- Къаллай салам берсенг, аллай джууаб алырса.
- Агъач – джерни чырайы, кийим – эрни чырайы.
- Къартны бурнун сюрт да, оноугъа тут.
- Тенгинг джокъ эсе – изле, бар эсе – сакъла!
- Джигер – джаннга къыйынлыкъ.
- Ётюрюкню къуйругъу – бир тутум.
- Сакъламагъан затынга джолукъсанг, не бек къууанаса, не бек ачыйса.
- Эте билген, этген этеди, эте билмеген, юретген этеди!
- Ёлмесенг да, къарт дамы болмазса?
- Къызны минг тилер, бир алыр.
- Биреуге аманлыкъ этиб, кесинге игилик табмазса.
- Къошда джокъгъа – юлюш джокъ.
- Адам боллукъ, атламындан белгили болур.
- Джюрек кёзден алгъа кёрюр.
- Азыгъы аз, алгъа къабар, аты аман, алгъа чабар.
- Биреу къой излей, биреу той излей.
- Сескекли кесин билдирир.
- Иги бла джюрюсенг, джетерсе муратынга, аман бла джюрюсенг, къалырса уятха.
- Адам сёзюнден белгили.
- Мал кёб болса, джууукъ кёб болур.
- Къыйынлы джети элге оноу этер.
- Чомартха хар кюн да байрамды.
- Кёрмегеннге кебек – танг, битмегеннге сакъал – танг.
- Джарлыны тону джаз битер.
- Айныгъанлы алты кюн, тогъайгъанлы тогъуз кюн.
- Къарнынг къанлынга кийирир.
- Байлыкъ адамны сокъур этер.
- Тил бла келеди джыр да.
- Элге къуллукъ этмеген, элге ие болмаз.
- Суугъа – чабакъ, къаягъа – ыргъакъ.
- Джаралыны джастыгъында сау ёлюр.
- Арбаз къынгырды да, ийнек сауалмайма.
- Босагъагъа джууукъ орун болса, ашыгъыб тёрге озма.
- Эр сокъур болсун, къатын тилсиз болсун.
- Адеб базарда сатылмаз.
- Айтылгъан сёз ызына къайтмаз.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Эки элинги тыйсанг, джети элде махталырса.
- Акъыл бла адеб эгизледиле.
- Эр абынмай, эл танымаз.
- Кесинг сынамагъан затны, адамгъа буюрма.
- Мухардан ач ычхынмаз.
- Элде адам къалмаса, ит тахтагъа минер.
- Джашда акъыл джокъ, къартда къарыу джокъ.
- Керилген да, ургъан кибикди.
- Ашда уялгъан – мухар, ишде уялгъан – хомух.
- Таш ата билмеген, башына урур.
- Къонакъ хазыр болгъанлыкъгъа, къонакъбай хазыр тюлдю.
- Аз айтсам, кёб ангылагъыз.
- Ёксюзню тилеги къабыл болур.
Профиль
|
|
|||