- Чабакъсыз кёлге къармакъ салгъанлыкъгъа, чабакъ тутмазса.
- Къартны бурнун сюрт да, оноугъа тут.
- Бир абыннган – минг сюрюнюр.
- Къызбайны юйюне дери сюрсенг, батыр болур.
- Окъугъан – асыу, окъумагъан – джарсыу.
- Таула не мийик болсала да, аууш табылыр.
- Адам сёзюнден белгили.
- Бек анасы джыламаз.
- Мен да «сен», дейме, сен да «кесим», дейсе.
- Тюзлюк тас болмайды.
- Аууз сакълагъан – джан сакълар.
- Бир онгсуз адам адет чыгъарды, деб эштирик тюлсе.
- Хазыр ашха – терен къашыкъ.
- Аманны къуугъан, аманлыкъ табар.
- Ишге юренсин къоллары, халкъ бла болсун джоллары.
- Тай асырагъан, атха минер.
- Эркиши – от, тиширыу – суу.
- Ашхы сёз таш тешер.
- Хар сёзню орну барды.
- Ариу сёз – джаннга азыкъ, аман сёз – башха къазыкъ.
- Келгинчи, къонакъ уялыр, келгенден сора, къонакъбай уялыр.
- Ишлерге уял да, ашаргъа табма.
- Ашына кёре табагъы, балына кёре къалагъы.
- Арбаз къынгырды да, ийнек сауалмайма.
- Ойнай билмеген, оюн бузар.
- Тилсиз миллет джокъ болур.
- Джерни букъусу кёкге къонмаз.
- Билмегенинги, билгеннге сор.
- Ишни ахырын ойламай, аллын башлама.
- Уллу суу бла уллу ауруудан башынгы сакъла.
- Бастасын ашагъан, хантусун да ичер.
- Тойгъан джерден туугъан джер игиди.
- Кютгени беш эчки, сызгъыргъаны уа, джерни джарады.
- Таш ата билмеген, башына урур.
- Къарнынг ауруса, ауузунгу тый
- Керти сёзге тёре джокъ.
- Акъыл неден да кючлюдю.
- Биреу ашаб къутулур, биреу джалаб тутулур.
- Баланы адам этген анады.
- Акъылсызны джууукъгъа алма, акъыллыны кенгнге салма.
- Акъыл сабырлыкъ берир.
- Къыз келсе, джумуш эте келеди, къатын келсе, ушакъ эте келеди.
- Кийимни бичсенг, кенг бич, тар этген къыйын тюлдю.
- Хаухну атма, ёнгкючню сатма.
- Ата Джуртуму башы болмасам да, босагъасында ташы болайым.
- Сескекли кесин билдирир.
- Ашхы болсанг, атынг чыгъар, аман болсанг, джанынг чыгъар.
- Ауузу бла къуш тута айланады.
- Къызгъанчдан ычхыныр, мухардан ычхынмаз.
- Айтылгъан сёз ызына къайтмаз.
Профиль
|
|
|
|||