- Аш кетер да бет къалыр.
- Байны къызы баймакъ болса да, юйде къалмаз!
- Термилгенинги табмазса, кюлгенинге тюберсе.
- Башы джабылгъан челекге, кир тюшмез.
- Телиге акъыл салгъандан эсе, ёлгеннге джан салырса.
- Урама да – ёледи, сатама да – келеди.
- Аман киши кеси юйюнде – къонакъ.
- Юйюнг бла джау болгъандан эсе, элинг бла джау бол.
- Зар адамны насыбы болмаз.
- Эркиши – от, тиширыу – суу.
- Биреуню тёрюнден, кесинги эшик артынг игиди.
- Къызын тута билмеген, тул этер, джашын тута билмеген, къул этер.
- Дженгил джетерикме деб, узун джолну къоюб, къысхасын барма.
- Юйлю уругъа ит чабмаз.
- Тамбла алтындан бюгюн багъыр ашхы.
- Кёб къычыргъандан – къоркъма, тынч олтургъандан – къоркъ.
- Эки къатын алгъан – эки ташны ортасына башын салгъан.
- Сабийни джумушха джибер да, ызындан бар.
- Акъыл къартда, джашда тюйюлдю – башдады.
- Айтылгъан буйрукъ, сёгюлмез
- Тил джюрекге джол ишлейди.
- Ауузу аманнга «иги», деме.
- Атлыны кёрсе, джаяуну буту талыр.
- Мени джылытмагъан кюн, меннге тиймесин!
- Юй кюйдю да, кюйюз чыкъды, ортасындан тюйюш чыкъды.
- Аман хансны – урлугъу кёб.
- Ач къарным, тынч къулагъым.
- Ёксюзню тилеги къабыл болур.
- Билмейме деген – бир сёз
- Иги джашны ышаны – аз сёлешиб, кёб тынгылар.
- Биреуге аманлыкъны тилеме да, кесинге ашхылыкъны тиле.
- Татлы тилде – сёз ариу, чемер къолда – иш ариу.
- Мураты болгъанны джюрек тебюую башхады.
- Тил – кесген бычакъ, сёз – атылгъан окъ.
- Рысхы джалгъанды: келген да этер, кетген да этер.
- Эм уллу байлыкъ – джан саулукъ.
- Таукел тауну аудурур.
- Керек ташны ауурлугъу джокъ.
- Онгсузну – джакъла, тенгликни – сакъла.
- Бермеген къол, алмайды.
- Бек анасы джыламаз.
- Оюмсуз атлагъан, аджалсыз ёлюр.
- Кёкдеги болмаса, джердегин кёрмейди.
- Игини сыйлагъан адетди.
- Кийим тукъум сордурур.
- Сескекли кесин билдирир.
- Сагъышы джокъ – джукъучу, акъылы джокъ – къаугъачы.
- Уруну арты – къуру.
- Адамны джюреги нени кёрюрге сюйсе, кёзю да аны кёрюрге ёч болады.
- Азыкълы ат арымаз, къатыны аман джарымаз.
Профиль
|
|
|||