- Аджаллыгъа окъсуз шкок атылыр.
- Аман адам этегингден тутса, кес да къач.
- Кюн кёрмеген, кюн кёрсе, кюндюз чыракъ джандырыр.
- Аууздан келген, къолдан келсе, ким да патчах болур эди.
- Ашатыргъа иш – ашхы, ишлетирге аш – ашхы.
- Къазанны башы ачыкъ болса, итге уят керекди.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Къартны бурнун сюрт да, оноугъа тут.
- Баш – акъыл ючюн, акъылман – халкъ ючюн.
- От кюйдюрген, сау болса да, тот кюйдюрген, сау болмаз.
- Кирсизни – саны таза, халалны – къаны таза.
- Айран тёгюлсе, джугъусу къалыр.
- Сабий кёргенин унутмаз.
- Сёз сёзню айтдырыр.
- Джогъун бар этген, барын бал этген.
- Урунуу – насыбны анасы.
- Алим болгъандан эсе, адам болгъан къыйынды.
- Чакъырылмагъан къонакъ – орунсуз.
- Кёпюр салгъан кеси ётер, уру къазгъан кеси кетер.
- Гырджын – тепсини тамадасы.
- Элге къуллукъ этмеген, элге ие болмаз.
- Уллу суу бла уллу ауруудан башынгы сакъла.
- Керти сёзге тёре джокъ.
- Тёрдеги кюлсе, эшикдеги ышарыр.
- Эринчекни аурууу – кёб.
- Билим насыб берир, билим джолну керир.
- Къайгъыны сюйген, къайгъы табар.
- Чомартха хар кюн да байрамды.
- Юйюнг бла джау болгъандан эсе, элинг бла джау бол.
- Мени джылытмагъан кюн, меннге тиймесин!
- Джашны джигитлиги сорулур, къызны джигерлиги сорулур.
- Окъдан джара эртде-кеч болса да бителир, сёз джара, ёмюрге къалыр.
- Окъумагъан сокъурду, сокъур ташха абыныр!
- Кийим тукъум сордурур.
- Сёз – кюмюш, джыр – алтын.
- Телиге акъыл салгъандан эсе, ёлгеннге джан салырса.
- Айыбны суу бла джууалмазса.
- Билим – акъылны чырагъы.
- Акъдан къара болмаз.
- Тенги кёбню джау алмаз, акъылы кёбню дау алмаз.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Къонакъ кёб келюучю юйню, къазаны отдан тюшмез.
- Байма, деб да, къууанма, джарлыма, деб да, джылама.
- Ач, тоймам, дейди, тойгъан, ач болмам, дейди.
- Таукелге нюр джауар.
- Адебни адебсизден юрен.
- Аманнга да, игиге да оноусуз къатышма.
- Акъылсызны джууукъгъа алма, акъыллыны кенгнге салма.
- Сабий болмагъан джерде, мёлек болмаз.
- Ауузу аманнга «иги», деме.
Профиль
|
|
|||