын кеп этеди, аны себепли ёч Билалны атындан берилликди.

Жюри:
Къушджетерланы Айшат
Жабелланы Лаура
Рахайланы Диана - жюрийни председатели.

Соруулары болгьанла - rahaevadiana@yandex.ru

Сау-эсен болугъуз!!!

Конкурсха къошулгъанланы бирден алгъышлайма! Ызы къалын болсун! Блай эте, эришиулеге къошула , ёсе барыр мадарла чыгъыб тутсунла! Фахмугъуз барды, кюрешиб туругъуз!

Билал, туугъан кюнюгюз бла алгъышлайма! Аллах саулукъ берсин! Джаш тёлюге энчи эс иесиз, къайгъырасыз, Муратыгъызгъа джетигиз!

Алгъышлайма адабият ёчге тыйыншлы болгъан джаш къаламдашланы. Аллах айтса, бара-баргъанда литературабызны атын айтдырырча адамла болурла.

Жюрини да алгъышлайма - фахмулу къызланы, джащланы излеб, табыб, чыгъармаларын да сюзюб, тюз оноу этгени ючюн.

Конкурс эртдерек ачылса, къошулгъанла да кёбюрек болургъа болурла. Джангыз, "Акътамакъ" темада назмулары сюзюле турса, кеслерине иги боллукъ эди. Алай болмаса, энчи адреслерине джазыб, кемликлерин кёргюзте, айта турургъа керекди. Алайсыз, къалай ёсерле?

Не эсе да, бу Конкурс, башха конкурслача, тохтаб къаллыкъ тюлдю. Джангыз , фахмулу къызланы, джашланы, сабийлени табаргъа, арагъа чыгъарыргъа керекди. Аны этерик а - Диана, Айшат, Лаура.
Къалгъан таб боа барлыкъды, Аллах айтса.
Игилик, ашхылыкъ барыгъызгъа да.

Цитата
Къара чачлы пишет: Лайпанланы Билалны туугъан кюню бла алгъышлайбыз!!! Кеп жаша , Билал

Диана, сау бол. Бир иги иш башланса, джетишимли бардырылса - дуньягъа джангыдан туугъанча болады адам. Мен да алайма.

Цитата
Айшат пишет: Билал, туугъан кюнюгюз бла алгъышлайма! Аллах саулукъ берсин! Джаш тёлюге энчи эс иесиз, къайгъырасыз, Муратыгъызгъа джетигиз!

Сау бол, Айшат..
Муратым - тилибизни сакълау, джаш фахмуланы ёсдюрюудю. Аны уа - барыбыз да биргелей кюрешсек эталлыкъбыз джангыз.

Алгъышлайма хорлагъанланы, артыкъсыз да Алибекни)) (танышым болгъаны ючюн)))

Цитата
Къара чачлы пишет: Жюри оюм этгеннге кёре, ол оюм а тынгылы, кеп сагъыш этилип , алай къуралгъанды, бу жаш адамла ёчлеге тийишли боладыла:

жюри эм бек не затлагъа эс бёлгенди бу адамланы назмуларын сайлай туруб, къысхасы бла джазылса аман боллукъ тюл эди, мен сагъыш этген бла))

Мне было очень интересно и приятно! Я смотрела и на владение языком, и на то как конкурсант принимает наши советы/замечания, а что то просто брало за душу.
Оценивали по следующей схеме: каждый член жюри присваивал участникам баллы от 1 до 10. Суммированием баллов определяли места. Эта наиболее справедливая система оценки, на мой взгляд. ))

Sabr,

Цитата

Sabr пишет: Алгъышлайма адабият ёчге тыйыншлы болгъан джаш къаламдашланы. Аллах айтса, бара-баргъанда литературабызны атын айтдырырча адамла болурла. Жюрини да алгъышлайма - фахмулу къызланы, джащланы излеб, табыб, чыгъармаларын да сюзюб, тюз оноу этгени ючюн. Конкурс эртдерек ачылса, къошулгъанла да кёбюрек болургъа болурла. Джангыз, "Акътамакъ" темада назмулары сюзюле турса, кеслерине иги боллукъ эди. Алай болмаса, энчи адреслерине джазыб, кемликлерин кёргюзте, айта турургъа керекди. Алайсыз, къалай ёсерле? Не эсе да, бу Конкурс, башха конкурслача, тохтаб къаллыкъ тюлдю. Джангыз , фахмулу къызланы, джашланы, сабийлени табаргъа, арагъа чыгъарыргъа керекди. Аны этерик а - Диана, Айшат, Лаура. Къалгъан таб боа барлыкъды, Аллах айтса. Игилик, ашхылыкъ барыгъызгъа да.

Амин Аллах!

Цитата
Къара чачлы пишет: 3-чю жер-Гогуйланы Алибек-5 минг сом. 2-чи жер-Биттууланы Белла-10 минг сом. 1-чи жер-Жашууланы Темирлан-15 минг сом. Темирлан аламат, адетли-намыслы, акъыллы жашды, Аллах фахмусун ёсдюре барсын! Аперим! Эм да бек гитче болуп жыл саны, эришиуге къатышхан Рахайланы Амина 3 минг сом бла саугъаланады.

Присоединяюсь к поздравлениям! Желаю в дальнейшем больших творческих и жизненных успехов!)))

А какие стихотворения выиграли? Или все стихи авторов?

Джарыкъ,
Оценивались все стихи автора, общее впечатление))

А можно фамилию победителя и стихи еще раз и красными буквами)), чтобы легче было находить и читать)).

У меня не получается, я с телефона( может девочки сделают.

Ас–саляму алейкум барыгъызгъа да.))
Авторларыбыз, алгъышлайма! Аллах, Субханаху уа Таъаля, къууандырсын сизни. Фахмугъуз бла хакъгъа къуллукъ этер насып буюрулсун.

Кесигиз да, неме, къайдасыз? Кёрюне турсагъыз, кесигизни танытсагъыз къарт студентни ыразылыгъын табарсыз.))

Кесибизни юсюбюзден: сюйгенибизча жетишип туралмадыкъ, айып этмегиз. Окъулмай къалгъан назму болмагъанды, барыгъызны да жазгъаныгъызны сюзерча тап тюшюб а турмады.
1/2/3 жерни алмадым деп, кёлсюзлюк этип, жазгъанын къоярыкъ чыкъмазды деп ийнанырыгъым келеди. Чыкъмаз, ин шаа Аллах. Жазгъан башына сый чакъырыр ючюн жазмайды.
Сау болугъуз барыгъыз да. «Акътамакъгъа» хош келигиз!

Цитата
Айшат пишет: Мне было очень интересно и приятно! Я смотрела и на владение языком, и на то как конкурсант принимает наши советы/замечания, а что то просто брало за душу. Оценивали по следующей схеме: каждый член жюри присваивал участникам баллы от 1 до 10. Суммированием баллов определяли места. Эта наиболее справедливая система оценки, на мой взгляд. ))

Аиша, иги эсинге тюшген эди ол система))) Путём переговоров вряд ли что–нибудь решили бы. И в этом тоже была своя прелесть.)