- Эки ойлашыб, бир сёлешген.
- Кирсизни – саны таза, халалны – къаны таза.
- Ата Джуртун танымагъан, атасын да танымаз.
- Итли къонакъ джарашмаз.
- Къазанны башы ачыкъ болса, итге уят керекди.
- Сакъламагъан затынга джолукъсанг, не бек къууанаса, не бек ачыйса.
- Ойнай билмеген, уруб къачар.
- Бет бетге къараса, бет да джерге къарар.
- Джаш къарыу бла кючлю, къарт акъыл бла кючлю.
- Суугъа – таянма, джаугъа – ийнанма.
- Мухар, кеси тойса да, кёзю тоймаз.
- Джашда акъыл джокъ, къартда къарыу джокъ.
- Алим болгъандан эсе, адам болгъан къыйынды.
- Адам сёзге тынгыла, акъыл сёзню ангыла.
- Таула не мийик болсала да, аууш табылыр.
- Биреуню къыйынлыгъы бла кесинге джол ишлеме.
- Адамны адамлыгъы къыйынлыкъда айгъакъланады.
- Нарт сёз къарт болмаз.
- Эски джаугъа ышанма.
- Айран ичген – къутулду, джугъусун джалагъан – тутулду.
- Сёлеш деб шай берген, тохта деб, сом берген.
- Адамны аты башхача, акъылы да башхады.
- Мал ёлсе, сюек къалыр, адам ёлсе, иши къалыр.
- Сабийни джумушха джибер да, ызындан бар.
- Зар адам ашынгы ашар, кесинги сатар.
- Ашлыкъны арба юйге келтирир, чана базаргъа элтир.
- Къонакъны къачан кетерин сорма, къачан келлигин сор.
- Аманны эки битли тону болур, бирин сеннге кийдирир, бирин кеси киер.
- Этни да ашады, бетни да ашады.
- Аш берме да, къаш бер.
- Бичгенде ашыкъма, тикгенде ашыкъ.
- Къазанда болса, чолпугъа чыгъар.
- Узун джолну барсанг, бюгюн келирсе, къысха джолну барсанг, тамбла келирсе.
- Гугурук къычырмаса да, тангны атары къалмаз.
- Арыгъан къош чамчы болур.
- Ойнаб айтсанг да, эслеб айт.
- Насыб бютеу халкъны юлюшюдю.
- Ичимден чыкъды хата, къайры барайым сата?
- Эм ашхы къайын ана мамукъ бла башынгы тешер.
- Адамны артындан къара сабан сюрме.
- Арбаз сайлама да, хоншу сайла.
- Телиге от эт десенг, юйюнге от салыр.
- Джашлыкъ этмеген, башлыкъ этмез.
- Къалгъан ишге къар джауар.
- Элни кючю – эмеген.
- Ишни ахырын ойламай, аллын башлама.
- Ёмюрлюк шохлукъну джел элтмез.
- Къарнынг къанлынга кийирир.
- Сибиртки да сыйлы болду, кюрек да кюнлю болду.
- Бети бедерден, намыс сакълама.
Профиль
|
|
|
|||