- Кёбге таш атма.
- Аз сёлешген, къайгъысыз турур.
- Ариу сёз аурууунгу алыр.
- Эр абынмай, эл танымаз.
- Бети – къучакълар, джюреги – бычакълар.
- Сормай – алма, чакъырылмай – барма.
- Биреуге аманлыкъ этиб, кесинге игилик табмазса.
- Чарсда алчыны эл кёреди.
- Чомарт бергенин айтмаз.
- Уллу айтханны этмеген – уллаймаз.
- Аджашханны ызындагъы кёреди, джангылгъанны джанындагъы биледи.
- Эски джаугъа ышанма.
- Уллу сёлешме да, уллу къаб.
- Мал кёб болса, джууукъ кёб болур.
- Ёлмесенг да, къарт дамы болмазса?
- Джаным-тиним – окъуу, билим.
- Юре билмеген ит, къонакъ келтирир.
- Чакъырылмай келген къонакъ сыйланмай кетер.
- Ауурну тюбю бла, дженгилни башы бла джюрюген.
- Келинин тута билмеген, къул этер, къызын тута билмеген, тул этер.
- Ишленмеклик адамлыкъды.
- Билим – акъылны чырагъы.
- Кёл ашады да, кеси ашады.
- Ана – юйню кюн джарыгъы.
- Аман хансны – урлугъу кёб.
- Дуния малгъа сатылма, кесингден телиге къатылма.
- Джангызны оту джарыкъ джанмаз!
- Этим кетсе да, сюегим къалыр.
- Джарлы тюеге минсе да, ит къабар.
- Къуллукъчума, деб махтанма, къуллукъ – хаух джамчыды!
- Адамны сабийин сюйген джюреги, бычакъча, джитиди.
- Ачылгъан эт джабылыр, кёрген кёз унутмаз.
- Чомартны къолун джокълукъ байлар.
- Акъылсызны джууукъгъа алма, акъыллыны кенгнге салма.
- Уясында не кёрсе, учханында аны этер.
- Сакъламагъан затынга джолукъсанг, не бек къууанаса, не бек ачыйса.
- Нафысынгы айтханын этме, намысынгы айтханын эт.
- Аманнга да, игиге да оноусуз къатышма.
- Сабий кёргенин унутмаз.
- Сёз садакъдан кючлюдю.
- Бозанг болмагъан джерге, къалагъынгы сукъма.
- Гугурук къычырмаса да, тангны атары къалмаз.
- Мадар болса, къадар болур.
- Къайгъыны сюйген, къайгъы табар.
- Байлыкъ болгъан джерде, тынчлыкъ джокъду.
- Сёз къанатсыз учар.
- Дуния мал дунияда къалады.
- Итли къонакъ джарашмаз.
- Ашыкъгъанны этеги бутуна чырмалыр.
- Адам бла мюлк юлешмеген эсенг, ол адамны билиб бошагъанма, деб кесинги алдама.
Профиль
|
|
|||