- Кёл – къызбай, къол – батыр.
- Ёлген эшек бёрюден къоркъмайды.
- Элде адам къалмаса, ит тахтагъа минер.
- Насыблы элин сюер, насыбсыз кесин сюер.
- Билеги кючлю, бирни джыгъар, билими кючлю, мингни джыгъар.
- Тойну къарнашы – харс, джырны къарнашы – эжиу.
- Баргъанынга кёре болур келгенинг.
- Тойгъандан сора, ашны сёкме.
- Дженгил джетерикме деб, узун джолну къоюб, къысхасын барма.
- Хар ишни да аллы къыйынды.
- Болджал ишни бёрю ашар.
- Эли джокъну – кёлю джокъ.
- Аман киши кеси юйюнде – къонакъ.
- Акъылсызны джууукъгъа алма, акъыллыны кенгнге салма.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Уллу къашыкъ эрин джыртар.
- Алгъанда – джууукъ, бергенде – джау.
- Ариу сёз джыланны орнундан чыгъарыр.
- Ариу джол аджал келтирмез.
- Къан бла кирген, джан бла чыгъар.
- Танг атмайма десе да, кюн къоярыкъ тюйюлдю.
- Туз, гырджын аша, тюзлюк бла джаша.
- Къууут – джелге, берне – бошха.
- Кесине гебен этелмеген, биреуге черен эте эди.
- Ариу сёзде ауруу джокъ.
- Тёзгеннге, джабылгъан эшик ачылыр.
- Байдан умут эте, джарлыдан ёгюз багъасы къорады.
- Тойгъа алгъа да барма, тойда артха да къалма.
- Сыфатында болмагъаны, суратында болмаз.
- Тюзлюк шохлукъну бегитир.
- Аманнга да, игиге да оноусуз къатышма.
- Ач уят къоймаз.
- Зарда марда джокъ.
- Ёлюк кебинсиз къалмаз.
- Ушамагъан – джукъмаз.
- Этим кетсе да, сюегим къалыр.
- «Ёгюз, джаргъа джууукъ барма, меннге джюк боллукъса», - дегенди эшек.
- Сёз садакъдан кючлюдю.
- Мал кёб болса, джууукъ кёб болур.
- Бозанг болмагъан джерге, къалагъынгы сукъма.
- Байлыкъ адамны сокъур этер.
- Алим болгъандан эсе, адам болгъан къыйынды.
- Ёксюзню къалачы уллу кёрюнюр.
- Эшекге миннген – биринчи айыб, андан джыгъылгъан – экинчи айыб.
- Бастасын ашагъан, хантусун да ичер.
- Иги бла джюрюсенг, джетерсе муратынга, аман бла джюрюсенг, къалырса уятха.
- Аз айтсам, кёб ангылагъыз.
- Сакъламагъан затынга джолукъсанг, не бек къууанаса, не бек ачыйса.
- Къонакъ кёб келюучю юйню, къазаны отдан тюшмез.
- Ёлген ийнек сютлю болур.
Профиль
|
|
|||