- Чакъырылмагъан къонакъ – орунсуз.
- Татлы тилде – сёз ариу, чемер къолда – иш ариу.
- Юй кюйдю да, кюйюз чыкъды, ортасындан тюйюш чыкъды.
- Суу ичген шауданынга тюкюрме.
- Джукъу тёшек сайламайды.
- Тешигини къатында, чычхан да батыр болур.
- Эркишини аманы тиширыуну джылатыр.
- Азыкъ аз болса, эртде орун сал.
- Халкъгъа джарагъан, джарлы къалмаз.
- Алгъанда – джууукъ, бергенде – джау.
- Зар адам ашынгы ашар, кесинги сатар.
- Адамны джюреги нени кёрюрге сюйсе, кёзю да аны кёрюрге ёч болады.
- Къайтырыкъ эшигинги, къаты уруб чыкъма.
- Байлыкъ келсе, акъыл кетер.
- Урама да – ёледи, сатама да – келеди.
- Тилчи бир сагъатха айлыкъ хата этер.
- Джаз бир кюнню джатсанг, къыш талай кюнню абынырса.
- Эринчекни аурууу – кёб.
- Соргъан айыб тюлдю, билмеген айыбды.
- Ишин билген, аны сыйын чыгъарады.
- Къолунгдан къуймакъ ашатсанг да, атаны борчундан къутулмазса.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Ач, тоймам, дейди, тойгъан, ач болмам, дейди.
- Мураты болгъанны джюрек тебюую башхады.
- Ёзденликни джайгъан – джокълукъ.
- Джаным-тиним – окъуу, билим.
- Ёлмесенг да, къарт дамы болмазса?
- Бозаны арты дауур болур.
- Ауругъаннга – кийик саулукъ, джетген къызгъа – чилле джаулукъ.
- Аманны тукъумуна къарама, игини тукъумун сорма.
- Байлыкъ болгъан джерде, тынчлыкъ джокъду.
- Ашаса, ашамаса да, бёрюню ауузу – къан.
- Таш ата билмеген, башына урур.
- Эрине къаргъыш этген къатын, эрнин къабар.
- Чомарт къолда мал къалмаз.
- Ата – билек, ана – джюрек!
- Кёлю джокъну – джолу джокъ.
- Кенгеш болса, уруш болмаз.
- Ышармагъан – кюлмез, кюлмеген – къууанчны билмез.
- Хансыз джомакъ болмаз.
- Джаралыны джастыгъында сау ёлюр.
- Билеги кючлю, бирни джыгъар, билими кючлю, мингни джыгъар.
- Адебсиз адам – джюгенсиз ат.
- Итли къонакъ джарашмаз.
- Къызны минг тилер, бир алыр.
- Орну джокъну – сыйы джокъ.
- Ариу сёз – къылычдан джити.
- Кёб джат да, бек чаб.
- Бал ашаргъа сюе эсенг, чибин ургъаннга тёз.
- Билген билмегенни юретген адетди.
Профиль
|
|
|
|||