- Ана – юйню кюн джарыгъы.
- Гыдай эчки суугъа къараб, мюйюзле кёрмесе, джашма алкъын, дегенди.
- Башы ишлегенни, ауузу да ишлер.
- Сангырау къулакъ эл бузар.
- Айтылгъан буйрукъ, сёгюлмез
- Айтхан сёзюне табылгъан.
- Келгинчи, къонакъ уялыр, келгенден сора, къонакъбай уялыр.
- Аз айтсам, кёб ангылагъыз.
- Сабийни джумушха джибер да, ызындан бар.
- Айранын берсенг, челегин да къызгъанма.
- Душманны тышы – акъ, ичи – къара.
- Айыбны суу бла джууалмазса.
- Джаз бир кюнню джатсанг, къыш талай кюнню абынырса.
- Ачыу алгъа келсе, акъыл артха къалады.
- Кёлю джокъну – джолу джокъ.
- Ач уят къоймаз.
- Байдан умут эте, джарлыдан ёгюз багъасы къорады.
- Аманны къуугъан, аманлыкъ табар.
- Джуртун къоругъан озар.
- Бал ашаргъа сюе эсенг, чибин ургъаннга тёз.
- Игилик игилик бла сингдирилиучю затды.
- Борчунг бар эсе, хурджунунга ойлаб узал.
- Тенги кёбню джау алмаз, акъылы кёбню дау алмаз.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Ашаса, ашамаса да, бёрюню ауузу – къан.
- Джырчы джырчыгъа – къарнаш.
- Атадан ёксюз – бир ёксюз, анадан ёксюз – эки ёксюз.
- Телиге от эт десенг, юйюнге от салыр.
- Атлыны кёрсе, джаяуну буту талыр.
- Чыбыкълыкъда бюгюлмеген, къазыкълыкъда бюгюлмей эди.
- «Ёгюз, джаргъа джууукъ барма, меннге джюк боллукъса», - дегенди эшек.
- Ариу сёз – джаннга азыкъ, аман сёз – башха къазыкъ.
- Билим насыб берир, билим джолну керир.
- Ёнгкюч къууана барыр, джылай келир.
- Эринчекни аурууу – кёб.
- Ушамагъан – джукъмаз.
- Акъыллы айтыр эди, акъылсыз къоймайды.
- Бетинги сатма, малынгы сат.
- Кёпюр салгъан кеси ётер, уру къазгъан кеси кетер.
- Къарны аманнга къазан такъдырма, къолу аманнга от джакъдырма.
- Сабыр джетер муратха, сабырсыз къалыр уятха.
- Ач келгенни – тойдур, кеч келгенни – къондур.
- Аллахдан тилесенг, кёб тиле.
- Сёз – кюмюш, джыр – алтын.
- Таш ата билмеген, башына урур.
- Акъыл неден да кючлюдю.
- Чомарт къолда мал къалмаз.
- Аджашханны ызындагъы кёреди, джангылгъанны джанындагъы биледи.
- Къызны минг тилер, бир алыр.
- Джаш къарыу бла кючлю, къарт акъыл бла кючлю.
Профиль
|
|
|
|||