- Адам къыйынлыгъын кёлтюрюр, зауукълугъун кёлтюрмез.
- Телиге акъыл салгъандан эсе, ёлгеннге джан салырса.
- Ишлегенде эринме, ишде чолакъ кёрюнме.
- Алма терегинден кери кетмез.
- Тыш элде солтан болгъандан эсе, кесинги элде олтан болгъан игиди!
- Таякъ этден ётер, тил сюекден ётер.
- Тил бла келеди джыр да.
- Къартха ушагъан джаш – акъыллы, джашха ушагъан къарт – тели.
- Джарлы тюеге минсе да, ит къабар.
- Эки итни арасына сюек атма, эки адамны арасында сёз чыгъарма.
- Сабий болмагъан джерде, мёлек болмаз.
- Аллахха ийнаннган кишини, Аллах онгдурур ишин.
- Керилген да, ургъан кибикди.
- Тойгъа алгъа да барма, тойда артха да къалма.
- Ханнга да келеди хариблик.
- Чомартны къолун джокълукъ байлар.
- Кесине гебен этелмеген, биреуге черен эте эди.
- Дууулдаса – бал чибин, къонса – къара чибин.
- Билими азны – ауузунда кирит.
- Къан бла кирген, джан бла чыгъар.
- Эки элинги тыйсанг, джети элде махталырса.
- Баргъанынга кёре болур келгенинг.
- Ашарыкъда сайлагъаннга – чий гырджын.
- Чабакъ башындан чирийди.
- Ариу джол аджал келтирмез.
- Уллу айтханны этмеген – уллаймаз.
- Бетинги сатма, малынгы сат.
- Къарнынг къанлынга кийирир.
- Мухар, кеси тойса да, кёзю тоймаз.
- Ёлген эшек бёрюден къоркъмайды.
- Адам къаллай бир ишленмесе, аллай бир кесин уллу кёреди.
- Нёгер болсанг, тенг бол, тенг болмасанг, кенг бол.
- Акъыл аздырмаз, билим тоздурмаз.
- Акъыл къартда, джашда тюйюлдю – башдады.
- Аджашханны ызындагъы кёреди, джангылгъанны джанындагъы биледи.
- Намыс болмагъан джерде, насыб болмаз.
- Хар адамгъа кеси миннген тау кибик.
- Миллетни бойну – базыкъ, аны бла кюрешген – джазыкъ.
- Кюл тюбюндеги от кёрюнмейди.
- Кесинг сынамагъан затны, адамгъа буюрма.
- Чабакъгъа акъыл, табагъа тюшсе келеди.
- Окъуу – билимни ачхычы, окъуу – дунияны бачхычы.
- Чомарт бергенин айтмаз.
- Чёбню кёлтюрсенг, тюбюнден сёз чыгъар.
- Джаз бир кюнню джатсанг, къыш талай кюнню абынырса.
- Джюз элде джюз ёгюзюм болгъандан эсе, джюз джууугъум болсун.
- Таш бла ургъанны, аш бла ур.
- Адамны артындан къара сабан сюрме.
- Кёл – къызбай, къол – батыр.
- Къобан да къуру да къобханлай турмайды, адам да къуру да патчахлай турмайды.
Профиль
|
|
|
|||