- Тамырсыз терекге таянма – джыгъылырса.
- Элде адам къалмаса, ит тахтагъа минер.
- Къуру гыбыт бек дыгъырдар.
- Юйлю уругъа ит чабмаз.
- Ёлюк кебинсиз къалмаз.
- Мураты болгъанны джюрек тебюую башхады.
- Чакъырылмагъан къонакъ – орунсуз.
- Билим – акъылны чырагъы.
- Эте билген, этген этеди, эте билмеген, юретген этеди!
- Аууз сакълагъан – джан сакълар.
- Накъырданы арты керти болур.
- Эки къатын алгъан – эки ташны ортасына башын салгъан.
- Къумурсхала джыйылсала, пилни да джыгъадыла.
- Ашыкъгъан cуу, тенгизге джетмез.
- Агъач халкъгъа алтынды, иссиликге салкъынды.
- Айтылгъан буйрукъ, сёгюлмез
- Экиндини кеч къылсанг, чабыб джетер ашхам.
- Джырчы джырчыгъа – къарнаш.
- Къыз чыгъаргъан – къызыл къымжа.
- Суугъа – таянма, джаугъа – ийнанма.
- Айранын берсенг, челегин да къызгъанма.
- Экеулен сёлеше тура эселе, орталарына барыб кирме.
- Таш бла ургъанны, аш бла ур.
- Адамны аманы адамны бети бла ойнар.
- Байма, деб да, къууанма, джарлыма, деб да, джылама.
- Ачыу алгъа келсе, акъыл артха къалады.
- «Ма», - дегенни билмесенг, «бер», - дегенни билмезсе.
- Къан бла кирген, джан бла чыгъар.
- Эрине къаргъыш этген къатын, эрнин къабар.
- Къартны бурнун сюрт да, оноугъа тут.
- Халкъгъа джарагъан, джарлы къалмаз.
- Джюрекден джюрекге джол барды.
- Аман адам этегингден тутса, кес да къач.
- Билмегенинги, билгеннге сор.
- Джюрекге ариу – кёзге да ариу.
- Ойнай билмеген, уруб къачар.
- Адамны адамлыгъы къыйынлыкъда айгъакъланады.
- Кёбден умут этиб, аздан къуру къалма.
- Гыдай эчки суугъа къараб, мюйюзле кёрмесе, джашма алкъын, дегенди.
- Джаханимни кёрмей, джандетге кёл салмазса.
- Шайтан алдады, тюзлюк къаргъады.
- Таула не мийик болсала да, аууш табылыр.
- Магъанасыз сёз – тауушсуз сыбызгъы.
- Ётюрюк хапар аякъ тюбю бла джюрюйдю.
- Сакъалы текени да бар, мыйыгъы киштикни да бар.
- Аджал соруб келмез, келсе, къайтыб кетмез.
- Тешигини къатында, чычхан да батыр болур.
- Джарлы джети элни сёзюн этер.
- Юйюнгден чыкъдынг – кюнюнгден чыкъдынг.
- Кёпюр салгъан кеси ётер, уру къазгъан кеси кетер.
Профиль
|
|
|||