2013 дж. июлну 18
" К Ъ А Р А Ч А Й "
Джарсыуларыбыз
АТАЛА БЛА АНАЛАГЪА СЁЗЮМ
Джылдан джылгъа адам сан къошулгъан аз, ёлюм а кёб бола барады. Аны чурумлары кёб тюрлюдюле.
Алгъаракъ джыллада, Совет Союзну рысхысын юлешген, закон-джорукъ ишлемеген, «ит иесин танымагъан» кёзюуледе, рекетлик, тонау, гудучулукъ джайылыб, бир-бирин къырыу башланнган эди. Кёб джигит, болумлу джашыбыз рысхы, ачха-бочха амалтын ёлюб кетди.
Акъыртын-акъыртын кърал бегий, закон-джорукъ ишлей башлагъанында, ол къырышыу азгъа айлана келиб, тохтады. Алай а къууаныргъа эртде кёре эдим. Мен былайда тюрлю-тюрлю заранлы оюнланы, наркоманияны, гудучулукъну, бирси палахланы юслеринден айтмайма.
Къазауат бара тургъанча, алай кёб адамны джашауун алыб баргъан аварияланы юслеринден айтама. «Ёлюм хакъды, ёлмезлик джокъду» деб, кеси кесибизни кёлюбюзню басаргъа кюрешир эдик, ёлгенлени асламысы ма ол алкъын джашауну кёрмеген джаш адамла болмасала.
«Ол-бу элде джашла авариягъа тюшюб ёлдюле», - деген сёзлени эшитмеген бир кюнюбюз ётмейди. «Ауушду», «ауушханды» деген сёзледен талай къатхак ёб айтыладыла «ёлдю», «ёлгенди» деген сёзле. Не къыйынлыкъды миллетге бу?
Ёлгенлеге ачымазча болуб тебрегенбиз. Джаш адамланы къурутуб баргъан аварияла кюн сайын, кече сайын боладыла. Бюгюнлюкде адамгъа къайры бараса, къайдан келесе десенг, «ёлгеннге барама, ёлгенден келеме» дегенден башха сёз джокъду, ант этейим.
Тюппе-тюз, ариу джолда башы тюбюне айланыб, гюттю болуб тургъан машинаны кёрсенг, къыйналгъан да, сейирсиннген да этесе: «Авария этилмезлик джерде нек болду былай?» деб. Сора кетсенг а ачыкълайса, не ичиб-эсириб, не джюрюте билмегенликден, не чёрчекликден болгъанын аварияны. Машина джюрютюрге эркинлик къагъытын сатыб алгъан, сынамы болмагъан джаш адамны ахыры алай болмай, къалай болур? 15-16 джылдагъы джаш адамчыкъ, омакъ, сыйлы тыш къраллы машинагъа миниб, джолгъа чыкъса, «менича ким болур» деген кёл бла газдан аямай басыб бара береди. Машиналаны кёблюгюн мен айтмасам да билесиз орамлагъа сыйынмайдыла. Джолда джюрюу джорукълагъа сыйыныб, сакъ болуб джюрюмесенг, кесинге да, гюнахсыз адамлагъа да къыйынлыкъ саллыкъса. Бюгюнлюкде машинаны техосмотрун ётген къыйын тюлдю - ачха бердинг да, ётдюнг. Ма аллай закон+джорукъ сакъланмагъаны да палахха тюбетген чурумланы бириди.
Къарагъыз, миялаларына къара плёнкала джабышыб, сигналлары тюрлютюрлю тауушлу, не от джукълатыучу, не ГАИ-ни къуллукъчусу келеди деб турсанг, энчи машина болуб чыгъады. Ачы къычыртыб ётселе: «Не къан джаугъанды, кимге не болгъанды?» деб, сескекленесе. Аладан джунчуб, авария этиб да къоядыла бир-бирле. Бизни джерле тау джерледиле, айланчлары кёбдюле. Акъыллары бегимеген джаш адамланы джолда башха джюрюгенлени сыйларын кёрюрге эслерине да келмейди.
Заводдан джангы чыкъгъан машинаны арт джанында пружинлерин къысха кесиб, аллы кёлтюрюлюб, арты да джолну сыдыра, кючлю фарала салыб, аллындан келгенни кёзлерин къамата, джюрюйдюле бир къауумла. Ала, джоллада алларына адам, мал чыгъады деб сагъыш этмей, чаришле къурайдыла. Машинаны кесини мангылай къыйыны бла алмагъан сабий къайдан билликди ачханы къайдан чыкъгъанын? Бюгюн аны уруб чачса, тамбла биягъы атасы, «джанынг сауду» деб, башын сылаб къояды.
Бюгюнлюкде къайсы элде да джамагъат къабырлагъа кирсенг, 18-25 джыл болгъанладыла сын ташлада атлары джазылгъанла. Ма аны ючюн ненча джаш келинчик отоудан чыкъмай къалгъанды!
Джашла азлыкъдан ненча къыз юйдеги къураялмай къалыб барады. Кеслери бла къалмай, джарлы атаны-ананы джюрек ауруулу этиб, джашауларын да юзедиле аварияда чарпыгъанла. Баласын алай тас этген ата-ананы джашауларыны не магъанасы къалады? Биз, элледе афендиле, имамла, ол къыйынлыкъны кюн сайын кёребиз, джюрегибиз ауруйду миллетни бу джарсыууна. Хаман айтханлай, эслерине салгъанлай турабыз межгитледе джаш адамлагъа: «Аллах берген джашауугъузгъа алай сансыз болмагъыз. Машинагъа миниб, чёрчеклик, уллу кёллюлюк, джууабсызлыкъ этиб ёлгенни иш этиб кеси кесин ёлтюргенден башхасы джокъду», - дегенлей турабыз. Аны юсюне да башха бир адамланы джашауларын юзюб мурдар боладыла. Ол бек уллу гюнахды.
Ата-аналаны терсликлери да барды бу аварияланы юслеринде. Сабийди деб къарамай, право сатыб алыб да берселе, аламат машиналагъа да миндирселе: «Ариу джюрю, сакъ джюрю, ичибэсириб минме», - деб, хаман айтыб, юретиб турмасала, къатыракъ болуб, тыйгъычлыкъ этмеселе, чыртда бу болум тюзеллик тюлдю.
Багъалы атала-анала, келигиз, бирлешейик, бу палахны джолун кесейик.
МАМЧУЛАНЫ
Азрет хаджи.
Чапаевское эл.