Эльбрусоид :: Форум :: Архив форумов

Кесинг сынамагъан затны, адамгъа буюрма.
Хата – гитчеден.
Къралынгы – душмандан, башынгы от бла суудан сакъла.
Къонакъ кёб келюучю юйню, къазаны отдан тюшмез.
Кёзден кетген, кёлден да кетеди.
Адамны сабийин сюйген джюреги, бычакъча, джитиди.
Джукъу тёшек сайламайды.
Джаралыны джастыгъында сау ёлюр.
Джан саулукъ бермей, сан саулукъ бермезсе.
Босагъагъа джууукъ орун болса, ашыгъыб тёрге озма.
Тойчу джашха къарама, къойчу джашха къара.
Акъдан къара болмаз.
Келлик заман – къартлыкъ келтирир, кетген заман – джашлыкъ ёлтюрюр.
Шайтан алдады, тюзлюк къаргъады.
Ашлыкъ – бюртюкден, джюн – тюкден.
Къайгъы тюбю – тенгиз.
Татлы тилде – сёз ариу, чемер къолда – иш ариу.
Этим кетсе да, сюегим къалыр.
Кесине оноу эте билмеген, халкъына да эте билмез.
Ёзденликни джайгъан – джокълукъ.
Тилсиз миллет джокъ болур.
Аман адамны тепсинге олтуртсанг, къызынгы тилер.
Арпа, будай – ащды, алтын, кюмюш а – ташды.
Аманнга игилик этсенг, юйюнге сау бармазса.
Ачыкъ джюрекге джол – ачыкъ.
Башы ишлегенни, ауузу да ишлер.
Къарыусузгъа кюлме, онгсузгъа тийме.
Тойгъан джерге джети къайт.
Мухарны эси – ашарыкъда.
Хар ишни да аллы къыйынды.
Биреуню эскиси биреуге джангы болмайды.
Таукел тауну аудурур.
Адамны аты башхача, акъылы да башхады.
Ач къарным, тынч къулагъым.
Акъыл къартда, джашда тюйюлдю – башдады.
Хатерли къул болур.
Хантына кёре тузу, юйюне кёре къызы.
Къызны минг тилер, бир алыр.
Акъыл бла адеб эгизледиле.
Адамгъа аман кюн соруб келмейди.
Иги адам абынса да, джангылмаз.
Уллу сёзде уят джокъ.
Ким бла джюрюсенг, аны кёзю бла кёрюнюрсе.
Ата – билек, ана – джюрек!
Ишге юренсин къоллары, халкъ бла болсун джоллары.
Ётюрюкню къуйругъу – бир тутум.
Эски джаугъа ышанма.
Ариу джол аджал келтирмез.
Уллу атлама – абынырса, уллу къабма – къарылырса.
Онгсузну – джакъла, тенгликни – сакъла.

Логин:
Пароль:
	Запомнить меня на этом компьютере

Забыли свой пароль?
Регистрация